Read Quechua Bolivia DC Bible APOCALIPSIS 15 Bible Online

APOCALIPSIS 15 - Quechua Bolivia DC Bible bible

APOCALIPSIS 15

¹Rikorqani janaj pachapi waj rikuchiyta jatunta t'ukunapaj jina. Qanchis ángeles jap'isharqanku qanchis qhepa jasut'iykunata, imaraykuchus chaykunawan Diospa phiñakuynin junt'akusharqa.

²Rikullarqanitaj vidriomanta jina uj mar qochata ninawan chajrusqata. Ajinallatataj rikorqani phiña animalta atipajkunata, lantintawan, marcantawan, sutimpa yupaynintawan vidriomanta mar qocha patapi sayashajta, Diospa arpasnin jap'irisqas.

³Diospa kamachin Moisespa takiyninta, Corderoj takiynintawan takisharqanku, nispa: Ancha jatuchaj, t'ukunapajtaj ruwasqasniykeqa, Señor Dios, Tukuy Atiyniyoj. Cheqantaj, cheqataj kanku ñankunasniykeqa. Qanqa tukuy laya runaspa Reynin kanki.

⁴Pitaj mana qanta manchachikunmanchu Señor? Pitaj atiyniykita mana jatunchanmanchu? Qanlla Santo kanki. Chayrayku tukuy runas ñaupaqeykiman jamonqanku, yupaychasonqankutaj. Cheqan juzgasqasniykeqa rejsisqas kanku.

⁵Kay imaspa qhepanta rikorqani, templota janaj pachapi kicharisqata, willanapaj santuariontawan.

⁶Templomanta qanchis ángeles llojsimorqanku, qanchis jasut'iykunata jap'irisqas, llimphu k'anchaj linowan p'achallisqas, pechosninkutaj qori chumpiwan chumpisqas.

⁷Tawa animalmanta ujnin kaj, qanchis angelesman qanchis qori vasosta qorqa, Diospa phiñakuyninwan junt'asqasta. Diosqa wiñay wiñaypaj kausan.

⁸Templotaj q'osñiwan junt'aykorqa, Diospa k'anchayninrayku, atiyninraykutaj. Manataj pipis temploman yaykuyta atejchu, chay qanchis angelespa, qanchis jasut'iykuna jap'isqanku junt'aykunankama.