Read Quechua Bolivia DC Bible 2 CORINTIOS 8 Bible Online

2 CORINTIOS 8 - Quechua Bolivia DC Bible bible

2 CORINTIOS 8

¹Kunanqa, hermanos, willayta munayku qankunaman, Dios rikuchisqanta khuyakuyninta Macedoniapi kaj iglesiasman.

²May phutiykunapi kashajtinku, may kusikuyniyoj karqanku; wajchas kashaspapis qorqanku tukuy sonqo, qhapajyarqankutaj sumaj sonqowan qosqankurayku.

³Noqa rikorqani, paykunaqa kallpankuman jina atisqankuta qorqanku, kallpankumantapis astawanraj.

⁴Maytapuni paykuna niwarqayku chay yanapata jap'inaykuta, hermanosman apanaykupaj.

⁵Mana suyasqaykuman jinachu karqa, astawanqa paykunaraj ñaupajta Señorman jaywarqanku, chaymantataj noqaykuman Diospa munasqanman jina.

⁶Chaymanta Titota nerqayku, imaynatachus pay qallarerqa ñaupajta ofrendata oqhariyta, ajinallatataj pay tukuchichun kay khuyakuy ruwayta qankuna ukhupi.

⁷Chayrayku qankunajta tukuy ima tiyapusunkichej feniykichejpi, allin parlaypi, yachaykunaspi, tukuy imapi k'uchiyaspa, noqaykuta munakuspa, ajinata ashkhayaychej kay khuyakuypi.

⁸Mana kaytaqa kamachej jinachu niykichej, imaraykuchus munani yachanaykichejta imaynatachus ujkuna ruwanku tukuy sonqo. Ajinataj kachun qankunajtapis munakuyniykichejqa.

⁹Ña rejsinkichejña Señorninchej Jesucristoj khuyakuyninta. Qhapaj kashaspa qankunata munakuspa wajchaman tukorqa. Chay wajcha kayninwantaj qankunata qhapajyachisorqachej.

¹⁰Qankuna allin kanaykichejta munaspa yuyaychaykichej, imaraykuchus kayqa qankunapaj allin. Qayna watamantapachaña ruwayta qallarerqankichej, mana ruwayta munaspallachu, astawanqa tukuy sonqo.

¹¹Kunanqa ruwallaychejpuni tukuchinaykichejkama, imaynatachus munarqankichej usqhayta ruwayta, ajinallatataj junt'apuychej kapususqaykichejman jina.

¹²Sichus uj runa munanman cheqamanta qoyta chayqa, Dios jap'enqa chay ofrendata tiyapusqanman jina. Payqa mana mañanchu mana imayojmantaqa.

¹³Kaywanqa mana niytachu munaykichej, wakin tukuy imayoj kanankuta, qankunarí mana imayoj.

¹⁴Astawanqa niyta munani, kay tiempopi uj rejlla kanampaj, ashkha tiyapuyniyojkuna qoychej pisichikojman, uj tiempotaj paykunajtapis tiyapojtin qosonqachej qankunajtapis pisejtin, ajinapi uj rejlla kanampaj.

¹⁵Escribisqapi nishan: Ashkhata oqharejpataqa mana puchorqachu; pisita oqharejpatapis nillataj piserqachu.

¹⁶Diosman graciasta qoni, noqaman jinallataj Titomampis sonqonman churasqanmanta, qankunamanta yuyanampaj.

¹⁷Paytaj sonqochasqayta uyariwarqa. Payqa maytapuni munakusunkichej, kunantaj jamun qankunata watukoj paypa munayninman jina.

¹⁸Titotawan kachamusqayku uj hermanota, pimantachus allinta parlanku tukuy iglesiaspi, sumajta llank'asqanmanta evangeliota willaspa.

¹⁹Manataj chayllachu karqa, astawanqa tukuy iglesias kay hermanollatataj ajllarqanku noqaykuwan rinampaj; qolqeta apaspa maychus kajta rak'inaykupaj Señorpa kusiynimpaj, rikuchinaykupajtaj khuyakoj sonqoyoj kasqaykichejta.

²⁰Ajinata munayku ama pipis rimanankupaj kay ashkha qolqeta tantasqaykumanta.

²¹Astawantaj munashayku kay imasta ruwayta cheqanta, mana Señorpa ñaupaqellampichu, astawanqa runaspa ñaupaqempipis.

²²Paykunawan waj hermanota kachamullaykutaj. Sapa kuti rikuyku payqa tukuy imapi k'uchi kasqanta. Kunanqa pay astawanraj, qankunapi maytapuni yuyashan mana iskayrayaspa.

²³Pipis Titomanta tapukunman pichus pay kasqanta chayqa, qankuna willaychej kausaqey kasqanta, yanapawajniy, qankunata yanapanaykupaj. Waj hermanosmanta tapukojtinkutaj, willaychej, iglesiamanta hermanos kachamusqas kasqankuta, Cristoj kusiynimpaj.

²⁴Chayrayku iglesias yachanankupaj, qankuna rikuchiychej munakuyniykichejta, jinallataj noqaykumantapis rikuchiychej may kusiyniyoj kasqaykuta qankunamanta.