Read Quechua Bolivia DC Bible FILIPENSES 1 Bible Online

FILIPENSES 1 - Quechua Bolivia DC Bible bible

FILIPENSES 1

¹Pablo Timoteowan Jesucristoj kamachisnin, escribimuyku kay cartata, Cristo Jesuspi juchamanta tukuy t'aqasqasman, Filipos llajtapi kajkunaman, iglesiapi kurajkunaman, diaconosman ima.

²Khuyakuy, sonqo tiyakuytaj qankunawan kachun, Tatanchej Diosmanta Señor Jesucristomantawan.

³Sapa kuti qankunamanta yuyarikuspa, Diosniyman graciasta qonipuni.

⁴Diosmanta mañakuspaqa, kusikuywampuni tukuy qankunapaj mañani; khuska kausakorqanchej evangelioman jina, ñaupaj p'unchaymantapacha kunankama.

⁶Kay imasmanta yachaspataj, allin ruwayta qankunapi Dios qallarerqa. Payllataj tukuychanankama ruwallanqapuni Jesucristoj jamunan p'unchayninkama.

⁷Allimpuni noqapajqa, qankunamanta yuyanayqa; imaraykuchus sonqoypi jap'iykichej. Carcelpi kashajtiypis, evangeliota willashajtiypis tukuy qankuna noqawan khuska kusikorqankichej, Diospa khuyakuynimpi.

⁸Dios yachan imaynatachus tukuyniykichejta munakusqayta, Jesucristoj jatun munakuyninwan.

⁹Kaytataj mañani Diosmanta, munakuyniykichej astawan ashkhayanampaj, astawanqa yachaypi, tukuy ima rejsiypitaj.

¹⁰Aswan allin kajta ajllanaykichejpaj, cheqan sonqoyoj kanaykichejpaj, mana k'aminas Cristoj p'unchaynimpi kanaykichejpaj.

¹¹Cheqan ruwanaswan sumaj poqoyniyoj jina junt'asqa kaychej, Jesucristonejta, Dios jatunchasqa, yupaychasqataj kanampaj.

¹²Hermanos, munani yachanaykichejta imaschus noqapi kawasqanta. Chaykunataj uj yanapa karqanku, evangelio astawan ñaupajman rinampaj.

¹³Ajinapitaj yachanku preso kasqayta Cristorayku, palaciopi kaj soldadospis, wajkunapis yachallankutaj.

¹⁴Preso kasqayta yachaspataj yaqha tukuy hermanos, Señorpi sonqochakuspa sayarerqanku astawan parlanankupaj, Diospa palabranmanta mana manchachikuspa.

¹⁵Cheqamanta wakenqa Cristomanta willanku, qhawanakuspa, churanakuspataj; wakintaj sumaj sonqowan.

¹⁶Kaykuna ruwanku tukuy munakuywan, yachaspa chaypaj churasqa kasqayta evangelioj allinninta sayaykukunaypaj.

¹⁷Wakinkunataj Cristomanta willanku churanakuyta munaspa, mana allin sonqowanchu, preso kashajtiy astawan llakiyta yapanawankupaj.

¹⁸Kunan imataj tiyan? Cheqan sonqowampis manapis, Cristomanta willanku; chaymanta kusikuni. Qhepamampis astawan kusikullasajpuni.

¹⁹Noqa yachani kacharisqa kanayta, qankuna Diosmanta mañapushawankichej, Jesucristoj Espiritumpa yanapayninwan ima.

²⁰Munasqayman jina suyashani mana imapi p'enqaypi kanayta. Astawanqa tukuy sonqopuni suyashani rikuchisqa kananta cuerpoypi Cristoj may jatun kaynin, kausaypipis, chayri wañuypipis.

²¹Noqapajqa Cristomin kausayqa, wañuytaj ganancia.

²²Chaywampis kay cuerpoypi kausashaspa Señorpa ruwaynimpaj allin kanampaj kashani chayqa, mana yachanichu imatachus ajllanayta.

²³Chay iskayninmantaqa mana ajllayta atinichu; astawanqa munayman wañupuyta, rispa Cristowan kanaypaj. Chaytaj astawan sumaj noqapajqa.

²⁴Aychapi kashaspa qhepakunayqa, astawan allinraj kanman qankunarayku.

²⁵Kaypi sonqoyta churaspataj, cheqamanta yachani qhepakunayta qankunawan, yanapaspa allin kanaykichejpaj, feniykichejmanta kusikunaykichejpaj; noqawan mayta kusikunaykichejpaj Cristo Jesuspi, watejmanta rikuspa noqata qankuna ukhupi.

²⁷Munani ari allinta kausakunaykichejta, Cristoj evangelionman jina; ajinapi noqa watukoj jamojtiypis, chayri karupi kajtiypis, uyariyta munani qankuna sinch'is kasqaykichejta uj kikin espiritullapi, atipaspapuni uj yuyaylla evangeliopi feniykichej kasqanrayku.

²⁸Sajra runas churanakojtinku ama manchariychejchu. Chayqa señal jina paykuna chinkayman rishasqankumanta. Qankunapajtaj uj señal jinallataj kanqa salvasqas kasqaykichejmanta. Chaytaj Diosmanta jamun.

²⁹Chayrayku qankunaman qosqa kashan Cristorayku, mana paypi creenallaykichejtachu, astawanqa payrayku ñak'arinaykichej tiyan.

³⁰Qankunapis chay maqanakupi kashankichej imaynatachus noqatapis rikuwarqankichej maqanakojta, kunampis noqapi uyarishankichej maqanakushallasqaytapuni.