Read Quechua Bolivia DC Bible GÁLATAS 4 Bible Online

GÁLATAS 4 - Quechua Bolivia DC Bible bible

GÁLATAS 4

¹Chantá nillanitaj: Chayaqeta jap'ej, wawallaraj kashaspaqa, mana imapipis kamachimanta kurajchu, tukuy imamanta dueño kashaspapis.

²Chayaqeta jap'ej wawaqa, waqaychajkunaj, qhawajkunaj kamachimpi kashan, tatampa nisqan p'unchaykama.

³Ajinallataj noqaykupis wawas kashaspaqa kamachis karqayku, kay mundoj kamachisqasninta kasuspa.

⁴Chantá p'unchaykuna junt'akojtintaj, Dios kachamorqa Churinta, ley kamachishajtin, uj warmimanta nacikojta.

⁵Leypa kamachimpi kashajkunata kacharichinampaj, paypa wawasnin jinataj rejsisqas kanaykupaj.

⁶Wawasninña kajtiykichejtaj, Diospa Churimpa Espiritunta sonqoykichejman kachamorqa. Espiritutaj mañakun: Tatáy, nispa.

⁷Ajinaqa manaña kamachichu kanki, astawanqa Diospa wawan. Wawanña kanki chayri, Dios chayaqeta qosonqa [Cristonejta].

⁸Cheqamanta ñaupajta manaraj Diosta rejsishaspa, yupaycharqankichej mana kaj dioskunata.

⁹Kunanqa Diosta rejsishaspa, chayrí Diospa rejsisqasnin kaspa, imaraykutaj ujtawan mana kallpayoj, wajcha yachachiykunaman kutiripuyta munankichej kamachisnin jina?

¹⁰Qankunaqa waqaychankichej wakin p'unchaykunata, killasta, watasta ima.

¹¹Llakikuni yuyaspa qankuna ukhupi qhasipaj llank'asqayta.

¹²Mañakuykichej hermanos, noqa jina kanaykichejta. Noqapis qankuna jina karqani. Noqapajqa mana ima sajratapis ruwarqankichejchu.

¹³Qankunaqa yachankichej ñaupajta onqosqa kashaspa evangeliota willasqaykichejta.

¹⁴Ajina onqosqa kashajtiypis mana willachikuwarqankichejchu, nitaj qhesachawarqankichejchu, astawanqa wajyarikuwarqankichej Diospa angelninta jina; Cristo Jesuspis kayman karqa ajinata.

¹⁵Maytaj kunan chay jina kusiyniykichejri? Qankunamanta niyta atiyman, atiwajchejchus karqa chayqa, ñawiykichejtapis orqhokuspa qowankichejman karqa.

¹⁶Qankunaman cheqa kajta nisqayraykuchu contrarioykichej kani?

¹⁷Chay runasqa yachachiyta munasunkichej, manataj allimpajchu, manachayqa noqaykumanta t'aqayta munaspa, paykunata kasunaykichejpaj.

¹⁸Allimpuni ari tukuy sonqo kayta tukuy tiempo allin kaypi rikucheyqa, mana sajra yuyaywan kaspaqa; manataj qankunawan kashajtillaychu.

¹⁹Wawasníy, qankunarayku ujtawan ñak'arini nanaykunawan uj onqoj warmi jina; Cristo jina kanaykichejkama.

²⁰Munayman kunampacha qankunawan kayta, waj jinamantañataj qankunawan parlaspa. Manataj yachanichu imaynamantachus qankunawan parlayta.

²¹Niwaychej, qankuna leypa kamachimpi kayta munajkuna. Manachu leypa imatachus nisqanta uyarerqankichej?

²²Escribisqa kashan: Abrahampata iskay wawasnin karqa; ujnin kajqa kamachejpata, ujnintaj libre kajpata.

²³Kamachejpataqa aychaman jina nacerqa; libre kajpatataj Diospa nisqanman jina nacerqa.

²⁴Kaytaj niyta munan, kay iskay warmisqa iskay tratowan ninakun. Ujnin kajqa Sinaí orqomanta jamun, sutintaj Agar nisqa; paypa wawasnin kamachis karqanku.

²⁵Agarqa rijch'akun Sinaí orqoman, Arabiapi kashan chayman. Chaytaj niyta munan kay tiempomanta Jerusalén. Jerusalenqa wawasninwan kamachis kanku.

²⁶Pata kaj Jerusalenqa mamanchej. Chaytaj libre.

²⁷Escribisqa kashan: Kusikuy, mana nacichikoj warmi; jatunmanta qhaparispa kusikuy, nacichikoj warmej nanayninta mana rejsej. Sapan kaj warmeqa astawan ashkha wawasniyoj, qosayoj warmimanta nisqaqa.

²⁸Ajinaqa hermanos, qankuna Isaac jina, Diospa qosqayki nisqampa wawasnin kankichej.

²⁹Chaypacha aychaman jina nacejqa, Espirituman jina nacejta qhatiykacharqa. Kunampis jinallataj kashan.

³⁰Astawanqa ima nintaj escribisqapiri? Ajinata nin: Jawaman qharqoy kamachita wawantawan. Kamachej wawanqa, mana jap'enqachu librej wawanwan khuska.

³¹Ajinaqa, hermanos, mana kamachej wawasninchu kankichej, manachayqa librejta.