Read Quechua Bolivia DC Bible 1 CORINTIOS 6 Bible Online

1 CORINTIOS 6 - Quechua Bolivia DC Bible bible

1 CORINTIOS 6

¹Qankunamanta mayqellampis wajpa contrampi quejakoj kanman chayqa; imaynatataj rinman mana creejpa ñaupaqenman quejakoj, manataj Diospa ajllasqasninmanchu?

²Chayrí, manachu yachankichej kay mundota Diospa ajllasqasnin juzgananta? Qankunanejtachus kay mundo juzgasqa kanqa chayqa, manachu atiwajchej juch'uy imasta juzgaytaqa?

³Chayrí, manachu yachankichej angelesta juzganaykichejta? Jina chayqa, ima astawanchus mana juzgasunchej kay kausaypa imasnintaqa!

⁴Arí, qankuna ukhupi tiyan quejanakus kay kausaypa imasninmanta. Chayta juzganampajqa iglesiapi mana kajkunatachu churankichej?

⁵Kayta nini qankunata p'enqachinaypaj. Manachu qankuna ukhupi tiyan ni ujllapis yachayniyoj, hermanosta juzganampaj?

⁶Atikunchu hermanopura quejanakunanku, mana creejkunaj ñaupaqenkupi?

⁷Ajina chayqa qankunapura quejanakuspa juchallinkichejña. Imaraykutaj qankunapura mana aguantanakunkichejchu phiñanakuyta saqespa? Imaraykutaj mana saqenkichejchu suwasunaykichejta?

⁸Astawan qankuna juchallinkichej, mana cheqan kajta ruwaspa, hermanosllamantataj suwaspa.

⁹Manachu yachankichej mana cheqa kajta ruwajkuna, Diospa reinonta chayaqepaj mana jap'inankuta? Ama pantaychejchu, millayta purejkuna, lantista yupaychajkuna, qhenchachakojkuna, qhari kashaspa warmiman rijch'akojkuna, qharipura kakojkuna, ajinallataj suwaspis, mich'aspis, machajkunapis, maldicejkunapis, nitaj ch'aukiyajkunapis Diospa reinontaqa chayaqepaj jap'enqankuchu.

¹¹Ajina karqankichej qankunamanta wakin; kunanrí mayllasqasña kankichej, juchamanta llimphuchasqasña, allinyasqastaj Señor Jesuspa sutinrayku, Diosninchejpa Espiritunnejta ima.

¹²Tukuy imas noqapajqa atikun, manataj chayraykuchu tukuynenqa walej. Tukuy imas noqapajqa atikun, manataj ni mayqenwan atipachikusajchu.

¹³Cheqamanta mikhunasqa wijsapaj, wijsataj mikhunaspaj. Chaywampis, iskayninta Dios chinkachenqa. Cuerpoqa mana qhenchachakunampajchu. Cuerpoqa Señorpata, Señortaj cuerpojta.

¹⁴Imaynatachus Diosqa Señorta kausaricherqa, ajinallatataj noqanchejtapis kausarichiwasun atiyninwan.

¹⁵Manachu yachankichej qankunaj cuerpoykichejqa Cristoj cuerponmanta kasqanta? Chaykunata Cristoj cuerponmanta qhechuspachu qhencha warmej cuerponman chajruyman? Manapuni.

¹⁶Chayrí, manachu yachankichej pichus qhencha warmiwan tantakojqa, paywan uj cuerpolla kasqanta? Escribisqa nishan: Iskayninku uj aychalla kanqanku, nispa.

¹⁷Ajinata pichus Señorwan ujchakojqa, paywan uj espiritullapi kashan.

¹⁸Ayqeychej qhenchachakuymanta. Pillapis waj ima juchata ruwanman chayqa, cuerponmanta jawapi kashan. Pichus qhenchachakojqa cuerpompa contrampi juchallikun.

¹⁹Manachu yachankichej cuerpoykichejqa Santo Espíritoj templon kasqanta? Payqa qankunapi kashan. Payta Dios qosunkichej, manataj qankunajtachu kankichej.

²⁰Diosqa preciowan rantisorqachej. Diosta yupaychaychej cuerpoykichejwan, espirituykichejwan ima; chaykunaqa Diospata kanku.