Read Quechua Bolivia DC Bible HEBREOS 13 Bible Online

HEBREOS 13 - Quechua Bolivia DC Bible bible

HEBREOS 13

¹Hermanos ukhupi munakoyqa kallachumpuni.

²Ama qonqaychejchu chayakamojkunata wasiman wajyakuyta, imaraykuchus chayta ruwaspa, wakin mana yachaspalla angelkunata wajyakorqanku.

³Presosmanta yuyarikuychej, paykunawan khuskapis presochasqas kawajchej jina, jasut'isqasmantapis imaraykuchus qankunapis cuerpoyoj kankichej.

⁴Casarakoyqa tukuypaj allin; puñunankupis mana ch'ichiyojtaj kachun. Dios juchachanqa sajra purejkunata, qhenchachakojkunata ima.

⁵Kausakuychej qolqeta ama munapayaspa. Kapususqaykichejllawan kusisqas kaychej; imaraykuchus pay nerqa: Mana wijch'urparisqaykichu nitaj saqerparisqaykichu.

⁶Chayrayku tukuy sonqo niyta atinchej: Señorqa yanapawajniy, mana manchachikusajchu, imanawanqataj runari?

⁷Yuyarikuychej ñaupajman pusasojniykichejmanta, pikunachus Diospa palabranmanta parlasorqachej chaykunamanta; unanchaychej imaynatachus kausakusqankuta, feninkutataj yachaqakuychej.

⁸Jesucristoqa kikillampuni qayna, kunan, wiñaypajpis.

⁹Ama apaykachachikuychejchu imaymana waj yachachiykunawan; aswan allinmin Diospa yanapayninwan sonqo kallpachasqa kananqa; mikhuykunawan kallpachasqa kananmanta, imaraykuchus chaykuna mana yanapankuchu chay jinaman kausajkunata.

¹⁰Kapuwanchej uj altar, chaypi mana mikhuyta atinkuchu yupaychana tabernáculo rikuchikuta jaywajkunaqa.

¹¹Kuraj sacerdoteqa uywaspa aychanta, yawarninta ima, jucharayku santuarioman apaykuna, jaramanta jawapitaj uywaspa aychasnin ruphachisqa kanankupaj.

¹²Chayrayku Jesuspis, llajtamanta jawapi ñak'arerqa, runata kikin yawarninwan llimphuchanampaj.

¹³Llojsina ari, jaramanta jawaman Jesusta taripaj, ñak'ariyninta apaspa.

¹⁴Kay jallp'apeqa mana sayaj llajtayojchu kanchej, astawanqa chay jamoj llajtata mask'ashanchej.

¹⁵Chayrayku, Jesucristonejta Diosman yupaychay rikuchikuta jaywanapuni. Kay niyta munan, simispa yupaychaynin, maypachachus Jesucristoj sutinta oqharinku, chaypacha.

¹⁶Amataj qonqaychejchu allin kajta ruwayta, yanapanakuyta ima. Diosqa chay jina rikuchikusta munan.

¹⁷Ñaupajman pusasunkichej chaykunata kasuychej, paykunaj kamachiynimpitaj kaychej; imaraykuchus paykunaqa mana puñuspa almasniykichejta qhawanku, Diosmantaj cuentata qonanku tiyan. Kayqa kusiywan ruwanankupaj, mana llakiywanchu, nitaj rimaspachu; kayqa mana allinchu kanman qankunapaj.

¹⁸Diosmanta mañapuwayku ari, yachayku allin sonqoyoj kasqaykuta, tukuy imapi allinta puriyta munaspa.

¹⁹Astawanqa mañakuykichej, ajinata ruwanaykichejta, aswan usqhayta qankunaman kutimunaypaj.

²⁰Sonqo tiyachej Diosqa, pichus wañusqakunamanta kausarichimorqa Señorninchej Jesucristota, ovejaspa jatun michejninta, wiñay tratoj yawarnimpi, tukuy ima allin ruwaypi qankunata wakichichun, paypa munayninta ruwanaykichejpaj. Ajinata qankunapi pay ruwachun imachus ñaupaqempi allin kajta Jesucristonejta. Payman janaj pacha k'anchay kachun, wiñaypa wiñayninkama. Amén.

²²Kunanqa, mañakuykichej hermanos, kay sonqochana palabrata allinta jap'inaykichejta, pisita qankunaman escribimusqayrayku.

²³Yachanchej hermanonchej Timoteo kacharisqaña kasqanta. Aswan usqhaytachus chayamonqa chayqa, paywan watukusqayku.

²⁴Tukuy kamachejniykichejta napaykapuwaychej, tukuy ajllasqastawan. Italiapi kajkunataj napaykamusunkichej.

²⁵Diospa khuyakuynin tukuyniykichejwan kachun.