Read Quechua Bolivia DC Bible 2 CORINTIOS 10 Bible Online

2 CORINTIOS 10 - Quechua Bolivia DC Bible bible

2 CORINTIOS 10

¹Noqa Pablo willaykichej, Cristoj k'acha misk'i sonqonrayku. Qankunawan kashaspaqa k'umuykukoj kani, qankunamanta karupi kashaspataj phiña sonqo kani.

²Mañakuykichej ari, chayman jamojteyqa ama sajrapaj jap'inawaykichejta, imaraykuchus noqa sinch'ita k'aminay tiyan ch'ataykuwajkunata; pikunachus nishanku aychaman jina purisqaykuta. Chaykunawan parlanay kashan.

³Cheqamanta aychaman jina purispapis, mana kay pacha runas jinachu maqanakuyku.

⁴Maqanakunayku armasqa, mana aychaman jinachu, astawanqa Diospa atiyninwan thuñinaykupaj sinch'i jark'akuna wasista.

⁵Ajinata ari, runakunaj yachayninkuta thuñispa, wapuykachaspa Diospa yachayninta qhesachajkunata; tukuy yuyaytataj Cristoman apaspa kasunankupaj.

⁶Wakisqas kashayku mana kasukojkunata jasut'inaykupaj, allin kasukojkuna kanaykichejkama.

⁷Qankunaqa imatapis qhawashankichej allin rijch'aynillanta. Kayta pipis allinta yachachun. Imaynatachus pipis Cristojta kasqanta nin chayqa, ajinallatataj noqaykupis Cristojta kayku.

⁸Kusikuni Señor astawan atiyta qowasqaykumanta wiñachinaykupaj, manataj thuñisqas kanaykichejpajchu. Chaymanta mana p'enqakunichu, ama cartasniywan manchachejman jina rijch'akunaypaj.

¹⁰Cartasniymanta pichá nin sinch'i phiñas kasqankuta; ñaupaqenkupi kashajtiytaj pisi kallpayoj kasqayta nin, parlasqaypis qhesachasqa.

¹¹Pichus kayta parlajqa, yachachun imaynatachus carta palabrasninman jina kasqaykuta karupi kashaspa; kikillantaj kasqayku, ruwasqaykutaj qankunawan kaspaqa.

¹²Manataj noqayku atiykumanchu paykunaman kikinchayta imaraykuchus paykunallamanta allin kajta parlanku. Paykunalla tupukunku, khuskachakunku paykunapura, manataj yachayniyojchu kanku.

¹³Manaña noqaykoqa anchata parlasqaykuchu, astawanqa maychus kasqanta parlasqayku, Diospa tupunman jina. Payllataj chay tuputa qowayku, qankunajkama llank'aspa chayamunaykupaj.

¹⁴Chayrayku noqayku, tupu churasqamanta astawan jaqayman mana riykuchu, astawanqa noqayku ñaupajta chayamorqayku qankunajman Cristoj evangelionta apamuspa.

¹⁵Mana noqaykoqa alabakuykuchu wajkunaj llank'asqankumanta, noqaykojtapis kanman jina. Astawanqa suyashayku feniykichej wiñasqanman jina, qankuna ukhupi allin qhawasqas kanaykupaj puriyniykuman jina.

¹⁶Chaymanta, suyashayku qankunajmanta astawan karusman evangeliota apayta, mana wajpa wakichisqanman yaykuspa, nitaj wajpa llank'asqanmanta alabakuspa.

¹⁷Astawanqa, pichus kusikuyta munajqa kusikuchun Señorpi.

¹⁸Pichus pay kikin alabakojqa, mana allimpajchu qhawasqa; astawanqa jaqay pitachus Dios alaban, chaymin allin qhawasqaqa.