Read Quechua Bolivia DC Bible APOCALIPSIS 4 Bible Online

APOCALIPSIS 4 - Quechua Bolivia DC Bible bible

APOCALIPSIS 4

¹Kay imaspa qhepanta, janaj pachapi rikorqani uj punku kichasqata. Ñaupaj vozta uyarisqayqa, trompetaj waqayninman rijch'akorqa, parlamuwaspataj niwarqa: Kayman wicharimuy, imaschus kay qhepata ruwasqas kananku tiyan, chaykunata rikuchisqayki.

²Chay kikimpachataj, noqa Espíritoj atiynimpi kasharqani, rikorqanitaj janaj pachapi uj trono churasqata. Chay trono patapitaj uj runa tiyasqa kasharqa.

³Chay runataj jaspe rumiman, cornalina rumimantaj rijch'akorqa. Tronoj muyuynimpitaj uj k'uychi, esmeralda rumiman rijch'akoj karqa.

⁴Chay tronoj muyuynimpitaj, iskay chunka tawayoj tiyanas karqanku. Chay tiyanas patapitaj iskay chunka tawayoj kuraj runasta rikorqani tiyasqasta, yuraj p'achawan p'achallisqasta, umasninkupi qori pillusniyojtataj.

⁵Tronomantataj llojsimusharqanku lliuj lliujkuna, qhon qhonkuna ima. Qanchis nina k'anchaykunataj, tronoj ñaupaqempi larwasharqanku. Chaykunaqa Diospa qanchis espiritusnin kanku.

⁶Tronoj ñaupaqempitaj vidriomanta mar qocha jina cristalman rijch'akoj karqa. Trono chaupipitaj, muyuynimpi ima, tawa kausajkuna, ñaupajninkupi, qhepankupipis ñawiswan junt'asqas karqanku.

⁷Ñaupaj kaj kausajqa leonman rijch'akorqa. Iskay kaj animaltaj toroman rijch'akorqa. Kinsa kaj animaltaj runa uyayoj jina karqa. Tawa kaj animaltaj phawashaj ankaman rijch'akorqa.

⁸Chay tawantin animalesqa sapa ujninku sojta lijrasniyoj muyuyninkupi, tukuy ukhunkupitaj ñawiswan junt'asqas karqanku; manataj tuta p'unchay samajchu kanku, nispa: Santo, Santo, Santo, Señor Dios Tukuy Atiyniyoj, pichus karqa, kantaj, jamonqataj.

⁹Chay animalesqa yupaychankupuni, jatunchankutaj, graciasta qospa tronopi tiyasqa kajman, pichus wiñay wiñaypaj kausan, chayman.

¹⁰Chay iskay chunka tawayoj kuraj runas, tronopi tiyasqa kajpa ñaupaqempi qonqoriykukuspa, yupaychasharqanku wiñay wiñaypaj. Pillusninkutataj tronoj ñaupaqenman churaspa, nisharqanku:

¹¹Allimpaj qhawasqa kanki, Señor Diosniyku, yupaychayta, jatun kayta, atiyta ima jap'inaykipaj. Qan tukuy imata wakicherqanki, munayniykiraykutaj kanku, ruwasqastaj karqanku.