Read Quechua Bolivia DC Bible JOSUÉ 18 Bible Online

JOSUÉ 18 - Quechua Bolivia DC Bible bible

JOSUÉ 18

¹Tukuy israelitas Silo nisqapi tantakorqanku, tukuy jallp'asta jap'isqankumantaña, chaypi Dioswan tinkukuna toldota oqharinankupaj.

²Chaywampis qanchis ayllusraj israelitasmanta qhepakorqanku manaraj chayaqenku jallp'asta jap'ispa.

³Chaypitaj Josueqa israelitasman nerqa: Imata suyankichej ñaupa tatasniykichejpa Señor Diosnin jallp'asta qosusqaykichejta mana usqhayta jap'inaykichejpajri?

⁴Sapa ayllumanta kinsa qharista ajllaychej, paykunata kachanaypaj, chay jallp'asta qhawamunankupaj, maykunaspichus chayaqesninku kasqanta, kutimuspataj willawachunku.

⁵Chay qharistaj chay jallp'asta qanchisman t'aqamonqanku; uranejpi Judáj jallp'allanta saqeponqanku, patanejpitaj Joséj ayllumpa kaj jallp'asta.

⁶Chanta chay jallp'asta qanchisman t'aqaspaña, jamuspa imaynachus kasqanta willawajtinku, noqa suerteta choqasaj Señor Diosninchejpa ñaupaqempi.

⁷Levitasmanrí qankunaj chaupiykichejpi mana jallp'aqa chayanchu, paykunaj chayaqenkoqa Diospaj sacerdotesnin kaylla. Chantá Gad aylluwan Rubén aylluwan, Manasespa khuskan ayllunwanqa ñapis chayaqenku jallp'asta jap'ikapunkuña, Jordán mayoj chimpan inti llojsimuynimpi, chaytataj Señorpa kamachin Moisesña rak'erqa.

⁸Chay jallp'asta qhawamoj rej runastaj, wakichikorqankupacha, Josuetaj paykunata kacharqa: Kunanqa chay tukuynin jallp'asta rispa qhawamuychej mojonesta churaspa; chaymantataj kutimuspa willawankichej Silo nisqapi Señorpa ñaupaqempi noqa suerteta choqanaypaj.

⁹Chay runastaj rispa chay jallp'asta qhawamuspa mojonesta churamorqanku, qelqaspa churarqanku llajtasta qanchisman t'aqasqankuta; chaymantataj kutimorqanku Silo nisqapi Josué kasharqa chayman.

¹⁰Josuetaj Silo nisqapi Señorpa ñaupaqempi suertesta choqaspa israelitasman chay jallp'asta rak'irarqa, imaynatachus t'aqamusqankuman jina.

¹¹Benjamimpa ayllunman mashkhachus kasqankuman jina suertepi jallp'aqa chayarqa, Judáj jallp'anwan, Joséj jallp'anwan chaupipi.

¹²Chay jallp'aj mojonnenqa patanejman Jordán mayumantapacha karqa, chaymanta wicharerqa Jericój janajninman; chaytaj wicharillarqapuni orqosnejta inti yaykuynejman, chaymantá rerqa Bet-aven ch'in pampanejman.

¹³Chaymanta rerqa Luz nisqa chaynejman, jinamanta Luz nisqa llajtaj urannejta rerqa, chayqa kashan Betel, chaymantaqa uraykorqa Atarot-adarman, Bet-horompa ura chimpampi kashan chay orqonnejta.

¹⁴Chaymanta muyurimorqa inti chinkaykuynejta, uraynejpi Bet-horón nisqa chimpampi kashan chay orqoj ñaupaqenta; chaymantaqa Quiriat-baalninta llojsimorqa, chayqa karqa Quiriat-jearim. Chay llajtaqa Judáj ayllumpata karqa. Chantapis chayqa inti chinkaykuypiña karqa.

¹⁵Uranejman mojonnenqa qallarikorqa Quiriat-jearinmanta, inti yaykuy cheqamanta Neftoaj yaku juturisninkama.

¹⁶Chaymanta uraykorqa Ben-hinom vallej chimpampi kaj orqoj tukukuyninkama, chayqa kashan Refaim vallej patannejpi. Chaymantaqa uraykorqa Hinom valleman, chaymanta Jebus wichaypa urannejman, chayta rillarqapuni En-rogel yaku juturikama.

¹⁷Chaymantaqa kutirimorqa patanejta, En-semesmantaj llojserqa, jaqaymantataj rerqa Gelilotman, chaytaj kashan Adumín wichaypa chimpampi, chaymanta uraykorqa Bohán Ben-Rubén nisqa rumikama.

¹⁸Chaymantaqa Jordán mayoj chimpan pata wichaynejta rerqa, chaymantataj Jordankama uraykorqa.

¹⁹Chaymanta rerqa Bet-hoglaj patannejman, chaymantaqa tukukorqa K'ara Qochaj patannej bahiapi, maynejpichus Jordán mayu tinkushan, chaypi. Chay karqa uraman mojonqa.

²⁰Inti llojsimuymanta mojonqa Jordán mayu karqa. Kay karqa Benjamín aylloj chayaqe jallp'an mashkhachus kasqankuman jina, muyuynimpi mojonesnimpis.

²¹Benjamín aylluman chayasqan llajtasqa, kaykuna karqanku: Jericó, Bet-hogla, Emec-casis, Bet-arabá, Zemaraím, Betel, Avin, Pará, Ofra, Quefar-haamoni, Ofni, Geba ima. Chay karqa chunka iskayniyoj llajtas ranchosnintin. Chanta kallarqataj, Gabaón, Ramá, Beerot, Mizpa, Cafira, Mozah, Requem, Irpeel, Tarala, Zela, Elef, Jebús, chayqa Jerusalén, Gabaa, Quiriat ima. Chay karqa chunka tawayoj llajtas ranchosnintin. Kaymin karqa Benjamimpa chayaqe jallp'anqa mashkhachus kasqankuman jina.