Read Quechua Bolivia DC Bible JUECES 9 Bible Online

JUECES 9 - Quechua Bolivia DC Bible bible

JUECES 9

¹Jerobaalpa wawan Abimelecqa, mamanmanta kaj ayllusninwan Siquem llajtapi parlaj rerqa, nispa: Noqa mañarikuykichej, kay Siquempi tiyakoj runasta umachanaykichejta uj runallawan kamachisqas kanankuta, manataj chay Jerobaalpa qanchis chunka wawasninwanchu. Yachankichej jina noqaqa yawar masiykichej kani.

³Abimelec paykunaj ayllunku kasqanrayku payman kutikorqanku. Siquem llajtapi tiyakojkunatataj umachamorqanku Abimelecta qhatinankuta.

⁴Chay jawaqa Baal-berit nisqa yupaychana wasinmanta orqhomuspataj qanchis chunka qolqesta Abimelecman qorqanku. Chay qolqeswantaj Abimelecqa qhella walaychu runasta mink'akorqa paywan rinankupaj. Chay runasqa paywan rispa, Ofra llajtaman maypichus tatan Jerobaal tiyakorqa chayman, chaypi uj rumillapitaj ch'anqaspa chay qanchis chunkantin hermanosninta wañucherqa. Jerobaalpa sullk'a wawallan Jotam sutiyoj ayqekusqanrayku mana wañuchisqachu karqa.

⁵

⁶Chay qhepantataj tukuyninku Siquemmanta kajkuna chantá Bet-milomanta kajkunapis encina sach'a chaynejpi tantaykukorqanku, chay yupaychana rumi kasharqa chaynejpipis, chaypitaj Abimelecta reyninkupaj ajllakorqanku.

⁷Jotamtaj chay tukuyta yachaytawankama sinch'ita qhaparimorqa Gerizim orqomanta tukuy uyarinankupaj jina: Uyariwaychej allinta Siquemmanta runas, ajinallatataj Dios qankunata uyarichun.

⁸Uj kutipi sach'as reyniyoj kayta munarqanku, olivo sach'atataj mañarqanku reyninku kananta.

⁹Chay sach'ataj mana munarqachu rey kayta, nerqataj: Sach'aspa reyninku kanaypajqa aceiteta poqoytaraj saqenay kanman. Chay aceiteqa kanan kashan Diosta jinataj runasta honranampaj.

¹⁰Chaypacha chay sach'asqa mañarqanku higos sach'ata reyninku kananta.

¹¹Chaypi higos sach'apis kutichillarqataj: Mana atiymanchu rey kayta. Rey kanaypajqa saqenay kanman misk'i q'aparishaj higosta poqoyta.

¹²Chaymantaqa chay sach'asqa, uvas sach'atañataj mañarqanku reyninku kananta.

¹³Uvas sach'aqa manallataj munarqachu, nerqataj: Rey kanaypajqa saqenaychá kanman vinota poqoyta. Chaywan kusichini runasta jinataj Diostapis.

¹⁴Chantá khiskamanñataj mañarqanku reyninku kanampaj.

¹⁵Khiskataj paykunata nerqa: Sichus cheqamanta reyniykichej kanayta munankichej chayqa, llanthuy uraman tukuyniykichej jamunaykichej tiyan. Manataj reyniykichej kanayta munankichej chayqa, noqamanta llojsispa larway tukuy Libanopi kaj cedrosta ruphaykunman.

¹⁶Kunantaj tapurisqaykichej: Allintachu ruwarqankichej cheqan sonqowanchu Abimelecta reyniykichejpaj ajllankichej? Jerobaalpa wawasnintapis allinwanchu rikorqankichej imaynatachus paykuna qankunata allinwan rikusorqachej jinata?

¹⁷Tatayqa ñak'ayta wañuymanta ayqeqorqa, qankunata madianitaspa makisninmanta orqhosunaykichejrayku

¹⁸Jinapis qankunaqa tataypa ayllumpa contrampi oqharikorqankichej, qanchis chunka wawasnintataj uj rumillapi ch'anqaspa wañucherqankichej. Chaywampis Gedeompa tanta warmimpi wawan Abimelectarajtaj reyniykichejpaj churaykukunkichej, qankunaj aylluykichej kasqanraykulla.

¹⁹Kunanqa ujta nisqaykichej: Sichus qankuna Jerobaalta aylluntinta allinwan cheqan sonqowantaj rikorqankichej chayqa, allillan qankunataqa richun reyniykichej Abimelecwan jinataj qankunawampis.

²⁰Mana jina chayri, Abimelecmanta nina llojsimuchun, ruphaykuchuntaj Siquempi tiyakojkunata jinataj Bet-milopi tiyakojkunatapis. Ajinallatataj Siquemmantawan Bet-milomantawan nina llojsillachuntaj Abimelectañataj ruphanampaj.

²¹Kay imasta niytawantaj Jotamqa ayqerikaporqa, Beer llajtapitaj tiyakamorqa, hermanon Abimelecta manchachikuspa.

²²Abimelecqa, kinsa watata israelitasta kamacherqa.

²³Jinataj Diosqa uj sajra espirituta kachamorqa Abimelecman jinataj Siquempi tiyakojkunamampis Abimelecpa contrampi oqharikunankupj.

²⁴Jinamanta Abimelecqa juchachasqa rikhurerqa Jerobaalpa qanchis chunka wawasnimpa yawarninta jich'aspa wañuchichisqanmanta, chantá Siquemmanta runaspis yanapasqankurayku juchachasqasllataj karqanku.

²⁵Siquemmanta runasqa orqospi pakaykunaspi kasharqanku, chay ñan qayllata purejkunaman phinkiykunankupaj, Abimelectaj kayta yacharqa.

²⁶Uj p'unchaypiri, Ebedpa wawan Gaal hermanosninwan Siquem llajtanta pasasharqa, chay llajtapi tiyakojkunamantaj allimpaj rijch'arqa.

²⁷Chay runastaj llojserqanku campoman uvas poqoyta pallaj. Vinota ruwaspataj uj jatun fiestata ruwarqanku, mikhorqanku, ujyarqankutaj dioskunasninkoj yupaychana wasinkupi. Abimelectataj maldicerqanku.

²⁸Gaaltaj nisharqa: Pi kasqantataj yuyakun kay Abimelecqa. Payqa Jerobaalpa wawallanqa, chantá manachu Zebulqa yanapajnillan? Noqanchej Siquemmanta kajkunataj, pistaj kasqanchej kamachisninku jina paykunaj ñaupaqempi purinapaj? Hamorpa kamachisnin kanachej, payqa Siquem llajtayojkunajpa ñaupa tatan karqa, amataj Abimelecpa kamachisnenqa.

²⁹Ay! Noqachus qankunaj kamachejniykichej kayman chayqa, chay ratopacha Abimelecmantaqa t'aqakuyman. Chaywampis nillarqataj: Abimelec, riy soldadosniykita tantamuy, jamuwaytaj maqanakoj.

³⁰Llajtata kamachej Zebulqa Gaalpa parlasqasninta uyarispataj mayta phiñakorqa, kay willaytataj Abimelecman apacherqa, pay Arumapi kashajtin: Ebedpa wawan Gaal hermanosninwan ima jamun Siquemman, chay llajtayoj runastataj umanchashanku qampa contraykipi oqharikunankupaj.

³¹

³²Chayrayku qanwan soldadosniykiwan ima tutallan llojsiychej campomantaj pakaykamuychej.

³³Tutamanta inti llojsimuynejta jina llajtaman yaykuykuy maqanakoj, Gaal runasninwan qanwan maqanakoj jamusojtenqa, qan ruway imaynachus allin rijch'asusqanman jina, nispa.

³⁴Ajinaqa, Abimelecqa tukuy runasninwan tutan llojsispa pakaykakamorqanku chay llajta qayllaman tawaman t'aqakuspa.

³⁵Maypachachus Gaal llojserqa llajta punkuman chaypacha Abimelecqa chay runasninwan llojsimorqa pakasqas kasharqanku chaymanta.

³⁶Rikuytawantaj, Gaalqa Zebulman nerqa: Qhawariy, orqosmanta uraykamushanku ashkha soldados. Zebultaj kuticherqa: Qanqa orqospa llanthusnillanta runasta jina rikushanki.

³⁷Jinapis Gaalqa nishallarqapuni: Qhaway, jallp'aj pupun nisqa orqomantapis uraykamullashankutaj ashkha soldados. Waj t'aqataj jamushallantaj jaqay yatirispa encina sach'anku ñannintapis.

³⁸Kunan parlariy áh simisapa, nispa, Zebulqa nerqa: Qan nerqanki Abimelecqa pitaj kasqa noqayku payta sirvinaykupajri?, nispa. Kunan rikuy chay pisipaj qhawasqayki soldadosta, nispa. Kunanqa llojsiy contrankupi maqanakamuy.

³⁹Gaaltaj llojserqa Siquem llajtamanta runaspa ñaupaqenta, Abimelecpa contrampi maqanakoj.

⁴⁰Abimelectaj payta qhatiykorqa, Gaaltaj paymanta ayqekorqa. Kikin llajta punkupi ashkha wañusqas rikhurerqanku.

⁴¹Abimelecqa Arumapi qhepakorqa, Zebulrí, Siquemmanta Gaalta hermanosnintawan ima qharqorqa, manaña chaypi tiyakunankupaj.

⁴²Q'ayantintaj Siquem llajtamanta kajkuna llojserqanku campoman. Yachaytawankamataj Abimelecqa soldadosninta kinsaman t'aqarqa, chay camponejpitaj pakaykukorqa; maypachachus Siquem llajtamanta kajkuna llojsimusqankuta rikuspa, chaypacha pakakusqanmanta llojsiytawan paykunawan maqanakorqanku.

⁴³

⁴⁴Abimelecqa runasninwan ima llajta punkukama kachaykukorqanku, chaypitaj sayaykukorqanku, chay waj iskay t'aqastaj maqanakuspa wañurachisharqanku chay campopi tukuy kajkunata.

⁴⁵Tukuy p'unchaynintinta Abimelecqa Siquem llajtayoj runaswan maqanakorqa atipanankama. Chaypacha chay llajtata phirerqa tukuy chaypi tiyakojkunatataj wañuracherqa, chay llajtamantaj kachita qhalliykorqa.

⁴⁶Migdal-siquemmanta kajkuna yachaytawan Abimelecpa ruwasqasninta, rispa pakarakamorqanku El-Berit nisqa yupaychana wasej pakakunampi.

⁴⁷Abimelectaj yacharqa chay pakakuna wasipi tukuy tantasqas kashasqankuta.

⁴⁸Chaypacha tukuy runasninwan ima chay Salmón nisqa orqoman rerqa, uj hachawantaj k'utorqa uj sach'aj ramanta, chayta lijrariykukuspataj tukuy runasninman nerqa, usqhayta pay jinallataj tukuyninku ruwanankuta.

⁴⁹Tukuyninku ramasta k'uturakuspa lijrariykukuytawan qhaterqanku Abimelecta chay yupaychana wasej pakakunankama. Chaypitaj ramasninkuta qolluykuytawankama ninata jap'iykucherqanku. Jinamanta Migdal-siquempi tiyakojkunata wañucherqanku, paykuna karqanku qharispiwan warmispiwan uj waranqa jina.

⁵⁰Chay qhepantataj Abimelecqa Tebesmanñataj kachaykukorqa, chay llajtata runasninwan muyuykuytawan jap'irparerqa.

⁵¹Llajtaj chaupimpitaj uj torre karqa, chay llajtamanta kajkunataj chaypi pakasqas kasharqanku qharis chantá warmis, kurajkunasninku ima. Punkusta wisq'aykuytawan torrej patanman wicharerqanku.

⁵²Abimelectaj torre chaynejkama maqanakuspa chayarqa, punkumantaj qayllaykorqa ninawan jap'iykuchinampaj.

⁵³Uj warmitaj kutana rumiwan choqaykamuspa Abimelecpa umanta jusk'urparerqa.

⁵⁴Abimelectaj usqhayta wajyarqa armasta apaykachaj yanapajninta, nerqataj: Espadaykita orqhoy wañuchipuwaytaj, mana munanichu warmillaraj wañuchisqa ninawankuta. Jinamanta chay yanapajnin runaqa uj espadawan t'ojsispa pasarparicherqa, wañorqataj.

⁵⁵Israelitastaj Abimelec wañusqanta rikuytawan sapa ujninku wasisninkuman kutiporqanku.

⁵⁶Ajinamanta Diosqa pagachikorqa Abimelecwan, chay qanchis chunka hermanosninta wañuchispa tatampa contrampi ruwasqanmanta.

⁵⁷Ajinallatataj Diosqa Siquem llajtapi kaj runaswan pagachikorqa tukuy sajrata ruwasqankumanta. Jinamanta junt'akorqa paykunapi Jerobaalpa wawan Jotampa maldicisqanqa.