Read Quechua Bolivia DC Bible APOCALIPSIS 1 Bible Online

APOCALIPSIS 1 - Quechua Bolivia DC Bible bible

APOCALIPSIS 1

¹Jesucristoj sut'inchasqan, mayqentachus Dios payman qorqa, kamachisninman rejsichinampaj, imaschus usqhayta ruwakunankuta. Chaykunamantaqa yachacherqa kamachin Juanman, angelnejta.

²Juanqa willarqa chay tukuy imata rikusqanmanta, Diospa palabranmanta, Jesucristoj willasqanmantawan.

³Kusikuyniyojmin pichus kay sut'inchaypa palabrasninta leejqa, uyarejkunapis. Ajinallatataj pikunachus chaypi escribisqa kajkunata waqaychanku; chay p'unchayqa qayllapiña kashanku.

⁴Noqa, Juan, escribimuni Asiapi kaj qanchis iglesiasman: Khuyakuy, sonqo tiyasqa kaytaj qankunawan kachun, pimantachus kunan kashan, karqataj, jamonqataj chaymanta; qanchis espiritusmantawan, pikunachus tronompa ñaupaqempi kashan, chaykunamanta; Jesucristomantapis, pichus sumaj testigo, junt'ajtaj, wañusqakunamanta kuraj kaj, kay mundopi kaj reyespa kamachejnintaj. Payqa munakuwarqanchej, mayllawarqanchejtaj juchasninchejmanta yawarninwan.

⁶Cristoqa reyesta, sacerdotestataj kamachimpaj Dios Tatampaj churawarqanchej. Payman janaj pacha k'anchay, atiytaj, wiñay wiñaypaj kachun. Amén.

⁷Qhawaychej, Cristo phuyuswan jamushan, tukuy ñawitaj payta rikonqa, jinallataj payta t'ojsejkunapis; tukuy ayllustaj paymanta manchayta waqanqanku. Arí. Amén.

⁸Noqa kani Alfa Omegataj, nin Señor Dios Tukuy Atiyniyoj, pichus kunan kashan, karqataj, jamonqataj.

⁹Noqa, Juan, hermanoykichej, qankunawan khuska llakiypi, Jesucristoj reinompi, pacienciampitaj chayaqeyoj kani. Patmos nisqa churupi kasharqani Diospa palabranmanta, Jesucristomantawan willasqayrayku.

¹⁰Uj kuti Señorpa p'unchaynimpi, Espíritoj atiyninwan kasharqani, qhepaypitaj uj sinch'ita parlamojta, trompetaj waqayninta jina uyarerqani.

¹¹Nerqataj: Imatachus rikusqaykita uj libropi Escribiy, Asiapi kaj chay qanchis iglesiasmantaj apachiy: Efesoman, Esmirnaman, Pergamoman, Tiatiraman, Sardisman, Filadelfiaman, Laodiceaman ima.

¹²Parlamuwajta rikunaypaj kutirikorqani; kutirikuspataj, qanchis qori k'anchachinasta rikorqani.

¹³Chay qanchis k'anchachinas chaupimpitaj uj runata jina rikorqani, qhoysu p'achayojta, pechompitaj qori chumpiwan chumpisqata.

¹⁴Umantaj, chujchasninwan yuraj millma jina yuraj karqa, rit'i jina; ñawisnintaj nina larway jina.

¹⁵Chakisnintaj llusk'achasqa lliphipej bronceman rijch'akorqanku, k'ajashaj hornopi jina; parlasqampis ashkha yakuspa sonasqanman jina.

¹⁶Paña makimpitaj qanchis qoyllurkunata jap'isharqa; siminmantataj iskay filoyoj espada llojsimusharqa; uyantaj karqa inti sinch'ita lliphipishaj jina.

¹⁷Payta rikuspataj, wañusqa jina chakisninman urmarqani. Paytaj makisninta churaykuwarqa, nispa: Ama mancharikuychu. Noqa kani ñaupaj kaj, qhepa kajtaj.

¹⁸Noqa kani kausaj, wañusqataj karqani, kunantaj wiñay wiñaypaj kausashani. Wañuypa llavesnintapis, infiernoj llavesnintawan noqa jap'ini.

¹⁹Escribiy ari rikusqaykita kunan kajkunamanta, qhepa kajkunamantapis.

²⁰Pakasqa yachacheyqa chay qanchis qoyllurkunamanta, paña makiypi rikusqayki chay qanchis k'anchachinasmantawanqa, kay jina: Qanchis qoyllurkunaqa, qanchis iglesiaspa angelesnin; qanchis k'anchachinas rikusqaykitaj, qanchis iglesias kanku.