Read Quechua Bolivia DC Bible JOSUÉ 17 Bible Online

JOSUÉ 17 - Quechua Bolivia DC Bible bible

JOSUÉ 17

¹Joséj kuraj kaj wawan Manasespa ayllumpajñataj jallp'ata jap'inampaj suerteta choqarqanku. Manasespa kuraj kaj wawanqa karqa Maquir, paytaj Galaadpa tatan karqa sumajta maqanakoj runa; paypajtaj Galaadwan, Basanwan jallp'a karqa.

²Chaymanta Manasespa wakin wawasnimpajñataj suertesta choqarqanku mashkhachus kasqankuman jina, chaytaj kay jina karqa: Abiezerpa wawasnimpaj, Helecpa wawasnimpaj, Asrielpa wawasnimpaj, Siquempa wawasnimpaj, Heferpa wawasnimpaj, Semidaj wawasnimpaj ima. Kaykuna karqanku Manasespa qhari wawasnin, Joséj allchhisnin, sapa aylloj tatasnin.

³Zelofehadqa karqa Heferpa wawan, Galaadpa allchhin, Galaadtaj Maquirpa wawan Manasespa allchhin; paypata mana qhari wawasnin karqachu, manchayqa warmi wawasnillan; sutisnintaj karqanku: Maala, Noa, Hogla, Milca, Tirsa ima.

⁴Paykuna rerqanku sacerdote Eleazarman, Numpa wawan Josuemanwan, kurajkunaj ñaupaqenmanwan; chaypitaj paykunaman nerqanku: Señorqa Moisesman kamacherqa chayaqeyku jallp'ata ayllusniykoj chaupimpi qonawaykuta, nispa. Josuetaj tatankoj ayllumpa chaypimpi chayaqenku jallp'ata paykunaman qoporqa Señorpa nisqanman jina.

⁵Ajinata Manasespa ayllonqa chunka cheqasta jap'erqa, chantá jap'illarqataj Galaadpi, Basampi ima Jordán mayoj wasampi.

⁶Chantaqa Manasespa warmi wawasnimpis ayllusninwan khuska jallp'ata Galaadpi jap'illarqankutaj, chaywampis Galaad jallp'aqa Manasespa qhari wawasnimpata karqa.

⁷Manasespa jallp'anqa karqa Asermanta Micmetatkama, chaytaj karqa Siquem nisqa chimpampi. Uranejmantaj karqa Tapuapi tiyakojkunajkama.

⁸Tapua jallp'aqa Manasespata karqa, chay Tapuaqa Manasespa mojonninwan tinkuypi karqa, chay niyta munan chaynejqa Efraimpa ayllumpa jallp'an karqa.

⁹Chay mojonqa uraynejman karqa Caná wayq'okama. Efraimpa llajtasnenqa, Manasespa llajtasninwan khuskallataj karqa. Manasespa mojonnenqa janajnejman karqa chay wayq'oj janajninkama, mar qochaman llojsishan chaynintin.

¹⁰Efraimpata karqa uraynejman, Manasespatataj wichaynejman mojonninkutaj mar qochamanta karqa, wichaynejmanqa Aserpa jallp'asninwan tinkorqa, inti llojsimuynejmantaj Isacarpa jallp'anwan.

¹¹Isacarpipis Manasespa jallp'anqa kallarqataj, chanta Aserpi ima. Chaykunataj karqanku: Bet-sean, ranchosnin ima, Ibleam ranchosnin ima, Dor, ranchosnintin, Endor, ranchosnintin, Taacnac ranchosnintin, Meguido, ranchosnintin, kinsantin provinciasnintin.

¹²Manasespa ayllonqa mana chaypi tiyakojkunata qharqoyta mana aterqachu, cananeotaqa manapuni chaynejmanta qharqoyta aterqachu.

¹³Israelitas sumaj wakichisqa rispa kamacherqanku cananeosqa impuestota paganankuta, chaywampis manapuni chay jallp'amanta wich'orqankuchu, kikimpi qhepakorqanku.

¹⁴Joséj ayllunmanta kajkuna Josueman parlarqanku: Imajtintaj chayaqeykuta suerteta choqaspa uj cheqallapi jallp'ata qowaykurí, noqayku chay chhikan ayllu kashajtiykuri? Imaraykuchus Señorqa kunankama ashkha imasta qowanchej.

¹⁵Josuetaj kuticherqa: Sichus qankuna ashkha kankichej chayqa, monteman wichariychej, chaypitaj sach'asta urmachiychej ferezeospa jallp'ampi, jinallataj refaitaspapipis.

¹⁶Paykunataj nerqanku: Chay sach'a monteqa cheqamanta mana tukuyniykupaj jinachu. Chay pampasnimpi tiyaj cananeospataqa tiyapun fierromanta qhatatina carrosninku, jinallataj Bet-seampi kajkunajta, chaymantaqa Jezreel vallepi tiyajkunajtapis.

¹⁷Josuetaj Joséj ayllun Efraín aylluman, Manasés ayllumanwan nerqa: Qankunaqa cheqamanta ashkha, atiyniyojtaj kankichej, chaynejta qankunapajqa mana uj chhikallanchu jallp'aqa kanan tiyan;

¹⁸chay sach'arara orqosnintin qankunajta kanan tiyan, chay sach'astaqa qankuna urmachillankichej, jap'ikuychejtaj maymantachus mojonesnin kashan chaymantapacha. Chaypi tiyaj cananeostaqa qankuna wijch'unkichej, mana imananchu fierro carrosniyoj kasqankoqa, nitaj may jina kallpayoj kasqankupis.