Read Quechua Bolivia DC Bible APOCALIPSIS 7 Bible Online

APOCALIPSIS 7 - Quechua Bolivia DC Bible bible

APOCALIPSIS 7

¹Kay imas qhepata rikorqani tawa angelesta, jallp'aj tawantin cantompi sayashajta. Paykunataj jallp'aj tawantin wayrasta jark'asharqanku, ama ima wayra jallp'a pataman wayramunampaj, nitaj mar qocha pataman, nitaj ima sach'a patamampis.

²Rikullarqanitaj waj angelta inti llojsimuynejmanta wicharimojta, kausaj Diospa sellon oqharisqata. Qhaparerqataj sinch'ita chay tawa angelesta, paykunamantaj atiy qosqa karqa, mar qochata, jallp'atawan nanachinankupaj.

³Nerqataj: Ama imanaychejchu jallp'ata, nitaj mar qochata, nitaj sach'astapis, Diosninchejpa kamachisninta frentesninkupi sellanaykukama.

⁴Sellasqakunaj yupaynintaj uyarerqani: Israelpa churisnin tukuynin ayllusmanta, pachaj tawa chunka tawayoj waranqa sellasqas karqanku.

⁵Judajpa ayllunmanta chunka iskayniyoj waranqa. Rubempa ayllunmanta chunka iskayniyoj waranqa. Gadpa ayllunmanta chunka iskayniyoj waranqa.

⁶Aserpa ayllunmanta chunka iskayniyoj waranqa. Neftalejpa ayllunmanta chunka iskayniyoj waranqa. Manasespa ayllunmanta chunka iskayniyoj waranqa.

⁷Simeompa ayllunmanta chunka iskayniyoj waranqa. Levejpa ayllunmanta chunka iskayniyoj waranqa. Isacarpa ayllunmanta chunka iskayniyoj waranqa.

⁸Zabulompa ayllunmanta chunka iskayniyoj waranqa. Josejpa ayllunmanta chunka iskayniyoj waranqa. Benjamimpa ayllunmantapis chunka iskayniyoj waranqa sellasqas.

⁹Kay imaspa qhepanta, ancha ashkha runata rikorqani, mana yupay atinata tukuy llajtamanta, ayllumanta, runasmanta, tukuy parlaykunamantawan. Paykunaqa tronoj ñaupaqempi, Corderoj ñaupaqempi kasharqanku, yuraj p'achaswan p'achallisqas. Palmastataj makisninkupi jap'isharqanku.

¹⁰Paykunataj sinch'ita qhaparispa nerqanku: Salvacionqa Diosninchejpata, pichus tronopi tiyasqa kashan chaypata, Corderojpatawan.

¹¹Tukuy angelestaj, tronoj, kurajkunaj, tawa animalespa muyuynimpi sayasharqanku. Qonqoriykukuspataj k'umuykukorqanku Diosta yupaychanankupaj.

¹²Nerqankutaj: Amén. Khuyakuy, yupaychay, yachay, graciasta kutichiy, jatunchay, atiy, kallpachay, Diosninchejman wiñay wiñaypaj kachun. Amén.

¹³Chay kuraj runasmanta ujnin tapuwaspa, niwarqa: Chay yuraj p'achaswan p'achallisqas, pikunataj kanku, maymantataj jamorqankuri?

¹⁴Noqataj payman kuticherqani: Wiraqochi, chaytaqa qan yachanki, nispa. Paytaj niwarqa: Kaykunaqa jatun llakiymanta jamojkuna kanku. P'achasninkuta t'ajsarqanku, Corderoj yawarnimpitaj yurajyacherqanku.

¹⁵Chayrayku Diospa tronompa ñaupaqempi kashanku, tuta p'unchaytaj templopi yupaychanku; tronopi tiyajtaj wasi toldonta paykunaman qhataykonqa.

¹⁶Manaña astawan yarqhachikonqankuchu, nitaj ch'akichikonqankuchu, nitaj intipis paykunaj patanman k'ajaykamonqachu, nitaj ni ima q'oñipis.

¹⁷Trono chaupipi kashaj Corderoqa paykunata michenqa, kausaj yaku pujyusninmantaj pusanqa. Diostaj paykunaj ñawisninkumanta tukuy waqayta pichanqa.