Read Quechua Bolivia DC Bible SANTIAGO 1 Bible Online

SANTIAGO 1 - Quechua Bolivia DC Bible bible

SANTIAGO 1

¹Noqa Santiago, Diospa kamachin, Señor Jesucristojtawan, Israelpa chunka iskayniyoj ayllusnin ch'eqerasqasman napaykamuykichej.

²Hermanosníy, qankunaqa may sonqo junt'asqa kaychej, imaymana llakiykuna jamusojtiykichej.

³Creesqaykichejpi pruebaman churasqas kaspaqa, pacienciata tarinkichej.

⁴Chay pacienciataj sumaj wiñasqa kachun, tukuy imapi junt'asqas, allinchasqastaj kanaykichejpaj; ajinapi ni ima pisisonqachejchu.

⁵Mayqellampis qankunamanta mana yachayniyoj kanman chayqa, Diosmanta mañakuchun. Dios qon tukuyman ashkhamanta mana k'amispalla. Cheqamanta chay yachayqa payman qosqa kanqa.

⁶Mañakuchun fewan, ama imapi iskayrayaspa, imaraykuchus iskayrayajqa rijch'akun mar qochapi yaku qhollchoqeyajman, wayraj kayman jaqayman apaykachasqanman.

⁷Pichus ajinata ruwajqa, ama yuyachunchu imatapis Señormanta jap'inanta.

⁸Chay jina iskay yuyayniyoj runaqa, tukuy ñankunasnimpi mana sayayta atinchu.

⁹Mana allimpaj qhawasqa hermanoqa, kusikuchun jatunchasqa kasqanmanta.

¹⁰Qhapajrí kusikuchin k'umuykukuynimpi; imaraykuchus qhapajqa qhora t'ika jina t'akakaponqa.

¹¹Inti llojsimuspa sinch'ita ruphajtin, qhora ch'akipun, t'ikantaj urmapun, k'acha rijch'aynimpis chinkapun; ajinallatataj qhapajpis chinkaponqa tukuy ima ruwasqasnimpi.

¹²Kusikuyniyojmin tentacionta atipaj runaqa; imaraykuchus chay tentacionta atipasqanman jina jap'inan tiyan wiñay kausay pilluta, mayqentachus Dios nerqa qonanta payta munakojkunaman.

¹³Mayqellampis tentasqa kaspa, ama nichunchu Diosmanta tentasqa kasqanta, imaraykuchus Diosqa sajrawan mana tentasqa kayta atinchu, nitaj payqa pitapis tentanchu.

¹⁴Astawanqa sapa uj tentasqa, maypachachus sajra munaynin payta pusan sonqonta suwaspa; chaypacha aysachikun, atipachikuntaj.

¹⁵Kay sajra munaykunamanta jamun juchaqa; jucha junt'akojtintaj wañuy jamun.

¹⁶Munasqa hermanosníy, ama pantaychejchu.

¹⁷Tukuy ima allin t'inka, imatapis ruwayta yachaytaj patamanta jamun, k'anchay Tatamanta. Payqa kikillampuni, manataj paypi ima llanthullapis kuyurej kanchu.

¹⁸Pay munayninman jina kausayta qowanchej cheqa palabrannejta, mishkha jina wawasnin kananchejpaj munasqanman jina.

¹⁹Chayrayku, munakusqa hermanosníy, sapa ujniykichej usqhayta uyariychej, pisita parlaychej, amataj usqhayta phiñakuychejchu.

²⁰Runaj phiñakuynenqa mana Diospa cheqan kayninman jinachu ruwan.

²¹Ajinata ari, tukuy millay kajta, sajra kajkunatapis saqepuychej. Sonqoykichejpi tarpusqaña chay palabrata llamp'u sonqowan jap'ikuychej. Chaytaj almaykichejta salvayta atin.

²²Diospa palabrantaqa ama uyarillaychejchu, astawanqa junt'aychej; manachayqa qankuna kikiykichej ch'aukiyakunkichej.

²³Pichus Diospa palabranta uyarispa mana kasunchu chayqa, rijch'akun espejopi uyanta qhawarikoj runaman.

²⁴Chay runaqa uyanta qhawarikuspa usqhayta ripun. Chaymanta qonqapun imaynachus uyan kasqanta.

²⁵Pichus allinta qhawakun chayqa allinchasqa, kacharichej leypitaj sayaykun; manataj uyarisqanta qonqapojllachu kaspa, leypa kamachisqanta junt'an chayqa, chay runaqa kusikuyniyojmin ruwasqampi.

²⁶Pichus qankunamanta Diosta yupaychasqanta yuyanman, manataj siminta wisq'anchu chayqa, pay kikin sonqonta ch'aukiyan, Diosta yupaychasqantaj qhasi mana kaj.

²⁷Diosta llimphu yupaychayqa mana ch'ichiyoj kanan tiyan Dios Tatanchejpa ñaupaqempi, kay jinamanta watukuspa wajchasta, viudasta ima llakiyninkupi. Amataj ch'ichichakuspa kay mundoj sajra imasninmanta waqaychakuychej.