Read Quechua Bolivia DC Bible 2 CORINTIOS 7 Bible Online

2 CORINTIOS 7 - Quechua Bolivia DC Bible bible

2 CORINTIOS 7

¹Munakusqasníy, imatachus Dios qosqaykichej nisqanqa tiyapuwanchej; chayrayku cuerponchejta, espiritunchejtapis llimphuchakuna tukuy ch'ichi kajmanta. Diosta manchachikuspa juchamanta t'aqakuna tukuy atisqanchejta.

²Uyariwayku; mana pitapis ima sajrata ruwaykuchu, nitaj pantacherqaykuchu, nitaj ch'aukiyarqaykuchu pitapis.

³Kaytaqa mana juchachanayraykuchu niykichej, imaynatachus ñaupajtaña nerqani. Qankunaqa sonqosniykupi kashankichej, khuska kausananchejpaj, wañunanchejpajpis.

⁴Qankunamanqa sut'inta parlaykichej. Qankunamanta may sonqo junt'asqa kani. Tukuy llakiyniypitaj may sonqochasqa, kusiyniyojtaj kani.

⁵Macedoniaman chayamusqaykumantapacha, mana imaynata samarikorqaykuchu, astawanqa imaymana llakiykuna jamuwarqayku; jawamanta ch'ajwas, ukhumantataj manchachikuykuna.

⁶Chaywampis, Dios yachan llakisqasta sonqochayta. Noqaykutapis sonqochawarqayku Titoj chayamusqan.

⁷Mana chayamusqallanwanchu, astawanqa qankunamanta sonqochasqa kasqanrayku; paytaj willawarqayku rikuyta munawasqaykuta, waqasqaykichejta, noqamantapis llakikusqaykichejta ima. Chaytaj astawan kusichiwarqa.

⁸Escribimusqay cartawan llakicherqaykichej, chaymanta kunanqa mana llakikunichu; chaypacha llakikorqani, yachaspa chay cartaqa llakichisusqaykichejta, manataj unaytachu llakichisorqachej.

⁹Kunanqa kusikuni, mana qankunata llakichisqayraykuchu, imaraykuchus chay llakeyqa, juchamanta Diosman kutirinaykichejpaj karqa; chaykunata jap'erqankichej Diospa munasqanman jina. Chayrayku noqaykumantaqa mana ima sajratapis jap'erqankichejchu.

¹⁰Diospa munasqanman jina llakikoyqa, juchamanta Diosman kutirispa salvakunapaj. Chaymantaqa, mana llakikunachu, astawanqa kay mundoj llakiynin wañuyta apamun.

¹¹Kay llakiyta jap'erqankichej Diospa munasqanman jina. Qhawaychej mashkha phutichikuytachus apamusunkichej: Kutichikuyta, phiñakuyta, mancharikuyta, k'ajaj munakuyta, atipanakuyta, jasut'iyta ima; chay tukuypi rikusqas kankichej mana juchayoj llimphus.

¹²Ajinaqa, cartata escribimushaspaqa, mana chay juchallikojpichu yuyarqani, nitaj chay runaj llakikusqampichu; astawanqa yachanaykichejpaj llakikusqaykuta qankunamanta yuyarikuspa Diospa ñaupaqempi.

¹³Chayrayku, sonqochakuyku qankuna sonqochasqas kasqaykichejwan. Jinallataj Tito kusisqa kasqanmanta kusikuyku. Qankunataj kallpachankichej sonqonta.

¹⁴Sichus Titowan kusikorqani chayqa, mana p'enqakorqanichu qankunamanta. Tukuy ima cheqa kajta parlarqayku, Titowan kusikusqaykoqa cheqapuni karqa.

¹⁵Paypa munakuynenqa may jatumpuni qankunapaj. Sapa kuti yuyarikun kasukoj kasqaykichejmanta, imaynatachus chayamushajtiy jap'iwarqankichej, manchachikuywan, kharkatitiywantaj.

¹⁶Kusikuni tukuy imapi qankunapi confiasqaymanta.