Read Quechua Bolivia DC Bible FILIPENSES 3 Bible Online

FILIPENSES 3 - Quechua Bolivia DC Bible bible

FILIPENSES 3

¹Kunanqa hermanos, kusikuychej Señorpi. Noqapajqa mana imachu escribimusqayqa kikin kikinta, imaraykuchus qankunapaj sumaj allin kasqanrayku.

²Ithirikuychej alqos kajkunamanta. Ithirikuychej sajra imasta ruwajkunamanta. Ithirikuychej khuhurachiyta munajkunamanta.

³Noqanchejqa cheqamanta circuncisionmanta kanchej, imaraykuchus Diosta yupaychanchej Espirituman jina; kusikunchejtaj Cristo Jesuspi kasqanchejmanta, manataj chay circuncisionkunaspichu confianchej.

⁴Noqaqa atiymampis mundoj imasnimpi confiakuyta. Pillapis kay mundoj imasnimpi confiakuyta yuyanman chayqa, noqaqa astawanraj confiakuyman.

⁵Nacikusqaymanta pusaj p'unchayninman circuncidasqa karqani. Israelitataj kani Benjamimpa ayllunmanta. Hebreospa ayllunmanta hebreo kani. Judiospa leyninman jinataj fariseo kani.

⁶Leypi anchata creespa, Cristoj iglesianta qhatiykachaspataj ñak'aricherqani. Leypa cheqan kayninta waqaychaypeqa mana k'amina karqani.

⁷Chay tukuy imasqa qhapajyanaypaj karqanku. Kunantaj chaykunata qhesachani Cristota munakusqayrayku.

⁸Cheqamanta tukuy imata chinkasqasta jina qhawani Señor Jesucristota allinta rejsisqayrayku. Paypa munakuyninraykutaj tukuy imata saqepuni. Chaykunataqa q'opata jina qhawani, Cristojta kanaypaj.

⁹Paywan kayta munani manaña leyman jinachu kausanaypaj, astawanqa Cristopi creespa. Chaytaj Diospa cheqan kayninmanta feman jina; chayrayku Cristota astawan rejsinaypaj kausarimuynimpi, ferayku payman rijch'akunaypaj wañuynimpi, suyashanitaj imaynamantapis kausarimuyta wañusqakunamanta.

¹²Manaraj chaykunata taripanichu, nitaj cheqan runa kaymampis chayanirajchu; astawanqa ñaupajman rishani, ichapis taripayman nispa, imaynatachus Cristo Jesuswan ñaupajpi taripachikorqani, ajinata.

¹³Hermanos, mana ninichu noqa kikiy taripasqaytaña; astawanrí kay imasta ruwani qonqapuspa qhepapi kajmanta, taripanaypaj ñaupajpi kajta.

¹⁴Ñaupajman rishani chayanaman chayanaykama t'inkata jap'inaypaj, patamanta Dios wajyawarqa Cristo Jesuspi, chayman.

¹⁵Tukuy fepi allin wiñasqa kajkunaqa uj rejllata yuyana. Sichus waj jinata yuyawajchej chayqa, chaytapis sut'inchasonqachej Diosllataj.

¹⁶Kayman chayamuspataj uj yuyaylla, uj kamachiyllapitaj kausanachej.

¹⁷Hermanos, noqamanta yachakuychej, qhawaychejtaj pikunachus noqayku jina kausajkunata yachachisqaykuman jina.

¹⁸Ña niykichejña ashkha kutista. Kunampis waqayniywan nillaykichejtaj Cristoj cruznimpa enemigosnin ashkhas kasqankuta.

¹⁹Paykunaj tukukuynenqa wañuy, diosninkutaj wijsanku. P'enqaykunata ruwaspa kusikunku. Paykunaqa kay pachapi kajkunallata mask'ashanku.

²⁰Llajtanchejqa janaj pachapi kashan, maymantachus suyashanchej. Salvadorninchej Señor Jesucristo jamunanta.

²¹Paytaj kay k'umuykukusqa cuerponchejta waj jinaman tukuchenqa, kikin paypa lliphipej cuerponman jina. Chay kikin atiyllawantaj tukuy imasta kamachiynimpa uranman churanqa.