Read Quechua Bolivia DC Bible JUECES 14 Bible Online

JUECES 14 - Quechua Bolivia DC Bible bible

JUECES 14

¹Sansón uj kutipi uraykorqa Timnat llajtaman, uj filistea warmitataj chaypi rikorqa.

²Wasinman kutipuspataj tatasninman willarqa kay jinata: Timnat llajtapi uj filistea warmita rikuni, kunantaj mañakuykichej rispa parlapayampunawaykichejta paywan casarakunaypaj.

³Tatasnintaj Sansonman nerqanku: Imapajtaj qan mask'ashanki warmiykipaj chay filisteos Diosta mana rejsejkuna ukhumantari? Manañachu ayllunchej ukhupi warmis kanku imatajri, chayri tukuy Israel ayllu ukhupipis? Sansontaj kuticherqa: Chay warmipuni gustawan, paytapuni munani parlapayampunawaykichejta warmiy kanampaj.

⁴Tatasnenqa mana yacharqankuchu, kay tukuy imasqa Señormanta jamusqanta, imaraykuchus payqa achaketa mask'asharqa filisteospa contrampi, chaypacha filisteosqa israelitasta kamachisharqanku.

⁵Sansontaj tatasninwan ima Timnatman rerqa. Ñapis Sansón chayashajtinña chay llajtaj uvas huertasnin chaynejman, uj maltón león payman jamuykorqa qhaparispa.

⁶Chaypacha Señorpa Espíritun Sansonman jamorqa. Chay ratotaj makisnillanwan uj cabritota jina leontaqa t'isarparerqa, chaytataj mana willarqachu tatasninmanqa.

⁷Chaymantaqa rerqa parlaj chay munasqan sipaswan.

⁸Qhepan p'unchaykunaspitaj, Sansón kutillarqataj chay sipaswan casarakunampaj, chaypacha ñanmanta uj ladoman ithirerqa chay wañusqa leonta qhawamunampaj, chaypitaj rikorqa leompa wañusqa ayampi abejas qolluykukuspa uj panal misk'itaña ruwaykusqankuta.

⁹Chay panalmanta makinwan misk'ita orqhospataj mikhurispa riporqa. Tatasninwan tinkukuspataj misk'ita qorerqa, paykunataj mikhorqanku manataj paykunaman willarqachu wañusqa leonmanta orqhosqantaqa.

¹⁰Sansompa tatanqa rerqa chay sipaswan tinkumoj. Sansontaj chaypi uj fiestata ruwarqa, imaynatachus chay waynakuna ukhupi ruwayta yachasqankuman jina.

¹¹Filisteosqa Sansonta rikuytawan kacharqanku kinsa chunka wayna runasta paywan kanankupaj.

¹²Kay kinsa chunka runasmantaj Sansonqa nerqa: Uj watuchikuta ruwasqaykichej. Kay qanchis diata fiesta kanankama sichus cheqamanta kay watuchiku imatachus nisqanta niwankichej chayqa, noqa sapa ujniykichejman qosqaykichej chay allin kaj linomanta ruwasqa p'achata chantá fiestapaj nisqa p'achatawan.

¹³Manachus kay watuchikuta jap'inkichej chayqa, sapa ujniykichej allin kaj linomanta p'achata jinataj fiestaman rina p'achatawan noqaman qowankichej. Paykunataj kuticherqanku: Kunanqa niwayku ari, imataj chay watuchikuri, kunan sumajta uyarisqayku.

¹⁴Sansontaj nerqa: “Uj oqoykojmanta mikhuna llojserqa; kallpayojmanta misk'i llojserqa”. Kinsa día junt'api paykunaqa manapuni chay watuchiyta jap'iyta aterqankuchu.

¹⁵Tawa diamantaj Sansompa warminman nerqanku: Mañariy qosaykimanta willasunanta chay watuchiynin imatachus nisqanta, mana chayqa qanta chantá tataykej aylluntawan ima ruphaykuchisqayku. Qankunaqa wajyawarqayku noqaykoj kapuyniykuta qhechunallawaykupajchus jina!

¹⁶Chaypacha warmeqa Sansonman rerqa, waqaspataj nerqa: Qanqa mana munakuwankichu! Qanqa chejniwanki! Uj watuchiyta qonki llajta masisniyman, manataj sut'inchawankichu imatachus nisqanta. Sansontaj kuticherqa: Ni tatayman nitaj mamaymampis willashanichu, imaynatataj qanman willaykimanri.

¹⁷Chay warmeqa waqallarqapuni Sansompa ñaupaqempi chay qanchis p'unchaykunas junt'ata fiesta kanankama, anchatapuni mañasqanraykutaj chay qanchis kaj p'unchaynimpa Sansonqa chay watuchiyta warminman sut'incharqa. Chaypacha payqa llajta masisninman rispa willamorqa.

¹⁸Chay qanchis p'unchaypi manaraj inti yaykushajtin, filisteosqa Sansonman nimorqanku: Mana imapis abeja misk'imanta aswan misk'eqa kanchu, nillataj imapis leonmanta aswan kallpayojqa kanchu, nispa. Sansontaj paykunaman kuticherqa: Manachus wakitaywan llank'awajchej karqa chayqa, mana watuchiyniyta willayta atiwajchejchu karqa.

¹⁹Chay rato Señorpa Espíritun Sansonman jamorqa; chaypacha Sansonqa Ascalonman rispa chaypi kinsa chunka runasta wañucherqa, chaykunamanta p'achasta lluch'usqanwantaj pagarqa pischus watuchiyninta willajkunaman. Chaymanta may phiñasqa kutiporqa tatampa wasinman.

²⁰Warmintaj Sansompa aswan munasqa kausaqenman qosqa karqa.