Read Quechua Bolivia DC Bible JUECES 4 Bible Online

JUECES 4 - Quechua Bolivia DC Bible bible

JUECES 4

¹Aod wañupusqanmanta qhepata, israelitasqa ujtawan kutillarqankutaj Señorpa contranta sajra ruwaykunasman,

²Chantá, Señorqa Jabimpa atiyninmanñataj israelitasta churarqa, Jabinqa cananeo rey karqa, kamachisharqataj Hazor llajtapi. Soldadosnimpa kamachejnintaj Sísara karqa, payqa tiyakorqa Haroset-goimpi.

³Jabimpata isq'on pachaj fierromanta carrosnin karqa, iskay chunka watastaña israelitasta sinch'i llakiypi ñak'arichisqa, chayrayku paykunaqa Señormanta yanapayninta mañakuspa qhaparikorqanku.

⁴Chay p'unchaykunapeqa israelitasta kamachisharqa uj profetisa, Débora sutiyoj, payqa Lapidotpa warmin karqa.

⁵Deboraqa uj palma sach'a urapi tiyakuyman yachasqa karqa, chay sach'aqa Efraimpa orqosnimpi karqa, Rama llajtaj jinataj Betel llajtaj khuskannimpi jina. Chay sach'atataj Déboraj palma sach'an nej kanku, israelitasqa payman rej kanku paykuna ukhupi phiñanakus kajtin.

⁶Uj p'unchaytaj Deboraqa wajyacherqa Abinoampa wawan Baracta, payqa Neftalí ayllumanta karqa, Cedespitaj tiyakoj. Paymantaj nerqa: Israelpa Señor Diosnin kamachisunki kay jinata: Riy Tabor orqoman, chaypitaj tantamuy chunka waranqa runasta, Neftalí jinataj Zabulón ayllusmanta kajkunata.

⁷Jabimpa soldadosnin kamachej Sisarata noqa jamuchisaj soldadosninwan, carrosninwan ima, Cisón wayq'okama qankunawan maqanakunampaj. Noqataj makiykiman paykunata jaywasqayki!

⁸Baracqa kuticherqa: Qan noqawan rejtiykeqa risaj, mana rejtiykitaj mana riymanchu.

⁹Cheqamanta qanwan risaj, nispa, kuticherqa Deboraqa. Kay kutipeqa may uyarisqa kayqa mana qampajchu kanqa, imaraykuchus Señorqa uj warmej makinman Sisarata jaywanqa. Chaypacha Deboraqa Baracwan khuska Cedesman rerqa.

¹⁰Chaypitaj Baracqa wajyarqa Zabulón jinataj Neftalí ayllusmanta, tantaykorqataj chunka waranqa runasta paypa kamachiynimpi. Deborataj paywan rerqa.

¹¹Cedes qayllapitaj, Zaanaim encina sach'a chaynejpi quenita Heberpa toldosnin kasharqa. Payqa chay waj quenitasmanta t'aqakampusqa. Quenitasqa Moisespa suegron Hobabpa mirayninmanta karqanku.

¹²Tabor orqoman Barac wicharisqanta yachaytawankama, Sisaraqa tantaykorqa isq'on pachaj fierromanta carrosninta jinataj tukuy soldadosnintawan, paykunawantaj rerqa Haroset-goimmanta Cisón wayq'okama.

¹⁴Chaypacha Deboraqa Baracman nerqa: Kunanqa riy, Señorqa makisniykiman Sisarata kunan churanqa, Señorqa soldadosniykej ñaupaqenta rishan. Baracqa Tabor orqomanta chunka waranqa soldadosninwan uraykamorqa.

¹⁵Barac tinkuman yaykojtinkamataj, Señorqa musphacherqa Sisaraj carrosninta jinataj soldadosnintapis, Sisarapis carronmanta uraykuytawankama chakipi ayqerqa.

¹⁶Chaykamataj Baracqa Sísaraj carrosninta jinataj soldadosnintawan qhatiykorqa Haroset-goimkama. Jaqay p'unchaypeqa Sisaraj soldadosninmantaqa ni uj soldadollapis kausarqachu, tukuyninku wañorqanku.

¹⁷Hasormanta rey Jabín chaypachaqa quenita Heberpa ayllunwanqa k'achata kausakusharqanku, Sisarataj ayqekushaspa chakipi chayakorqa Heberpa warmin Jaelpa toldonman, paytaj taripamoj llojsispa nerqa: Kaynejman qayllamuy wiraqochíy, ama manchachikuychu. Sisarqa yaykorqa toldoman, Jaeltaj uj qhatanawan pakaykorqa.

¹⁹Chaymanta Sisaraqa yakuta mañarikorqa, mayta ch'akichikusqanrayku, Jaeltaj maypichus leche jallch'asqa kasharqa chay qarata kicharispa lecheta qorqa ujyanampaj. Chantá watejmanta payta qhataykullarqataj.

²⁰Chaypacha pay nerqa: Sayaykukuy toldoman yaykumuna punkupi, pillapis jamuspa tapukojtenqa, pipis kayman jamorqachu nispa chayqa, mana nispa ninki.

²¹Sisararqa allin sayk'usqa kaspa may sinch'ita puñurparerqa. Jaeltaj oqharikamuspa uj martillota, toldomanta uj estacata jap'iytawan, ch'insitullamanta Sisaraman chimpaykuspataj umanman chay estacata clavaykorqa pampaman jap'isqata. Ajinata wañorqa Sisaraqa.

²²Baracqa Sisarata mask'aspa chayamojtintaj, Jaelqa taripamoj rerqa, chaypitaj nerqa: Jamuy, rikuchisqayki pitachus mask'ashanki chayta. Baractaj toldoman yaykuspa rikorqa Sisarata pampapi wañusqa wijch'urayajta, estacawan umampi clavasqata.

²³Ajinata jaqay p'unchaypi Señorqa cananeo rey Jabinta k'umuykucherqa tukuy israelitaspa ñaupaqempi.

²⁴Chaymantapacha israelitasqa Jabinta astawan sinch'i makiwan kamacherqanku, payta wañuchinankukama.