Read Quechua Bolivia DC Bible JOSUÉ 11 Bible Online

JOSUÉ 11 - Quechua Bolivia DC Bible bible

JOSUÉ 11

¹Hazormanta rey Jabintaj chayta yachaspa, Madón rey Jobabman willachimorqa, jinallataj Simrón reyman, Acsaf reyman ima trato ruwanankupaj.

²Chanta willachimullarqataj wichaynej orqospi kasharqanku chay reykunaman, Cineret uraynejpi Arabapi kajkunaman, Ura pampaspi kajkunaman, Dormanta inti chinkaykuynin jallp'aspi tiyakojkunaman, inti llojsimuynejpi tiyaj cananeosman, inti yaykuynejpi kajkunaman, amorreosman, heteosman, fereseosman, orqo kinraykunapi tiyakoj jebuseosman, Mizpa jallp'api Hermón orqo k'uchupi tiyakoj heveosman ima ujllaman tantakuspa tratota ruwanankupaj.

⁴Tukuy kay reykunataj llojsiykamorqanku mar qocha t'iyu jina, may chhika soldadosninkuwan, may chhika caballosninkuwan, caballospa qhatatinan carrosninkuwan ima.

⁵Tukuy kay reyes ujllaman tantaykukuspa, Merom yaku chimpapi jarakorqanku, tukuyninku israelitaswan maqanakunankupaj.

⁶Señortaj Josueman nerqa: Ama paykunamantaqa manchachikuychu, noqa ruwasaj q'aya kay horasta tukuyninku wañusqas urmanankuta ñaupaqeykichejman. Qantaj caballosninkoj chakisninta p'akiranki, chay maqanakunanku carrosninkutataj ninawan kanaykunki.

⁷Chaymantá Josueqa tukuy soldadosninwan khuska, kaymanta jinalla ujllata juyñaykorqanku chay runaswan maqanakoj Merom yaku chimpapi kashajtinku.

⁸Señortaj Israelitaspa makisninman jaywarqa; israelitastaj wañuracherqanku, wakintataj qhatikorqanku Sidón jatun llajtakama, chaymanta Misrefot-maimkama, inti llojsimuypi Mispa pampakama, mana ujniyojta tukuchinankukama.

⁹Josueqa Señorpa kamachisqanman jina junt'arqa: Caballospa chakisninta p'akirarqa, jinallataj caballospa qhatatinan carrostapis ninawan kanaykorqa.

¹⁰Chaymanta kutispataj Hazor llajtaman junt'aykorqanku, maypichus tratota ruwarqanku chayman; rey Jabintapis chaypi wañucherqanku. Ñaupajta chay llajtaqa kasqa tukuy reyesta yuyaychaj.

¹¹Chay llajta ukhupi kajkunatataj mana ujniyojta wañuracherqanku, imaschus kajtapis tukuyninta t'unaykorqanku. Jinaytawantaj Hazor llajtataqa ninawan kanaykorqanku.

¹²Kikillantataj Josueqa ruwarqa chay tukuynejmanta tantakamoj reyespa llajtasnintapis, jinallatataj reyesnintapis espadawan t'ojsispa wañuracherqa, imasninkuchus karqa chaykunatapis t'unaykorqa, Señorpa kamachin Moisés kamachisqanman jina.

¹³Chaywampis israelitasqa tukuy loma puntaspi kaj llajtastaqa mana ruphacherqankuchu; Hazor llajtallata Josueqa ninawan kanaykorqa.

¹⁴Chay llajtaspi tiyakojkunataqa tukuyninta espadawan mana ujniyojta israelitasqa wañuracherqanku; imasninkuchus kajtawan, uywasnillankutawan paykunaqa jap'ikaporqanku.

¹⁵Imaynatachus Señorqa kamachin Moisesman nerqa, kikillantataj Moisesqa Josueman kamacherqa. Ajinata Josueqa kikinta ruwarqa mana pantaspa imaynatachus Señorqa Moisesman kamachisqanman jina.

¹⁶Jinamanta Josueqa tukuy chay jallp'asta jap'erqa, orqo jallp'asta, tukuy Neguev jallp'asta, tukuy Gosén jallp'asta, pampa jallp'asninta, Jordán vallesta, tukuy Israel orqosta chay pampa jallp'asninta ima.

¹⁷Chaykunaqa karqa Halac orqomantapacha, Seirman wicharejmanta, Líbano pampapi Baal-gadmanta, Hermón orqo kinraymantapacha. Josueqa chay jallp'asmanta reyesta jap'ispa wañuracherqa.

¹⁸Josueqa unayta maqanakorqa chay reyeswan.

¹⁹Chay cheqasmanta kajkunaqa ni mayqen llajtas Israelitaswan uj tratota ruwarqankuchu. Gabaompi tiyakoj heveoslla chay jina tratota ruwarqanku; chaymanta kaj chhikataqa maqaspallapuni Josueqa qhechorqa.

²⁰Imaraykuchus Señorpuni chay llaytayoj runaspa sonqosninta rumiyacherqa, israelitasman sumajta ch'ajwapi sayaykunankupaj, jinamanta atipaspa chinkachinankupaj mana khuyakuspa, imaynatachus Señorqa Moisesman kamachisqanman jina.

²¹Chaypachallataj Josueqa jamuytawan Hebrón orqopi tiyakoj anaquitaspa llajtasninta t'unaykorqa, chaymantaqa Debir llajtata, Anab llajtata, Judá orqospi tiyajkunata, Israel orqospi kajkunata ima. Ajinata Josueqa runasnintinta, llajtasnintinta chinkaricherqa.

²²Ajinamanta ni uj anaquitapis Israel jallp'aspi qhepakorqankuchu. Wakin anaquitaslla qhepakorqanku Gazapi, Gatpi, Asdodpi imalla.

²³Ajinata Josueqa chay tukuy jallp'asta jap'ikaporqa, imaynatachus Moisesman Señor kamachisqanman jina. Chaymantataj israelitasman, mashkha aylluschus kasqankuman jina chayaqenku kanampaj rak'irarqa. Chay jallp'apitaj manaña ima ch'ajwapis karqachu.