Read Quechua Bolivia DC Bible EFESIOS 4 Bible Online

EFESIOS 4 - Quechua Bolivia DC Bible bible

EFESIOS 4

¹Noqa Señorninchejrayku presochasqa kani. Mañaykichej allinta purinaykichejta Diospa wajyasqasnin jina, ajllasqasnin jinataj.

²Tukuyman k'umuykuspa, llamp'u sonqo kaywan purajmanta paciencianakuspa munakuypi kausakuychej.

³Espiritupi ujlla kayta, k'uchi kaywan waqaychaychej, sonqo tiyakuytawan khuska.

⁴Tiyan uj cuerpolla, uj Espiritulla, imaynatachus uj suyayllaman wajyasorqachej, ajinata.

⁵Tiyallantaj uj Señorlla, uj fella, uj bautismolla.

⁶Uj Diosllataj tukuypa Tatan. Payqa kashan tukuypa patampi, tukuynejpi, tukuypitaj.

⁷Sapa ujta khuyakuwarqanchej, Cristoj qonanman jina.

⁸Chayrayku Escriturapi nishan: Pataman wicharerqa presochasqasta apaspa, runasmantaj regalosta qorqa.

⁹Wicharerqa nispaqa, manachu niyta munan pay ñaupajta jallp'aj aswan ukhunkama uraykusqanta?

¹⁰Pichus uraykamorqa, chayllataj janaj pachaj patanman wicharerqa tukuy mundoman junt'aykunampaj.

¹¹Pay kikillantaj churarqa wakinta apostolesta, wakinta profetasta, wakinta evangelistasta, wakinta michejkunata, wakintarí yachachejkunata, ajllasqas, ruwaypi allin wakichisqas kanankupaj, ajinapi Cristoj iglesian wiñanampaj; tukuyninchej ujllata creenanchejkama Diospa Churinta rejsinanchejpaj, cheqan runas kananchejpaj, Cristoj junt'aynimpa sayayninman chayananchejkama; amaña wawas jinachu kananchejpaj, waj yachachiykunawan wayrawan jina kayman jaqayman apaykachachikuspa. Chaykunataqa runakunalla wakichinku, misk'i parlaywan ch'aukiyaspa tojllawan jina pantachinankupaj.

¹⁵Chayrayku cheqa kajta qhatikuspa, munakuypi Cristowan khuska wiñana tukuy imapi; imaraykuchus Cristomin umaqa.

¹⁶Paynejta tukuy cuerpoqa allin wakichisqa kashan. Pay kikimpi tukuy iman sumaj t'inkisqa ankuswan ujllaman tukunku, yanapanakuspa maychus sapa uj ruwasqanman jina; sayankutaj munakuypi sayachinakuspa.

¹⁷Kayta ari niykichej, anchatapuni mañakuykichej Señorpa sutimpi; amaña wakin gentiles jina purinaykichejta. Paykunaqa qhasita yuyayninkuman jina purinku.

¹⁸Yuyayninku laqhayasqa kajtin, Diospi kay kausaymanta karunchasqas kanku, paykuna mana yachasqankurayku, rumi sonqostaj kasqankurayku.

¹⁹Paykuna p'enqakuyninkuta chinkachispa millay kausayman qokorqanku, tukuy ima ch'ichi kaj ruwaywan mana sayayta atispa.

²⁰Qankunarí, mana jinatachu Cristomanta yachakorqankichej. Cheqamantachus Jesusta uyarerqankichej yachakorqankichejtajchus cheqa kaj paypi kasqanman jina.

²²Ñaupa sajra kausayniykichejmanta, mauk'a runamantawan t'aqakuychej; imaraykuchus sajra munaynimpa atipasqan, ch'aukiyasqantaj.

²³Qankuna yuyayniykichejta sonqoykichejpi mosojyachikuychej.

²⁴Chay mosoj runamanta p'achawan jina p'achallikuychej; mayqenchus Diosman jina ruwasqa karqa, cheqan kaypi, llimphu kaypi, cheqa kaypitaj.

²⁵Chayrayku llullakuyta saqespa, sapa ujqa cheqata parlaychej runa masisniykichejwan; imaraykuchus ujkuna ujkunawan uj cuerpollamanta kanchej.

²⁶Phiñakuspaqa, ama juchallikuychejchu, nitaj phiñasqa kashajtiykichejpis inti yaykupuchunchu.

²⁷Nillataj supaytapis kasuychejchu.

²⁸Pichus suwajqa, amaña suwachunchu; manachayqa makinwan allin kajta llank'achun, mana kapuyniyojman imachus pisisqanta qonampaj.

²⁹Simiykichejmantapis ama ima sajra parlaykunapis llojsichunchu, manachayqa cheqan kajta parlaychej, uyarejkuna wiñanankupaj Diospa yanapayninwan.

³⁰Diospa Santo Espiritunta ama llakichiychejchu. Paywan sellowan jina kankichej salvación p'unchaypaj.

³¹Qankunamanta qhechukuychej tukuy jaya sonqowan kayta, phiñakuyta, k'araj phiñakuyta, qhaparqachayta, runaj contranta parlayta, tukuy sajra yuyaytawan.

³²Ujkuna ujkunawantaj k'achas kaychej, khuyakuyniyojtaj. Sapa uj juchasniykichejta perdonanakuspa, imaynatachus Diospis juchasniykichejta pampacharqa Cristopi, ajinata.