Read Quechua Bolivia DC Bible APOCALIPSIS 8 Bible Online

APOCALIPSIS 8 - Quechua Bolivia DC Bible bible

APOCALIPSIS 8

¹Qanchis kaj sellota Cordero kicharejtintaj, janaj pachapi khuskan horata jina ch'in karqa.

²Rikorqanitaj Diospa ñaupaqempi qanchis angelesta sayashajta. Paykunamantaj qanchis pututus qosqa karqa.

³Waj angeltaj jamuspa altarpa ñaupaqempi sayaykorqa, qorimanta incienso q'osñichina oqharisqa. Ashkha inciensotaj payman jaywasqa karqa, tukuy ajllasqaspa mañakuyninkuman yapaykunampaj tronoj ñaupaqempi, chay qori altarpi.

⁴Inciensoj q'osñintaj angelpa makinmanta Diospa ñaupaqenman wicharerqa, ajllasqaspa mañakusqasninkuwan.

⁵Angeltaj incienso q'osñichinata jap'ispa, altar patapi kaj ninawan junt'aykucherqa. Chaytataj jallp'aman thalliykamorqa. Chaypacha karqanku qhon qhonkuna, lliuj lliujkuna, jallp'a kuyuriy ima.

⁶Qanchis angelestaj, sapa uj trompetanta waqachinampaj wakichikorqanku.

⁷Ñaupaj kaj angeltaj trompetanta waqacherqa; chaypacha, granizo, ninawan, yawarwan ima chajrusqa jallp'aman urmamorqa. Jallp'aj kinsa kaj suyunmanta ujnin kaj ruphaykorqa, sach'asmanta kinsa kaj rak'iyninmanta ujnin kaj ruphaykorqa, tukuy q'omer qhorapis ruphaykullarqataj.

⁸Iskay kaj angeltaj trompetata waqacherqa. Uj jatun orqo jinataj, ninawan larwashaj mar qochaman wijch'uykukorqa, mar qochaj kinsa kaj t'aqaynintaj yawarman tukuporqa.

⁹Mar qochapi kausajkunamanta kinsa kaj t'aqaynin wañorqa, barcosmantapis kinsa kaj t'aqaynin p'ultisqa karqa.

¹⁰Kinsa kaj angeltaj trompetata waqacherqa. Janaj pachamantataj uj jatun ch'aska urmamorqa, uj k'anchay jina larwaspa; mayuspa kinsa kaj t'aqanman urmarqa, yaku pujyusmanwan.

¹¹Chay ch'askaj sutintaj Ajenjo nisqa karqa. Yakuspa kinsa kaj t'aqaynintaj ajenjoman tukuporqa; ashkha runastaj chay yakuswan wañurarqanku; yakustaj jayaman tukuporqanku.

¹²Tawa kaj angeltaj trompetata waqacherqa. Intej kinsa kaj t'aqan, killaj kinsa kaj t'aqan, qoyllurkunajtapis kinsa kaj t'aqan wajtasqa karqa. Chayrayku p'unchaypa kinsa kaj t'aqan manaña k'ancharqachu, ajinallataj tutajtapis.

¹³Rikorqanitaj uj angelta, janaj pachaj chaupinta phawashajta, uyarerqanitaj nejta: Ay, ay, ay, jallp'api tiyakojkunamanta! Chay kinsa angelesqa, trompetasta waqachinankuraj tiyan, nispa.