Read Quechua Bolivia DC Bible APOCALIPSIS 3 Bible Online

APOCALIPSIS 3 - Quechua Bolivia DC Bible bible

APOCALIPSIS 3

¹Sardis iglesiaj angelninman escribiy: Kayta nin pichus Diospa qanchis espiritusninta, qanchis qoyllurkunatawan jap'in, chay: Ruwasqasniykita rejsini. Yachanitaj sutiykitaj kausajpata jina kasqanta. Chaywampis wañusqa kashanki.

²Mana puñuspa qhaway. Chay wakin wañupushankuña chaykunata kallpachay; imaraykuchus ruwasqasniykita mana allintachu Diosniypa ñaupaqempi tarini.

³Yuyariy ari imatachus jap'isqaykita, uyarisqaykitawan. Chaytaqa waqaychaytaj. Juchamanta kutirikuy. Manachus mana puñuspa qhawanki chayqa, suwa jina jamusqayki, nitaj ima horapichus jamunayta yachankichu.

⁴Pisi runas kanku Sardispi p'achankuta mana ch'ichichajkuna. Paykunaqa yuraj p'achaswan p'achallisqas noqawan purenqanku, chaypaj jina kasqankurayku.

⁵Ajinata atipajqa yurajwan p'achallikonqa, manataj kausay libromanta sutinta pichasajchu. Tataypa ñaupaqempi, angelesnimpa ñaupaqempitaj sutinta rejsichisaj.

⁶Ningriyoj kajqa uyarichun imatachus Espíritu iglesiasman nisqanta.

⁷Filadelfia iglesiaj angelninman escribiy: Kayta nin llimphu kaj, cheqa kaj, pichus Davidpa llaventa jap'in, chay. Pay punkuta kichajtin mana pipis wisq'ayta atinchu. Punkuta wisq'ajtintaj, mana pipis kichayta atinchu. Chaymin kayta nin:

⁸Rejsini ruwasqasniykita. Qhaway, ñaupaqeykipi uj punkuta churani. Chaytaqa mana pipis wisq'ayta atinchu; imaraykuchus uj chhinka kallpayojllaraj kanki, palabraytataj waqaycharqanki, sutiytapis mana qhesacharqankichu.

⁹Qhaway, wakinta Satanaspa tantakuna wasinmanta kajkunata qosqayki. Pikunachus judíos kayku ninku, manataj judioschu, llullas kanku. Paykunata kamachisaj jamunankuta chakisniykiman qonqorikoj, yachanankupajtaj munakususqayta.

¹⁰Qanqa nisqayman jina pacienciakorqanki, noqapis qanta waqaychasqayki tentación horapi, chaytaj tukuy mundoman jamonqa, mundopi tiyakojkuna rejsisqas kanankupaj.

¹¹Usqhayta jamusaj. Chay kapususqanta allinta jap'iy, ama pipis pilluykita qhechusunampaj.

¹²Atipajtaqa uj pilarta jina sayachisaj Diosniypa wasimpi, ama jayk'aj jawaman llojsinampaj, Diosniypa sutintataj paypi escribisaj, Diosniypa llajtampa sutintawan. Chayqa mosoj Jerusalén. Chaytaj janaj pachamanta uraykamun, Diosniypamanta, mosoj sutiywantaj.

¹³Ningriyoj kajqa uyarichun imatachus Espíritu iglesiasman nisqanta.

¹⁴Laodicea iglesiaj angelninman escribiy: Kayta nin Amén nisqa, allinta junt'aj, cheqa kajtaj, pichus tukuy ima Diospa ruwasqasninmanta qallariynin, chay:

¹⁵Ruwasqasniykita rejsini, mana chirichu, nitaj q'oñichu kasqaykitawan. Allin kanman chiri, chayrí rupha kanayki.

¹⁶Q'oñiyasqalla kanki, mana chirichu, nitaj ruphachu. Chayrayku simiymanta ajtumusqayki.

¹⁷Qanqa nishanki: Qhapaj kani, allin riwarqa, manataj imapipis pisisqachu kani. Qanqa mana reparakunkichu, khuyana, mana imayoj, wajcha, mana rikoj, q'alallataj kasqaykita.

¹⁸Qanta umachayki noqamanta rantikunaykita ninapi ch'uwachasqa qorita, qhapaj kanaykipaj; rantikunaykitataj yuraj p'achata p'achallikunaykipaj, ama q'ala kasqaykej p'enqaynin rikukunampaj rantikunaykitataj; ñawisniykipaj ñawi jampinata, rikunaykipaj.

¹⁹Tukuy munakusqasniyta k'amini, jasut'initaj. Sonqochakuy ari, juchamantataj kutirikuy.

²⁰Qhaway, punkupi kashani, wajyashanitaj. Sichus uj runa wajyasqayta uyarin, punkutataj kicharimun chayqa, noqaqa paypaman yaykusaj. Paywantaj mikhusaj, paytaj noqawan mikhonqa.

²¹Atipajtaqa noqawan tronoypi tiyachisaj. Noqapis atiparqani, chayrayku Tataypa tronompi tiyaykukorqani.

²²Ningriyoj kajqa uyarichun imatachus Espíritu iglesiasman nisqanta.