Read Quechua Bolivia DC Bible HEBREOS 12 Bible Online

HEBREOS 12 - Quechua Bolivia DC Bible bible

HEBREOS 12

¹Chayrayku, noqanchejpis, chay chhika rikojkunawan muyurisqa kaspa, uj jatun phuyuwan jina, tukuy llasata, muyuykuwajninchej juchatapis saqena. Pacienciawan usqhayta phawana churasqa kashan noqanchejpaj chay maqanakuman.

²Jesuspi ñawisninchejta churaspa, pichus creenanchejta wakichin, tukuychantaj; paytaj kusikuyta jap'inanrayku, cruzpi ñak'arerqa p'enqakuyta qhesachaspa, Diospa pañanmantaj tiyaykukorqa.

³Yuyarikuychej Jesusmanta, pichus juchasapaspa chay chhika jasut'isqankuta ñak'arerqa ama llauchhuyaspa sayk'unaykichejpaj.

⁴Manaraj yawarta t'akanaykichejkamachu juchaj contrampi sayaykukorqankichej.

⁵Qonqapunkichejña Señorpa k'amisqasninmanta, imaynatachus wawasninwan jina qankunawan parlarqa, nispa: Churíy, Señor jasut'isojtin ama qhesachaychu, nitaj uj jinayaychu k'amisojtin.

⁶Señorqa pitachá munakun wawanta jina, chayta wanachin; jasut'intaj pitachá jap'in chayta.

⁷Ñak'arinkichej chayqa, Dios wawasninta jina qhawasonqachej. Ima wawataj kanman, pitachu tatan mana jasut'inmanchu chayri?

⁸Manachus jasut'isqas kawajchej chayqa, imaynatachus tukuypis jasut'isqas kanku; wajcha wawaschá kawajchej, manataj cheqa wawaschu.

⁹Chantá, kay pacha tatasninchej jasut'iwajtinchej, kasoj kanchej. Manachu astawanraj janaj pacha Tatanchejta kasunanchej kausananchejpajqa?

¹⁰Cheqamanta tatasninchejqa pisi p'unchaykunapaj, yuyayninkuman jina wanachiwaj kanchej; paytajrí, allinninchejpaj ruwan Diospa llimphu kayninmanta, chayaqeyoj kananchejpaj.

¹¹Mana mayqen jasut'eqa, chay kikimpacha kusikunapaj jinachu, astawanqa llakikunapaj jina. Qhepamantaj, Diosqa chay ñak'arejkunaman k'acha cheqan poqoyninta qopun.

¹²Chayrayku, urmasqa makista oqhariychej, llauchhuyasqa qonqorkunatapis kallpachaychej.

¹³Ñankunasniykichejta cheqanchaychej, cojos ama misk'anankupaj, astawanqa thañikapunankupaj.

¹⁴Allin kausayta tukuywan mask'aychej, llimphu kaytapis, mana chaywanqa, mana pipis Señorta rikonqachu.

¹⁵Allinta qhawakuychej, pajtá pipis Diospa yanapayninmanta karunchakunman; pajtá ima jaya saphipis p'utumuspa onqochisunkichejman, chaynejtataj ashkhas onqoyta chimpachikunkuman.

¹⁶Ama pipis sajrata purichunchu, Diosta mana kasoj Esaú jina, pichus uj mikhunaraykulla kuraj kayninta chhalarqa.

¹⁷Yachankichej jina, qhepata bendicionta chayaqepaj jap'iyta munashajtimpis, qhesachasqa karqa; mana ari Diosman kutiripuyta aterqañachu, waqaspa mask'ashaspapis.

¹⁸Qankunaqa, mana qayllarqankichejchu llankhay atina orqoman, nitaj nina larwaymampis, nitaj laqhayajmampis, nitaj tutayajmampis, nitaj sinch'i para wayramampis.

¹⁹Nillataj uyarerqankichejchu pututoj waqaynintapis, nitaj Diospa parlamusqantapis. Chaykunata uyarejkunaqa mañakorqanku amaña paykunaman parlamunanta.

²⁰Chayta mañarqanku imaraykuchus mana apayta aterqankuchu paykunaman kamachisqa kasqanta: Sichus ima uywallapis orqoman chayanman karqa chayqa, chay kikimpi ch'anqasqa kachun, nispa.

²¹Chay jina mancharinapaj karqa chay rikukusqanqa! Kikin Moisespis nerqa: Ancha mancharisqa, kharkatitispataj kashani, nispa.

²²Qankunataj Sión orqoman qayllaykunkichej, kausaj Diospa llajtanman, chay Jerusalenman, ashkha waranqa angelespa t'aqanman.

²³Ajinallatataj qayllaykunkichej ñaupa creejkunaj tantakunanku wasiman. Paykunaj sutisninkoqa janaj pachapi escribisqa kashanku; ajinallatataj, Diosman tukuypa juezninman, ajllasqa espiritusmanwan, pikunachus allinchasqas kanku, chaykunaman.

²⁴Astawanqa qayllaykunkichej Jesusman mosoj tratopi allinyachejman, chay ch'ajchusqa yawarmantaj. Chayqa Abelpa yawarninmanta nisqaqa, aswan allintaraj parlan.

²⁵Qhawakuychej, ama qhesachaspa parlamojta, imaraykuchus jaqaykunaqa kay pachapi parlajta qhesacharqanku, chayraykutaj jasut'imanta mana ayqerqankuchu. Noqanchejtaj janaj pachamanta parlamojta qhesachasun chayqa, manallataj ayqesunchu.

²⁶Chaypacha paypa qhapariynenqa jallp'ata kuyuricherqa. Kunanqa willamullantaj: Uj kutitawan kuyuchisaj, mana jallp'allatachu, manachayqa janaj pachatawan.

²⁷Uj kutita nispaqa niyta munan, kuyukojkuna ruwasqa kasqankurayku qhechusqa kanankuta, mana kuyukojkunallaña sayanankupaj.

²⁸Chayrayku noqanchejpis mana kuyurej reinota jap'ispaña, graciasta qona, Diostataj yupaychana tukuy sonqo, jatumpitaj payta jap'ina. Chaykunata Diosqa munan.

²⁹Diosninchejqa q'olaj ninaj larwaynin.