Read Quechua Bolivia DC Bible APOCALIPSIS 13 Bible Online

APOCALIPSIS 13 - Quechua Bolivia DC Bible bible

APOCALIPSIS 13

¹Mar qocha t'iyu patapi sayaykukorqani. Rikorqanitaj mar qochamanta uj phiña animalta wicharimushajta, chunka wajrayojta, qanchis umayojtataj; wajrasnin patapitaj chunka pilluyoj, umasnin patapitaj Diospaj sajrata rimay sutisniyoj.

²Chay phiña animalta rikusqaytaj uj pumaman rijch'akorqa, chakisnintaj jukumarejta jina, simintaj leompa simin jina. Sierpetaj chayman atiyninta, trononta, jatun kamachiynintawan qorqa.

³Ujnin umanta rikorqani wañunampaj jina k'irisqata. Wañuypaj k'iriynintaj thañikaporqa. Tukuy kay pachapi runas t'ukuspa chay phiña animalta qhaterqanku.

⁴Sierpetataj yupaycharqanku, mayqenchus phiña animalman atiyta qorqa. Phiña animaltapis yupaychallarqankutaj, nispa: Pitaj chay phiña animal jina, pitaj paywan maqanakuyta atenqari?

⁵Payman simi qosqa karqa, jatuchaj imasta, Diospaj sajrata parlaykunatawan parlanampaj. Atiytapis qorqanku chay imasta ruwanampaj, tawa chunka iskayniyoj killa junt'ata.

⁶Simintataj kicharerqa sajrata rimaspa Diospaj, sutimpaj, wasimpaj, janaj pachapi tiyakojkunaj contranta ima.

⁷Payman qollarqankutaj Diospaj ajllasqasninwan maqanakuspa atipanampaj. Ajinallatataj aterqa kamachiyta tukuy ayllusta, llajtasta, waj laya parlaykunapi parlajkunata, tukuy runasta ima.

⁸Tukuy jallp'api tiyakojkunataj payta yupaycharqanku; manataj paykunaj sutinkoqa escribisqachu karqa Corderoj kausaynimpa librompeqa. Corderoqa wañuchisqa karqa kay mundoj qallariyninmantapacha.

⁹Pillapis ningriyoj kajqa, uyarichun:

¹⁰Pillapis presochajqa, presochasqallataj kanqa. Pillapis espadawan wañuchejqa, espadallawantaj wañuchisqa kanqa. Kaypimá kashan ajllasqaspa pacienciankoqa, feninkutaj.

¹¹Chay qhepata, uj phiña animalta jallp'amanta wicharishajta rikorqani iskay wajrasniyojta, corderota jina, sierpe jina parlajta.

¹²Ñaupaj phiña animal jina tukuy atiyniyoj karqa paypa ñaupaqempi, kay pachawan, chaypi tiyakojkunawan, chay ñaupa phiña animalta yupaychacherqa, pejpatachus chay wañuyman apaj k'irisnin thañisqa karqa.

¹³Manchay jatuchaj rikuchinasta ruwarqa, ninatapis janaj pachamanta kay pachaman uraykuchimorqa runaspa ñaupaqenman.

¹⁴Ñaupaj phiña animalpa ñaupaqempi, jatuchaj rikuchinasta ruwanampaj atiyta qorqanku. Chaykunawantaj kay pachapi tiyakojkunata ch'aukiyarqanku; kamacherqataj paykunaman ruwanankuta phiña animalpa lantinta, pichus espadawan k'irisqa karqa, kausarqataj.

¹⁵Payman atiyta qorqanku, phiña animalpa lantinman kausaj espirituta qonampaj, lantintaj parlanampaj. Kamacherqataj phiña animalpa lantinta yupaychanankuta, mana yupaychajtarí wañuchinankuta.

¹⁶Kamachillarqataj juch'uykunaman, jatuchejkunaman, qhapajkunaman, pisichikojkunaman, kacharisqasman, kamachisman ima, paña makisninkupi, chayrí frentesninkupi marcata churakunankuta.

¹⁷Manataj pipis rantiyta, chayrí qhatuyta atejchu, astawanqa marcayoj kajlla, chayrí phiña animalpa sutinwan, chayrí sutimpa yupayninwan kajlla.

¹⁸Kaypi yachay tiyan. Yachayniyojqa phiña animalpa yupayninta yupachun. Chayqa runaj yupayninmin. Chaypa yupaynintaj, sojta pachaj sojta chunka sojtayoj.