Read Quechua Bolivia DC Bible HEBREOS 8 Bible Online

HEBREOS 8 - Quechua Bolivia DC Bible bible

HEBREOS 8

¹Kunanqa, tukuy nisqanchejmanta kaymin ñaupajqa: Chay jina kuraj sacerdote tiyapuwanchej payqa janaj pachapi jatun Diospa tiyanampa pañanman, tiyaykukorqa.

²Payqa llimphu kaj imasta jaywan, jaqay cheqa kaj tabernáculo nisqa wasipi. Chaytataj Señor sayaricherqa, mana runachu.

³Tukuy kuraj sacerdoteqa rikuchikusta, uywa wañuchisqastawan jaywanampaj churasqa. Chayrayku paypis ima jaywanayojpuni kanan tiyan.

⁴Chayrayku, kay jallp'apichus pay kashanman chayqa, mana sacerdotepischu kanman, sacerdotes kashajtinkuraj rikuchikusta jaywanankupaj, leyman jina.

⁵Paykunaqa uj rijch'aylla, llanthu jinalla kanku janaj pacha imasmanta. Chayrayku Dios nerqa Moisesman, tabernaculota wakichinan kashajtin: Orqopi rikucherqayki chay rijch'ayman jina tukuy imata ruway, nispa.

⁶Chay jawa, kunanqa Jesuspata aswan sumaj ruwanan tiyapun; imaraykuchus payqa allinyachej, aswan sumaj tratomanta, aswan sumachaj Diospa qosqayki nisqasnimpi churasqa.

⁷Ñaupa kaj tratochus allin kanman karqa chayqa, mana waj tratotajchu churakunman karqa.

⁸Chayrayku paykunata k'amispa nin: Qhawaychej, p'unchaykuna jamushanku, Señor nin: Maypachachus Israel aylluwan, Judá aylluwan ima uj mosoj tratota ruwasaj; mana tatasninkuwan ruwarqani jinatachu, maypachachus jaqay p'unchaypi Egipto jallp'amanta orqhomorqani makinkumanta aysaspa. Paykunataj mana tratoypi sayarqankuchu. Chayrayku noqapis paykunata qhesacharqani, nin Señorqa.

¹⁰Ajinamanta, kay tratota Israel aylluwan ruwasaj, jaqay p'unchaykunaj qhepanta, Señor nin: Yuyayninkuman kamachisqasniyta churasaj, sonqosninkupitaj escribisaj. Paykunaj Diosninku kasaj, paykunataj noqaj aylluy kanqanku.

¹¹Manaña pipis runa masinta yachachenqañachu, nitaj wauqentapis nenqachu: Señorta rejsiy, imaraykuchus tukuy rejsiwanqanku, sullk'amantapacha kurajninkukama.

¹²Mana allin ruwasqasninkumanta khuyasaj, juchasninkumantapis manaña astawan yuyarikusajchu.

¹³Mosoj trato nispa, Diosqa mauk'ayachinña ñaupaj kajta. Unayniyojqa mauk'ayapun, chinkariynintaj qayllapiña kashan.