Read Quechua Bolivia DC Bible COLOSENSES 4 Bible Online

COLOSENSES 4 - Quechua Bolivia DC Bible bible

COLOSENSES 4

¹Patrones, kamachisniykichejwan cheqata, cheqan kajtataj ruwaychej, yachaspa qankunapis janaj pachapi patronniyoj kasqaykichejta.

²Mana sayk'uyta Diosmanta mañakuychej, mana puñuspataj qhawaychej graciasta qospa.

³Noqaykupajpis mañapuwayku, Señor punkuta kicharinampaj palabranta willanaykupaj, rejsichinaykupajtaj Cristoj pakasqa yachayninta. Payrayku noqapis presochasqa kashani.

⁴Mañapuwaychej payta sut'ita rejsichinaypaj, maychus kajta parlaspa.

⁵Allin yachaywan puriychej mana creejkunawan, ama tiempota usuchispa.

⁶K'acha misk'i simiwan parlaychej, kachiwan kachinchasqata jina. Chaymantaqa yachaychej imaynatachus sapa ujman kutichinaykichej kasqanta.

⁷Munasqa hermano Tíquico noqaykumanta allinta willasonqachej. Payqa allin yanapakoj, Señorpitaj kamachi masiy.

⁸Chaypaj payta qankunaman kachamuni, yachanampaj imaynachus kasqaykichejta, sonqoykichejtataj kallpachanampaj.

⁹Munasqa sumaj hermanonchej Onesimopis paywan jamushan; payqa qankunamanta ujniykichej. Paykuna willasonqachej imachus kaypi kasqanta.

¹⁰Aristarco napaykamusunkichej, pay noqawan presochasqa kashan. Jinallataj Marcospis, pichus Bernabéj ayllun, napaykamusunkichej, imaraykuchus paymanta kamachisqaña kankichej. Sichus qankunajman jamonqa chayqa, allinta payta wajyarikuychej.

¹¹Jesús sutichasqa Justopis napaykamusunkichej. Paykunalla circuncisionmanta kajkuna Diospa reinonmanta willayta yanapawanku, sonqochawankutaj.

¹²Qankunamanta ujnin kaj, Cristoj kamachin Epafras napaykamusunkichej. Payqa Diosmanta mañashampuni qankunapaj sumajta sayanaykichejpaj, Diospa tukuy munaynimpitaj allinchasqas, junt'asqastaj kanaykichejpaj.

¹³Noqa yachani Epafrasqa qankunapaj Diosmanta mañakusqanta; jinallataj Laodiceapi kajkunapaj, Hierapolispi kajkunapajwan.

¹⁴Munasqa jampej Lucasqa Demaspiwan napaykamusunki chej.

¹⁵Laodiceapi kaj hermanosman napaykuychej, Ninfasman, wasimpi kaj iglesiamanwan.

¹⁶Qankuna kay cartata leeytawan, Laodiceaman apachiychej; Laodiceaman escibisqa cartata apachimojtinkutaj qankunapis leellaychejtaj.

¹⁷Arquipoman niychej: Señorpa nisusqanta ruwanaykipaj, allinta junt'ay.

¹⁸Noqa Pablo, makiywan escribimuykichej kay napaykuykunata. Carcelpi wisq'asqa kasqaymanta yuyarikuychej. Diospa khuyakuynin qankunawan kachun. Amén.