Read Quechua Bolivia DC Bible 2 CORINTIOS 6 Bible Online

2 CORINTIOS 6 - Quechua Bolivia DC Bible bible

2 CORINTIOS 6

¹Arí ajina, qankunata yanapajkuna kayku Diospa ruwaynimpi. Mañakuykutaj qankunaqa ama qhasipajchu jap'inaykiychejta Diospa khuyakuyninta.

²Escribisqapeqa nishan: Khuyakuy tiempopi uyarerqayki; salvakuna p'unchaypitaj yanaparqayki. Kunanqa kaymin khuyakuna p'unchay. Kunanqa kaymin salvakuna p'unchay.

³Mana pipajpis ima misk'anatapis churarqanichu, ama p'enqayta rinankupaj noqaykoj ruwasqaykumanta.

⁴Astawanqa munayku tukuy imapi rikuchikuyta Diospa kamachisnin jina, ancha pacienciawan ñak'ariykunapi, pisichikuypi, llakiykunapi; jasut'isqas, carcelman churasqas, ch'ajwas chaupipi, llank'aykunapi, mana puñusqas, mana mikhusqastaj.

⁶Rikuchispa llimphus kasqaykuta kausayniykupi, cheqa kajta rejsisqaykurayku, pacienciakuspa, khuyakuywantaj, Santo Espiritupi tukuy sonqo munakuypi.

⁷Cheqa kaj palabrawan, Diospa atiyninwan, cheqa kaj armasta oqharikuspa pañamanta lloq'eman kutichikuspa.

⁸Uj kutipeqa allin qhawasqa kayku, waj kutitaj mana, uj kutipitaj allinta parlanku noqaykumanta. Waj kutipitaj sajrata parlanku, uj kutipitaj llullasta jina qhawawayku; chaywampis cheqatapuni parlayku.

⁹Mana rejsisqas jina kayku, chaywampis sumaj rejsisqas kayku, manataj wañusqaschu.

¹⁰Llakisqas jina kayku, chaywampis kusisqaspuni; wajchas jina kayku. Chaywampis ashkhasta qhapajyachiyku. Mana kapuyniyoj jina kashajtiykupis, astawan tukuy ima kapuwayku.

¹¹Corintopi kaj hermanos, qankunaman sut'ita parlamuyku mana imata pakaspa, sonqoykutaj jatunta kicharikun qankunapaj.

¹²Noqaykoj sonqoykoqa qankunapaj mana wisq'asqachu. Qankunaj sonqoykichejrí, noqaykupaj wisq'asqa.

¹³Kunanqa kikillantataj kutichispa niykichej: Qankunapis ama manchachikuspa sonqoykichejta jatunta kichariychej. Wawasman jina parlashaykichej.

¹⁴Ama yugopi jina tantakuychejchu ch'ulla ch'ulla, Diospi mana creejkunawan. Kunanqa, imata ruwanan tiyan cheqa kaj, sajra kajwanri? Chayrí, imaynatataj k'anchayqa laqhawan chajrukonqari?

¹⁵Imaynatataj kausanqanku Cristowan supaywan? Chayrí, Diospi creejqa ima ruwanan tiyan mana creejwan?

¹⁶Chantá ima allintaj kanman, Diospa templompi lantikuna kanankuri? Qankunaqa kausashaj Diospa templon kankichej, imaynatachus Dios nerqa: Kausajtaj, purisajtaj paykuna ukhupi. Paykunaj Diosninku kasaj. Paykunataj aylluy kanqanku.

¹⁷Chayrayku llojsiychej paykunaj chaupinkumanta, t'aqakuychejtaj, nin Señorqa. Ama llankhaychejchu ch'ichi imasta, noqataj jap'ikapusqaykichej.

¹⁸Noqataj qankunaj tataykichej kasaj, qankunataj qhari wawasniy, warmi wawasniytaj kankichej, ajinata nin Tukuy Atiyniyoj Señor.