Read Quechua Bolivia DC Bible APOCALIPSIS 9 Bible Online

APOCALIPSIS 9 - Quechua Bolivia DC Bible bible

APOCALIPSIS 9

¹Phishqa kaj angeltaj trompetata waqacherqa. Chaypacha rikorqani uj qoyllurta janaj pachamanta jallp'aman urmamojta; ukhu pacha pujyoj llavesnintataj payman qorqanku.

²Ukhu pacha pujyutataj kicharerqa, pujyoj q'osñintaj wicharimorqa uj jatun hornoj q'osñin jina. Intitaj, wayrapis laqhayaykorqa chay pujyoj q'osñinrayku.

³Q'osñimantataj langostas jallp'aman llojsimorqanku, atiytaj paykunaman qosqa karqa; imaynatachus atoj atoj khurus atiyniyoj kanku, ajinata.

⁴Chay langostas kamachisqas karqanku ama imananankupaj jallp'api kaj qhorasta, ni ima q'omerta, nitaj ima sach'atapis; astawanqa runasta, pikunachus frentesninkupi Diospa sellonta mana apankuchu, chaykunallata.

⁵Kamachillarqankutaj ama wañuchinankuta chay runasta; astawanqa phishqa killata chay runasta ñak'arichinankuta; ñak'ariyninkutaj karqa, imaynatachus runa ñak'arin atoj atoj payta wach'ejtin, ajinata.

⁶Chay p'unchaykunapi runas wañuyta mask'anqanku, manataj tarenqankuchu; wañuyta munanqanku, wañuytaj paykunamanta ayqenqa.

⁷Chay langostasqa rijch'akorqanku maqanakupaj wakichisqa caballosman; umasninkupitaj qori pillus jina churasqas karqanku, uyasninkutaj runa uyas jina karqanku.

⁸Chujchasninkoqa warmikunaj chujchasnin jina karqanku. Kirusninkutaj leonespa kirusnin jina karqanku.

⁹Pechoquerasninkoqa karqanku, fierro pechoqueras jina, lijrasninkoj sonasqanrí, carrospa sonasqan jina, imaynatachus ashkha caballoswan phawanku maqanakuman, ajinata.

¹⁰Atoj atojpata jina chupasninkoqa wach'inasninkupis karqanku. Chupasninkupitaj atiyniyoj karqanku runasta phishqa killata ñak'arichinankupaj.

¹¹Ukhu pachaj angelninta reyninkupaj jap'inku; sutintaj hebreo parlaypi Abadón, griego parlaypitaj Apolión.

¹²Ñaupaj kaj way ripunña. Kunanqa, iskay, way nispa qhapariykunaraj kaypa qhepanta jamonqanku.

¹³Sojta kaj angeltaj trompetata waqacherqa. Uyarerqanitaj parlamojta, qori altarpa tawantin cantosninmanta. Chaytaj Diospa ñaupaqempi kasharqa.

¹⁴Nerqataj sojta kaj angelman, pichus trompetata jap'isharqa chayman: Eufrates jatun mayu qayllapi tawa watasqa angelesta phaskaramuy, nispa.

¹⁵Chay tawa angelestaj phaskarasqas karqanku, pikunachus chay horapaj, chay p'unchaypaj, chay killapaj, chay watapaj wakichisqas karqanku, runaspa kinsa kaj t'aqanta wañurachinankupaj.

¹⁶Ejércitoj yupakuynintaj, caballospi rejkuna iskay pachaj millones karqanku. Noqataj uyarerqani paykunaj yupayninkuta.

¹⁷Chay jinamanta uj rikhuriypi caballosta rikorqani, chaykunapi lloq'asqa kajkunatapis. Paykunaj pechoquerasninkoqa ninamanta karqanku, jacinto rumimanta, azufremantawan. Caballospa umasninkutaj, leonespa umasnin jina karqanku. Simisninkumantataj nina q'osñi, azufretaj llojsimusharqa.

¹⁸Kay kinsa jasut'iykunawantaj, runaspa kinsa kaj t'aqan wañorqa ninawan, q'osñiwan, azufrewantaj. Chaykunaqa caballospa simisninkumanta llojsimusharqanku.

¹⁹Caballospa atiynenqa siminkupi, chupasninkupi ima kasharqanku; imaraykuchus chupasninkoqa katarej umasninman rijch'akunku; chaykunawantaj wach'inku.

²⁰Chay waj runas mana wañorqankuchu chay jasut'iykunawan; nitaj chaywampis makisninkoj ruwasqasninmanta Diosman kutirikorqankuchu, supaykunata yupaycharqanku, lantistawan, qorimanta ruwasqasta, qolqemanta, broncemanta, rumimanta, k'aspismanta ima. Chaykunaqa mana qhawayta atinkuchu, nitaj uyariyta, nitaj puriytapis.

²¹Manataj kutirikorqankuchu juchasninkumanta, runata wañuchisqankumanta, layqachisqankumanta, qhenchachakusqankumanta, suwasqasninkumanta ima.