Read Quechua Bolivia DC Bible JUECES 1 Bible Online

JUECES 1 - Quechua Bolivia DC Bible bible

JUECES 1

¹Josué wañupusqanmanta qhepata, israelitasqa Señorta tapurerqanku, mayqen ayllurajchus ñaupajta cananeoswan maqanakoj rinanta.

²Señortaj paykunaman kuticherqa, Judá aylluraj ñaupajta maqanakoj rinanta, payllamantaj chay jallp'aqa qosqa kananta.

³Chaypacha Judá ayllumanta kajkunaqa wajyarikorqanku Simeón ayllumanta kaj hermanosninkuta, ujchakuspa maqanakoj rinankupaj, Judá aylluman qosqa karqa chay jallp'asman. Chaymantarí khuskallataj rinankupaj Simeón aylluman qosqa karqa chay jallp'astapis jap'ikapunankupaj. Simeón ayllumanta kajunaqa Judá ayllumanta kajkunawan khuska maqanakuman rerqanku.

⁴Ajinamanta Judá ayllumanta kajkunaqa maqanakoj yaykorqanku cananeospa jallp'asninman, jinataj ferezeospamanpis, paykunatataj Señorqa makisninkuman jaywarqa. Bezecpitaj cananeosmanta ferezeosmantawan chunka waranqa runasta atiparqanku, Adonisedectaj paykunawan kasharqa.

⁶Adonisedecqa ayqekorqa, paykunataj qhatiykuspa jap'erparerqanku, makisninmanta dedosninta chakisninmantapis mut'urparerqanku.

⁷Chaypacha Adonisedecqa nerqa: Ñaupajtaqa noqa mut'urarqani qanchis chunka reykunaspa makisninkoj machu dedosninkuta jinataj chakisninkojtapis, chay runastaj mesay urapi mikhuy puchusta pallaj kanku. Kunanrí imaynatachus noqa ruwarqani kikillantataj Dios ruwawan. Jerusalenman payta pusarqanku, chaypitaj wañuporqa.

⁸Judá ayllumanta kajkuna maqanakuspa jap'ikaporqanku Jerusalenta, espadawan t'ojsiraspa runasninta wañurachispataj llajtata ruphaykucherqanku.

⁹Chaymantaqa orqosnejpi tiyakojkuna cananeoswanñataj maqanakorqanku, Neguev chaynejpi jinataj chay pampasnejpi tiyakojkunawampis.

¹⁰Ajinallatataj Hebrompi tiyakorqanku chay cananeoswampis maqanakullarqankutaj, chay llajtaj ñaupa sutenqa Quiriat-arba karqa, chaypitaj atiparqanku Sesaita, Ahimanta, Talmaitawan.

¹¹Chaymantaqa Debir llajtawan maqanakullarqankutaj, chay llajtaj ñaupa sutintaj Quiriat-sefer karqa.

¹²Calebtaj nerqa, pichus Debir llajtata maqanakuspa atipajman ususin Acsata qonanta warmin kanampaj.

¹³Chay llajtataj jap'ikapoj runataj karqa Otoniel, paytaj Calebpa sullk'a hermanon Cenazpa wawan karqa, Calebtaj payman qoporqa ususin Acsata warmin kanampaj.

¹⁴Maypachachus Acsa chayamojtinna, Otonielqa payta umacharqa tatanmanta jallp'ata qochikunanta. Calebtaj, wawan Acsata burromanta juraq'ashajta rikuspa, taporqa: Imanantajrí?, nispa.

¹⁵Acsataj kuticherqa: Uj imatawan qonawaykita mañakuyki. Neguev chaypi jallp'asta qowankiña, kunanqa qorillawaytaj ari yaku juturistawan. Chantá Calebqa yaku juturista qorqa wichaynejpi jinataj uranejpipis.

¹⁶Quenita nisqas karqanku Moisespa suegrompa mirayninmanta kajkuna, paykunaqa llojserqanku Judá aylluwan khuska Palmeras llajtamanta, rerqankutaj Judajpa ch'in pampannejman, Aradmanta aswan uranejman, chaypi tiyakojkuna runaswantaj qhepakorqanku tiyakapoj.

¹⁷Chaypacha Judá ayllumanta kajkunaqa rerqanku Simeompa ayllunmanta kajkunawan, imaynatachus parlanakusqankuman jina, Sefatpi tiyakojkuna chay cananeostataj maqanakupi atiparqanku. Chay llajtatataj chinkacherqanku. Chayraykumari Horma nispa suticharqanku.

¹⁸Chaywampis mana aterqankuchu jap'ikapuyta kay llajtasta; Gazata, Ascalonta, Ecronta, nitaj qayllampi kajkuna jallp'asninkutapis.

¹⁹Judá ayllumanta kajkunaqa Señorpa yanapayninwan qharqorqanku orqospi tiyakojkunata, chaywampis manapuni qharqoyta aterqankuchu chay pampasnejpi kajkunataqa, fierromanta carrosniyoj kasqankurayku.

²⁰Moisés nisqanman jina, Hebronqa Calebman qosqa karqa, Calebtaj chaymanta wijch'orqa Anacpa kinsa wawasninta.

²¹Jinapis Benjamimpa ayllunmanta kajkunaqa Jerusalén llajtamanta mana qharqoyta aterqankuchu chaypi tiyakojkuna jebuseosta. Chayraykumari kunan p'unchaykama Jerusalempi khuska tiyakushanku jebuseoswan Benjamín ayllumanta kajkunawan.

²²Josejpa ayllusninmanta kajkunataj Betelta jap'kapoj rerqanku, kay llajtaj ñaupa sutenqa Luz nisqa karqa. Chaymantaj wateqajkunata kacharqanku, Señortaj paykunata yanaparqa.

²⁴Chay wateqajkunataj, llajtamanta uj runata llojsishajta rikuspa nerqanku: Sichus qan rikuchiwasqayku maynintachus llajtaman yaykunata chayqa, noqaykupis qanta khuyasqayku.

²⁵Chay runataj rikucherqa maynintachus llajtaman yaykunata, paykunataj chay llajtapi tiyakojkunata tukuyninkuta wañuracherqanku espadawan t'ojsispa; jinapis yaykuna ñanta pichus rikucherqa chay runataqa mana wañucherqankuchu nitaj paypa aylluntapis.

²⁶Chaypacha chay runaqa hititaspa jallp'anman riporqa, chaypitaj mosoj llajtata jataricherqa, Luz sutitataj churarqa, chay suteqa kunankama kashallanraj.

²⁷Manasespa ayllunmanta kajkunaqa mana aterqankuchu wijch'uyta kay llajtasmanta: Bet-seanmanta, Taanacmanta, Dormanta, Ibleammanta, Meguidomanta ima, nillataj chay qayllasnimpi kajkuna ranchosninmantapis.

²⁸Israelitas astawan kallpachakuspataj chay cananeostaqa sinch'i llank'aykunasman churarqanku, chaywampis manapuni qharqoyta aterqankuchu.

²⁹Efraín ayllumanta kajkunapis manallataj qharqoyta aterqankuchu Gezerpi tiyakojkuna cananeosta, jinamanta cananeosqa paykunallawampuni tiyakorqanku.

³⁰Zabulompa ayllunmanta kajkunapis manallataj wijch'uyta aterqankuchu Quitronmanta, jinataj Naabalmantapis, chaykunapi tiyakoj cananeosta, jinamanta cananeosqa chayllapipuni tiyakorqanku sinch'i llank'aykunasman churasqas kaspapis.

³¹Aserpa ayllunmanta kajkunapis, chaypi tiyakojkuna cananeostaqa manallataj qharqoyta aterqankuchu: Acomanta, Sidonmanta, Ahlabmanta, Aczibmanta, Helbamanta, Afecmanta, Rehobmanta ima. Chay llajtasmanta mana qharqoyta atisqankuraykutaj paykunawan khuska tiyakaporqanku.

³³Neftaléj ayllunmanta kajkunapis manallataj qharqoyta aterqankuchu Bet-semesmanta, Bet-anatmantapis, chaypi tiyakojkuna cananeostaqa, chaywampis sinch'i llank'aykunasman churasqas karqanku, chaypitaj paykunawan khuska tiyakorqanku.

³⁴Amorreosqa, Dampa ayllunmanta kajkunata qharqorqanku orqosnejkama, manataj pampasnejman uraykamojta saqerqankuchu.

³⁵Jinamanta amorreosqa Herespi, Ajalompi, jinataj Saalbimpi tiyakapoj qhepakaporqanku. Chaywampis Josejpa mirayninmanta kajkuna kallpachakuspañaqa, amorreosta sinch'i llank'aykunasman churarqanku.

³⁶Amorreospa jallp'ankoj tinkuynenqa Acrabín wichaynejmantapacha Selakama karqa, aswan patakamapis rillarqapuni.