Read Quechua Bolivia DC Bible JOSUÉ 24 Bible Online

JOSUÉ 24 - Quechua Bolivia DC Bible bible

JOSUÉ 24

¹Josueqa tukuy Israel ayllusta Siquem nisqapi tantacherqa, chaypitaj wajyarqa kuraj runasta, kurajkunata, cheqanchajkunata, soldadosta kamachejkunata ima, Señorpa ñaupaqempi.

²Josuetaj tukuynin israelitasman nerqa: Kay jinata israelitaspa Señor Diosnenqa nimuwanchej: Unayqa ñaupa tatasniykichej Taré, chanta wawasnin Abraham, Nacor imaqa, Eufrates mayu cantopi tiyakorqanku; chaypitaj waj dioskunata yupaycharqanku.

³Noqaqa ñaupa tataykichej Abrahamta chay mayu cantomanta pusamuspa kay tukuynin Canaán jallp'api puricherqani. Chaypacha payta miracherqani, ñaupajta Isaac wawanta qospa, Isaacmantaj iskaynin wawasnin Jacobta, Esautawan qospa. Esaumanqa qorqani Seir orqo jallp'asta, chaypi tiyakunampaj. Jacobtajrí wawasninwan Egiptoman riporqa.

⁵Chaymantaj chaypi kashajtinku Moisestawan Aarontawan kacharqani. Chaypachataj egipciostaqa wañuywan jasut'erqani, chay chaupinkumanta qankunata orqhomunaykama.

⁶Chay ñaupa tatasniykichejta Egiptomanta orqhomusqaytawan, mar qochamanña chayamusqankutawan, egipciosqa qhatiykamorqanku paykunata Puka mar qochakama, caballospa qhatatinan carrospi, caballospi ima.

⁷Ñaupa tatasniykichej Señormanta qhaparikojtinku, laqhayaykucherqani egipcioswan qankunawan kasharqankichej chay chaupita; patankumantaj mar qochata kachaykorqani, chaytaj ujllata paykunata p'ampaykorqa. Qankunataj rikorqankichej imastachus Egiptopi ruwasqayta. Chay qhepatataj qankunaqa unayta ch'in pampaspi purerqankichej.

⁸Chaymantataj noqaqa amorreospa jallp'anman pusamorqaykichej, pikunachus Jordán mayu chimpapi tiyakorqanku chayman. Paykunataj qankunawan maqanakorqanku, noqataj paykunata makisniykichejman churarqani, qankunataj paykunataqa atiparqankichej, jallp'asninkutataj jap'ikorqankichej. Ajinata qhawashajtiykichej noqaqa paykunata chinkacherqani.

⁹Chaymantaqa moabitaspa reynin Ziporpa wawan Balacñataj qankunawan maqanakoj llojsimorqa. Paytaj Beorpa wawan Balaamta wajyachimorqa, qankunata maldicichinampaj.

¹⁰Noqataj Balaamwanqa mana maldicicherqaykichejchu, manachayqa bendicisorqachej. Ajinata noqaqa qankunata waqaycharqaykichej.

¹¹Chaymantataj qankunaqa Jordán mayuta chimpamorqankichej, jamorqankichejtaj Jericokama. Chay llajtayojkunataj qankunawan maqanakorqanku, chaykunataj karqanku: Amorreos, fereseos, cananeos, heteos, gergeseos, heveos, jebuseos ima. Chaykunata noqaqa makisniykichejman churarqani.

¹²Chay iskaynin reyesta qankunaqa mana wañucherqankichejchu espadawan, k'aspi flechaykichejwampis. Manachayqa noqa kachamorqani ñaupaqeykichejta uj manchariyta, chayrayku paykunaqa manaraj chayashajtiykichej ñapis ayqerqankuña.

¹³Noqa qankunaman, mana llank'arqankichejchu chay jallp'asta qorqaykichej, mana qankunaj ruwasqaykichej llajtasta ima, chaypi qankunaqa tiyakorqankichej. Kunanqa chaykunapi tiyakushankichej, mikhushankichejtaj uvasta, aceitunasta ima mana qankunaj tarpusqaykichejmanta.

¹⁴Kunanqa Señorta manchachikuychejpuni, paypa nisqanta cheqamanta tukuy sonqo ruwaychej. Ñaupa tatasniykichej yupaycharqanku chay lantismanta t'aqakuychej, chaykunata paykunaqa yupaycharqanku Eufrates mayu cantopi, chanta Egiptopi ima. Qankunaqa Señortapuni yupaychaychej.

¹⁵Sichus Señorpa nisqanta mana ruwayta munankichejchu chayqa, kunampacha ajllakuychej pitachus yupaychanaykichejta; ñaupa tatasniykichej mayu chimpapi kashaspa yupaycharqanku chay dioskunatachu, chayri tiyakushankichej chaypi tiyarqanku chay amorreospa dioskunasninkutachu. Noqarí, tukuy aylluywampis Señortapuni yupaychasqayku.

¹⁶Chanta israelitastaj kuticherqanku: Chay jinataqa amapuni jayk'ajpis Señorqa saqewachuykuchu ari waj dioskunata yupaychajtaqa!

¹⁷Imaraykuchus Señor Diosninchejqa Egiptomanta orqhomuwarqanchej, jinallataj ñaupa tatasninchejtapis, maypichus karqa kamachi mana ruway atina chaymanta. Pay ruwarqa jatuchaj t'ukuna imasta, pay waqaychawarqanchej tukuy ñankunapi maykunatachus purisqanchejpi. Jinallataj tukuy llajtaspipis maynintachus purerqanchej chaykunapi.

¹⁸Señorqa tukuy runasta qharkorqa ñaupaqeykumanta, jinallataj kaypi tiyarqanku chay amorreostapis. Chayrayku noqaykupis kunanqa Señortapuni kasusqayku, imaraykuchus paymin Diosniykoqa.

¹⁹Josuetaj paykunaman nerqa: Qankunaqa manapuni Señortaqa kasuyta atiwajchejchu, imaraykuchus payqa llimphu Diosmin, manataj ima sajratapis ruwajta saqellanchu. Payqa mana saqellasonqachejchu paypa contrampi kajta, nitaj juchasniykichejtapis.

²⁰Sichus qankuna Señorta saqenkichej, waj dioskunallata yupaychankichej chayqa, payqa qankunata mana allinta ruwasonqachej, jinamanta qankunataqa tukuchisonqachej, chay jina chhika allin imasta qankunapaj ruwashaspa.

²¹Israelitastaj nerqanku: Chaytaqa mana ruwasqaykuchu, Señortapuni yupaychasqayku.

²²Chaymanta Josueqa ujtawan nillarqataj: Qankuna kikillaykichejtaj kay imastaqa ninkichej, Señortapuni kasunaykichejta. Paykuna kuticherqanku: Arí, testigos kayku, nispa.

²³Jina kajtenqa chay waj dioskuna qankuna chaupipi kashan chaykunamanta wijch'uychej, tukuy sonqowan Israelpa Diosnin Señorman kutiriychej.

²⁴Israelitastaj Josueman nerqanku: Noqaykoqa Señor Diosniykoj kamachisqantapuni ruwasqayku, imatachus niwasqaykutataj ruwasqayku.

²⁵Chay kikimpacha Josueqa Siquem nisqapi israelitaswan uj tratota ruwarqa, chaypitaj qorqa kamachiykunata, leyesta ima.

²⁶Chaykunatataj Josueqa qelqarqa Diospa leyninwan kasharqa chay libroman. Chaymantataj uj jatun rumita oqharispa Dioswan tinkukuna nisqapi, encina nisqa sach'a uraman churarqa.

²⁷Chaymantataj israelitasman nerqa: Kay rumeqa uj señal kanqa, Señorninchej kay tukuy imasta niwasqanchejmanta. Chantapis testigo jina kanqa qankunaj contraykichejpi, ama Señor Diosniykichejta ch'aukiyanaykichejpaj.

²⁸Chaymantataj Josueqa sapa ujninkuta kachaporqa maypichus tiyakusharqanku chayman.

²⁹Chay qhepata Numpa wawan Señorpa kamachin Josueqa wañuporqa pachaj chunkayoj watasniyoj.

³⁰Ayantataj p'ampamorqanku Timnat-sera jallp'allampitaj, chayqa kashan Efraín orqopi, Gaas orqomanta patanejpi.

³¹Josué kausashajtin israelitasqa k'achata kausarqanku Señorpa kamachisqanta kasuspapuni, jinallataj tukuy kurajkunasninku kausanankukama; chay kurajkunaqa Señor imastachus paykunapaj ruwapusqanta allinta yacharqanku.

³²Israelitasqa Joséj tullusninta Egiptomantapacha apamusqankuta, Siquem nisqa jallp'api p'amparqanku. Chay jallp'ataqa tatan Jacob rantikorqa, Siquempa tatan Hamormanta pachaj qolqeswan. Chay qhepatataj Joséj miraynin chay jallp'ataqa jap'ikorqanku.

³³Aarompa wawan Eleazarpis wañupullarqataj, ayantataj p'amparqanku wawan Fineespa lomampi, chay jallp'ata qorqanku Efraimpa orqosnimpi.