Read Quechua Bolivia DC Bible EFESIOS 2 Bible Online

EFESIOS 2 - Quechua Bolivia DC Bible bible

EFESIOS 2

¹Dios kausayta qosorqachej, pantaykunapi, juchasniykichejpi ima wañusqas kashajtiykichej.

²Chaykunapi qankunaqa ñaupajta purej kankichej, kay pachaj kamachisqanman jina kausaspa. Wayrapi kamachejpa atiyninman jina kausaj kankichej; chay espiritoqa kunan Diosta mana kasojkunata kamachishan.

³Chaykuna ukhupi tukuyninchej, chay p'unchaykunapi aychanchejpa sajra munaynimpi purej kanchej, aychaj munayninta, yuyaypa munayninta ima ruwaspa. Ajinata ruwaspa, noqanchejpis phiñakuywan jasut'inapaj jina karqanchej, chay wajkuna jina.

⁴Diosqa khuyakuypi qhapaj kaspa munakuwarqanchej chay jatun munakuyninwan.

⁵Juchasninchejpi wañusqasraj kashajtinchej, Diosqa Cristowan khuska kausayta qowarqanchej. Diospa khuyakuyninrayku salvasqas kankichej.

⁶Diosqa Cristo Jesustawan khuskata kausarichiwarqanchej, ajinallatataj janaj pachapi paywan tiyachiwarqanchej.

⁷Kayta ruwarqa, jamoj p'unchaykunapi qhapaj khuyakuyninta, munakuynintawan noqanchejpaj Cristo Jesuspi rikuchinampaj.

⁸Diospa khuyakuyninnejta ferayku salvasqas kankichej. Kaytaj mana qankunamantachu jamun, manachayqa Diospa regalon.

⁹Manataj ruwasqasraykuchu ama pipis jatunchakunampaj.

¹⁰Diospa ruwasqanmin kanchej. Chaytaqa Cristo Jesuspi ruwawarqanchej allinkunata ruwananchejpaj. Chaykunataqa Dios wakicherqa ñaupajmantaña, chaykunapi purinanchejpaj.

¹¹Chayrayku qankuna aychaman jina gentiles kasqaykichejta yuyarikuychej, unayqa mana circuncidasqas sutichasqas kasqaykichejtawan. Ajinata sutichasorqachej makiwan aychapi circuncidasqas kajkuna.

¹²Chayrayku mana Cristoyojchu karqankichej, Israel llajtayoj kaymanta karunchasqas, Diospa qosqayki nisqan tratotapis mana rejsispa; mana suyayniyoj, mana Diosniyojtaj kay pachapi karqankichej.

¹³Kunanqa Cristo Jesuspi kashankichej, pikunachus ñaupajta karunchasqas karqankichej. Paypa yawarninraykutaj qayllachisqasña kankichej, imaraykuchus Cristomin sonqo tiyakuyniykichej. Chantá, gentilesmanta, judiosmantawan uj ayllullata ruwarqa, chay t'aqanachej chaupi perqata urmachispa.

¹⁵Cristo kikin aychapi chejninakuyta chinkacherqa, leypa kamachisqasninta ruwanapaj churasqasta ima. Pay kikin iskaynin laya runasta mosoj runaman tukucherqa. Ajinapi paykuna ukhupi sonqo samakuyta churaspa.

¹⁶Cristo cruzpi wañuyninwan iskaynin ayllusta, ujllaman tukuchispa, Dioswan allinyacherqa, chejninakuyninkuta chinkachispa.

¹⁷Pay jamorqa willaj mosoj willanasta allin kausakuymanta qankuna karupi kashajkunaman, pikunachus qayllapi kashajkunamampis.

¹⁸Paynejta judiospis, mana judiospis uj Espiritunejta Dios Tataman yaykusunchej.

¹⁹Ajinapi manaña waj llajtayoj jinachu kankichej, nitaj wajyarisqa jinachu; manachayqa uj llajtayojllaña kankichej ajllasqaswan, Diospa wasimpitaj wawasnin kankichej.

²⁰Qankuna apostolespa, profetaspa wakichisqanku patapi sayachisqas kankichej; chay kuraj kaj rumitaj kikin Jesucristo.

²¹Paypi chay sumaj ruwasqa waseqa wiñashan, Señornejta sumaj llimphuchasqa templo kanampaj.

²²Ajinallatataj qankunapis Cristowan khuska wasichasqas kankichej, Dios qankunapi Espiritunejta tiyakunampaj.