Read Quechua Bolivia DC Bible JUECES 10 Bible Online

JUECES 10 - Quechua Bolivia DC Bible bible

JUECES 10

¹Abimelecpa qhepantataj, Isacarpa ayllunmanta uj runa Tola sutiyoj sayarikorqa israelitasta salvanampaj. Tolaqa karqa Dodoj allchhin, Fúaj wawan. Payqa tiyakorqa Efraimpa orqosnimpi Samir llajtapi.

²Israelta kamacherqa iskay chunka kinsayoj watasta, wañupojtintaj Samir llajtapi p'amparqanku.

³Chay qhepantataj Galaadmanta Jairñataj jatarikuspa, iskay chunka iskayniyoj watasta Israel ayllunta kamacherqa.

⁴Jairqa kinsa chunka qhari wawasniyoj karqa, paykunamanta sapa ujninku burropi purej kanku, sapa ujninkutaj Galaad chaynejpi uj llajtayojkama karqanku. Chay kinsa chunka llajtasqa kunankamapis Jairpa llajtasnin nisqa kashanku.

⁵Jair wañupojtenqa Camompi p'amparqanku.

⁶Israelitasqa watejmanta ruwallarqankutaj Señorpa contranta, yupaychaspa Baalman jinataj Astarteman rijch'akoj lantista, ajinallatataj Siriamanta dioskunasninkuta, Sidonmanta, Moabmanta, Amonmanta, jinataj Filisteojkunatawan. Señorta saqerparispa manaña yupaycharqankuchu.

⁷Chayraykumari Señorqa paykunapaj sinch'ita phiñarikorqa, chayrayku filisteosman, amonitasmanwan jaywaykorqa.

⁸Chaymantapacha chunka pusajniyoj watasta filisteosqa jinataj amonitaspis maytapuni ñak'aricherqanku Galaadpi tukuy tiyakojkunata, Jordán mayoj chimpampi amorreokunaj jallp'ampi kajkuna israelitasta.

⁹Amonitasqa Jordán mayuta chimparqanku maqanakamunankupaj Judá aylluwan, Benjamín aylluman jinataj Efraín aylluwampis. Ajinamanta israelitasqa may llakiypi rikhurerqanku.

¹⁰Chaypacha Señormanta mayta mañakorqanku: Diosniyku contraykipi juchalliyku, qanta saqerpariyku Baal lantista yupaychanaykurayku, nispa.

¹¹Señortaj kuticherqa: Qankunaqa ñak'arichisqas karqankichej egipciosnejta, amorreosnejta, amonitasnejta, jinataj filisteosnejta, sidoneosnejta, amalecitasnejta, chantá madianitasnejta, maypachachus qankuna qhaparikamuwarqankichej chaypacha noqa paykunamanta salvarqaykichej.

¹³Chaywampis qankunaqa, saqerpariwarqankichej waj dioskunata rispa yupaychamunaykichejpaj, chayrayku noqaqa mana salvaykichejmanñachu.

¹⁴Riychej, mañakamuychej chay ajllakusqaykichej dioskunamanta. Paykunawan kunanqa ñak'ariykunamanta salvachikuychej.

¹⁵Chaypacha israelitasqa kuticherqanku Señorman: Juchallikorqayku, imatachá qan munanki chayta ruway noqaykuwan, jinapis kunanqa salvawayku ari.

¹⁶Israelitastaj t'aqakorqanku chay mana rejsisqa dioskunasninkumanta, Señortataj yupaycharqanku, Señorpis manaña munarqachu israelitas astawan ñak'arinallankutapuni.

¹⁷Amonitasqa tantaykukuspa Galaadpi jaraykukorqanku. Israelitastatajri tantaykukuspa Mizpapi jarakorqanku.

¹⁸Galaadpi tiyakojkuna israelitasqa chay kurajkunasninkuwan parlanakorqanku: Pitaj amonitaswan maqanakuyta qhallarenqari? Pichus qhallarejqa chaymin Galaadpi tukuy tiyakojkunaj wapu kamachejninku kanqa.