Read Quechua Bolivia DC Bible COLOSENSES 2 Bible Online

COLOSENSES 2 - Quechua Bolivia DC Bible bible

COLOSENSES 2

¹Yachanaykichejta munani may chhikatapunichus qankunarayku llakikusqayta; jinallatataj Laodiceapi kajkunarayku, uyayta manaraj rejsejkunaraykupis.

²Munani sonqosninku kallpachasqas kanankuta, munakuypi ujchasqas, qhapaj suyaytataj tarinankupaj. Ajinamanta Diospa pakasqa yachayninta rejsinankupaj. Chaytaj Cristo.

³Cristopi yachaypa, yuyaypatawan qhapaj kaynin pakasqa kashan.

⁴Kayta nini mana pipis k'acha palabraswan pantachisunaykichejpaj, imaraykuchus manapis qankunawanchu kashani. Chaywampis, espiritupi qankunawan khuska kashani, kusikuspa allin ruwasqaykichejta qhawaspa, Cristopi feniykichejwan sinch'ita sayasqaykichejta ima.

⁶Chayrayku imaynatachus Señor Jesucristota sonqoykichejpi jap'erqankichej, chayman jina paywan puriychej.

⁷Paypi saphinchasqas, allinchasqastaj kaspa, fepi wiñaychej, yachachisqas kasqaykichejman jina, Diosman ashkha graciasta qospa.

⁸Allinta qhawakuychej, pajtataj pipis pantachisunkichejman llulla yachachiykunawan, qhasi mana kaj parlaykunawan ima. Paykunaqa mana Cristoj nisqantachu yachachinku, manachayqa ñaupa runaj yachachiyninman jinalla, kay mundopi runas yuyaychasqankuman jina.

⁹Kikin Diosqa Cristopi junt'a kashan.

¹⁰Cristopi tukuy ima tiyapusunkichej. Pay tukuy kamachejkunaj, jatun atiyniyojkunaj umantaj kasqanrayku.

¹¹Jinallataj paypi circuncidasqas kankichej, mana makiwan ruwasqawanchu. Qankuna aychaj juchanta wijch'orqankichejña, Cristopi circuncidachikuspa.

¹²Bautizachikuspaqa Cristowan p'ampasqas karqankichej. Jinallatataj paywan kausarimorqankichej, creespa Dios atiyninwan wañusqakunaj chaupinmanta payta kausarichimusqanta.

¹³Qankunatapis juchapi wañusqas kashajtiykichej, aychaykichejpitaj manaraj circuncidasqas kashajtiykichej, Dios paytawan khuska kausarichimusorqachej, tukuy juchasniykichejta pampachaspa.

¹⁴Imachus leypi contranchejpi escribisqa karqa chayta, Dios yanqhayachispa picharparerqa. Chayta qhechuspataj cruzman clavaykorqa.

¹⁵Cristo cruzpi wañuspa atiparqa kamachejkunata, atiyniyojkunata ima, tukuypa rikunanta paykunata p'enqaypi rikhurichispa.

¹⁶Chayrayku ama pipis qankunata juchachasuchunchu mikhunamanta, ujyanamanta, chayri wata fiestamanta, killa fiestamanta, samarina p'unchaymanta ima.

¹⁷Chaykunaqa tukuy jamoj imaspa llanthun, iglesiataj Cristoj cuerpon.

¹⁸Ama pipis t'inkaykichejta qhechusuchunchu llamp'u sonqoman tukuspa, angelestataj yupaychaspa. Paykunaqa mana rikusqallankuman sat'ikunku, qhasi mana kajta runaykachankutaj sajra yuyayninkuman jina.

¹⁹Paykunaqa Cristota mana kasunkuchu. Cristoqa uma kasqanrayku iglesiata tukuy cuerponta jina mikhuchin, ankuswan t'inkispataj wiñachin Dios wiñayta qosqanman jina.

²⁰Qankuna Cristowan wañorqankichejña, kay pachapi runakunaj yachachiyninta qhechuspa. Imaraykutaj chantá, mundojtapis kawajchej jina kamachisqasninta kasunkichejri?

²¹Chay kamachiykunaqa kaykuna kanku: Ama jap'iychu, ama llamiychu, nitaj llujchillaypischu.

²²Cheqamanta tukuy kaykuna usuman jina chinkanan tiyan. Chaykunaqa runaspa kamachiynillan, yachachiynillan ima.

²³Cheqamanta chaykunaqa cheqa yachayman rijch'akunku, Diosta yupaychaypi, sapa ujpa munayninman jina, llamp'u sonqo kaypi, aychata sinch'ita ñak'arichiypi ima. Chaywampis, chaykunaqa mana atipayta atinkuchu aychaj munapayayninta.