Read Quechua Bolivia DC Bible HEBREOS 10 Bible Online

HEBREOS 10 - Quechua Bolivia DC Bible bible

HEBREOS 10

¹Leyqa, jamoj imasmanta llanthullan kaspa, mana kay pachaj rijch'aynin kaspataj, mana atinchu chay kikin uywa wañuchisqasllatapuni sapa wata jaywaspa qayllaykojkunata allinchayta.

²Uj jinamantaqa, sichus jaywajkuna uj kutillapi llimphuchasqas kankuman karqa chayqa, chay jaywanas qhechukapunkumanña karqa, concienciankutaj juchata manaña rejsinkumanchu karqa.

³Kunanrí, kay uywa wañuchisqasta jaywaspaqa, sapa wata juchamanta yuyarikunku.

⁴Torospa, chivospa yawarninkoqa, mana juchasta qhechuyta atinchu.

⁵Chayrayku Cristo kay pachaman yaykumushaspa nin: Mana uywa wañuchisqata, nitaj rikuchikuta munarqankichu. Chayman nisqaqa, noqapaj aycha cuerpota wakichipuwarqanki.

⁶Ruphachisqa rikuchikusta, uywa wañuchisqastapis jucharayku mana munarqankichu.

⁷Chaypacha nerqani: Kaypi kashani. Imaynatachus noqamanta escribisqa kashan libropi, Diosníy, munayniykita ruwaj jamuni, nispa.

⁸Astawan patapitaj nishan: Mana munarqankichu jucharayku uywa wañuchisqasta, rikuchikusta, ruphachisqas jaywanastapis. Chaykunaqa leyman jina jaywasqa kanku.

⁹Chaypacha nerqa: Kaypi kashani, Diosníy, munayniykita ruwanaypaj. Ñaupaj kajta qhechuy, qhepa kajtataj churay.

¹⁰Chay munaynimpi llimphuchasqa kanchej, Jesucristoj cuerpon wiñaypaj uj kutillata qosqa kasqanrayku.

¹¹Ajinamanta tukuy sacerdotesqa sapa p'unchay jaywanku imatachus ruwanankuta. Sapa kutitaj chay kikin uywa wañuchisqallatapuni qospa, manataj chaykunaqa jayk'ajpis juchasta qhechuyta atinkuchu.

¹²Cristorí, uj kutillata wañuyninta qospa, wiñaypaj Diospa pañanman tiyaykukorqa.

¹³Chaymantapacha suyashan enemigosnin chakisnin uraman churasqa kanankukama.

¹⁴Payqa uj sapan rikuchikullawan ajllasqasta wiñaypaj allincharqa.

¹⁵Chayllamantataj Santo Espiritupis willawanchej, kay jinata nispa: Kay tratota paykunawan ruwasaj, kay p'unchaykunaj qhepanta, nin Señor: Sonqosninkuman kamachisqasniyta churasaj, yuyayninkupitaj escribisaj.

¹⁷Nillantaj: Juchasninkumanta, sajra ruwasqasninkumantapis manaña yuyarikusajchu astawanqa.

¹⁸Maypachachus juchas pampachasqas kanku chayqa, manaña rikuchiku jaywana kanchu juchasraykoqa.

¹⁹Chayrayku, hermanos, Jesuspa yawarninrayku aswan llimphuchasqa santuarioman tukuy sonqo yaykuyta atinchej.

²⁰Payqa noqanchejpaj kausaj ñanta kicharerqa velonejta, chaytaj niyta munan, aychannejta.

²¹Diospa wasimpi jatun sacerdoteyoj kaspa, payman qayllaykunachej allin sonqo junt'asqawan, mana kuyurej fewan, sajra concienciamanta pichasqa sonqoswan, ch'uwa yakuwan mayllasqa jina ukhuswantaj.

²³Suyayninchejpa yachachiyninta sinch'ita jap'ina, mana iskayrayaspa, Diosqa junt'anmin qonan kasqanta.

²⁴Purajmanta yanapanakuna munakuywan, allin ruwaykunawan ima.

²⁵Ama tantakunanchej wasita saqespa, imaynatachus wakin saqenku ajinata; astawanqa kallpachanakuspapuni, imaraykuchus jaqay p'unchay qayllaykamusqanta rikushanchejña.

²⁶Cheqa kajta rejsispañachus munayninchejmanta ujtawan juchapi purisun chayqa, manaña kanchu juchasrayku imatapis jaywanaqa.

²⁷Uj jinamantaqa, mancharina juicio suyayllaña, ninaj k'ajaynintaj enemigosta q'olaykonqa.

²⁸Pillapis Moisespa leyninta qhesachajqa, iskay, chayrí kinsa rikojkunaj willasqankuwan, cheqamanta mana khuyasqa wañun.

²⁹Mashkhatawanraj yuyankichej jasut'isqa kananta chay runa Diospa Churinta saroj, yawar tratontataj millay nej, chaypitaj llimphuchasqa karqa, khuyakoj Espiritupajtaj rimarqa?

³⁰Yachanchejtaj pichus chayta nerqa: Noqa cheqanchasaj, kutichisajtaj. Ujtawan nillarqataj: Señor ayllunta juchasninmanta taponqa.

³¹Mancharinapaj jina, kausaj Diospa makisninman urmayqa!

³²Chayrayku yuyarikuychej ñaupa p'unchaykunamanta, maypachachus k'anchasqaña kaspa, ancha llakiywan maqanakupi karqankichej.

³³Qankunaqa, ñaraj k'amisqas, llakisqas runaj asipayanan; ñaraj qankuna jina ñak'arejkunawampis ujchasqas karqankichej.

³⁴Presosta khuyarqankichej, kapuyniykichejta suwajtinkupis kusiywan aparqankichej, yachaspa qankunapaj aswan sumaj chayaqe kasqanta janaj pachapi, mana jayk'aj tukukuyniyoj.

³⁵Ama ari, Diospi suyakuyniykichejta chinkachiychejchu, imaraykuchus chayqa may jatun t'inkayojmin.

³⁶Llakiypi sinch'i sonqopuni kanaykichej tiyan, Diospa munayninta ruwaspataj, Diospa qosqayki nisqasninta jap'inaykichejpaj.

³⁷Uj tumpitamantawan jamojqa, jamonqaña, manataj qhepakonqachu.

³⁸Kunantaj cheqan runaqa, creesqanrayku kausanqa. Sichus qhepaman ithirinman chayqa, pay mana kusichiwanqachu.

³⁹Noqanchejqa mana chay wañuypaj qhepaman ithirikojkunamantachu kanchej; astawanqa feniyojllapuni, almaj salvacioninta taripanapaj.