Read Quechua Bolivia DC Bible HEBREOS 3 Bible Online

HEBREOS 3 - Quechua Bolivia DC Bible bible

HEBREOS 3

¹Ajllasqa hermanos, janaj pacha wajyaymanta chayaqeyojkuna, qhawaychej apostolta, feninchejmanta jatun sacerdoteta, Jesusta.

²Payqa tukuy imapi junt'arqa churajnimpaj; imaynatachus Moisespis junt'arqa tukuy imata Diospa wasimpi.

³Jesusqa, Moisesmanta nisqaqa astawan kuraj, allin sutiyojtaj; imaraykuchus astawan allin sutiyojpuni wasita sayachejqa, wasinmanta nisqaqa.

⁴Sapa waseqa runaj wasichasqampuni; tukuy imata ruwajrí, Dios.

⁵Moisesqa, cheqamanta junt'aj karqa Diospa wasimpi kamachi jina, willanampaj imachus nisqa kanan karqa chaymanta.

⁶Cristoqa, Churi jina wasimpi churasqa; chay wasirí noqanchej kanchej, sitajchus tukukuykama creesunchej, suyaspa kusikuynintataj sinch'ita jap'isunchej, chayqa.

⁷Chayrayku, ajinallatataj Santo Espiritupis nin: Kunan p'unchaychus parlasqanta uyariwajchej chayqa; ama sonqoykichejta rumiyachiychejchu, chay ch'ajwa oqharikuypi jina, chay tentación p'unchaypi, ch'in pampapi jinaqa, maypichus ñaupa tatasniykichej rejsinayawaspa tentawarqanku, rikorqankutaj ruwasqasniyta, tawa chunka wata junt'ata.

¹⁰Chayrayku, chay runaj miraynimpaj phiñakorqani, nerqanitaj: Sonqonkupi pantashanku; manataj ñankunasniytapis rejserqankuchu.

¹¹Chayrayku, anchata phiñakuspa jurarqani: Mana samakuyniyman yaykonqankuchu.

¹²Hermanos, ama qankunamanta pipis mana creej, sajra sonqoyoj kachunchu, kausaj Diosmanta ama t'aqasqa kanampaj.

¹³Astawanqa, sapa p'unchay purajmanta kallpachanakuychej, p'unchay kashajtin, ama mayqenniykichejpis juchaj ch'aukiyaynimpi rumiyanampaj.

¹⁴Cristowan chayaqeyoj kanchej; sichus creesqanchejta, qallariymanta tukukuykama sinch'ita jap'isunchej chayqa.

¹⁵Escrituraj nisqanman jina: Kunan p'unchaychus parlasqanta uyariwajchej chayqa, ama sonqoykichejta rumiyachiychejchu, chay ch'ajwa oqharikuypi jina.

¹⁶Pikunataj karqanku, uyarispaña, Diosta phiñachejkunari? Manachu Moiseswan Egiptomanta tukuy llojsimojkuna?

¹⁷Pikunapajtaj Dios phiñasqa karqa tawa chunka watastari? Manachu juchallikojkunapaj karqa, paykunaj ayasninkutaj ch'in pampapi wijch'urayarqanku?

¹⁸Pikunapajtaj Dios jurarqa, samakuyninman mana yaykunankutari? Manachu chay mana kasukojkunapaj?

¹⁹Yachanchej mana yaykuyta atisqankuta, mana creesqankurayku.