Read Quechua Bolivia DC Bible RUT 1 Bible Online

RUT 1 - Quechua Bolivia DC Bible bible

RUT 1

¹Maypachachus jueces Israelta kamachishajtinku, uj yarqhay jamorqa tukuynin jallp'aman. Chaypacha Judapi Belenmanta uj runa Elimelec sutiyoj pisi tiempopaj tiyakapoj rerqa chay Moab jallp'aman. Payman rillarqataj warmin Noemí chantá iskaynin qhari wawasnin Mahlón jinataj Quelión ima. Tukuyninku Efrata jallp'amanta karqanku, chayri Belén llajtamanta karqa. Moab jallp'aman chayaspa chaypi tiyakapoj qhepakorqanku.

³Noeméj qosan Elimelectaj chaypi wañuporqa, chayllapitaj warmin iskaynin wawasnillanwan qhepakaporqanku.

⁴Aswan qhepamantaj wawasnin casarakaporqanku Moab jallp'amanta kaj warmiswan; ujnimpata Orfa sutin karqa, chay ujnimpatataj Rut. Chunka watanman jinataj wañupullarqankutaj Mahlón chantá Queliompis, Noemitaj mana piniyoj saqerpayasqa rikhurerqa, mana wawasniyoj nitaj qosayoj.

⁶Uj p'unchaypirí Noemí Moabpi uyarisqa nejta Señorqa ayllunmanta khuyakusqanta, chanta chay yarqhay watasta tukuchisqantaña.

⁷Chaypacha Noemí qhachunisninwan khuska Judá jallp'aman riporqa, tiyakorqanku chaymanta llojsispa.

⁸Ñampitaj nerqa paykunata: Ripuychej, kutipuychej wasiykichejman mamaykichejpaman. Señor qankunamanta khuyakuchumpuni, imaynatachus qankunapis noqamanta wawasniymantapis khuyakorqankichej jinata.

⁹Jinataj Señor munachun watejmanta casarakuspa uj kusiy aylluta jatarichikunaykichejta. Chantá Noemí much'aykuytawankama paykunamanta t'aqakaporqa. Paykunataj mayta waqarqanku nerqankutaj: Mana! Noqayku qanwan llajtaykiman riyta munayku!

¹¹Noemí nillarqataj: Kutipuychej wawasníy. Imapajñataj noqawan riwajchej? Manaña noqajtaqa wawasniy kanqañachu qankunawan casarakunankupaj jinaqa.

¹²Ripuychej, kutipuychej wasiykichejman. Watejmanta casarakunaypajpis payaña kani. Jina kanman chaypis, kunan ch'isipacha casarakuspa wawasniyoj rikhurejtiypis, suyawajchejchu qankuna jatuchaj kanankukama paykunawan casarakunaykichejpaj? Mana, piwan kasarakuspa paykunata suyawajchejchu? Mana wawasníy, ni imaynamanta atikunchu. Señor apachimuwan ashqha llakiykunasta may jinatarajchus phutikuyman qankunata llakikojta rikuspaqa.

¹⁴Paykunarí watejmanta sinch'ita waqallarqankutaj. Jinapis Orfaqa ujta much'aykuspa suegranmanta t'aqakaporqa, Ruttaj paywan qhepakaporqa.

¹⁵Chaypacha Noemí nerqa: Qhaway qhachuni masiyki llajtanman dioskunasninmantaj kutipun. Qampis ripuy, wawáy.

¹⁶Ruttaj kuticherqa: Ama mañawaychu saqesunayta nitaj qanmanta t'aqakunayta! Noqa risaj maymanchá rinki chayman, kausamusajtaj maypichá kausamunki chaypi. Llajtaykeqa llajtay kanqa, Diosniykipis Diosnillaytaj kanqa.

¹⁷Wañusaj maypichá wañunki chaypi, chayllapitaj p'ampawachunku. Wañuyllamin t'aqawasun, mana jina kanman chayri, Señor sinch'ita jasut'iwachun.

¹⁸Noemí rikorqa Rutta paywampuni riyta munasqanta, chayraykutaj manaña imatapis nerqachu.

¹⁹Ajinaqa iskayninku rerqanku ñannejta Belenman chayanankukama. Belenman chayajtinkukamataj tukuynin llajtapi runas mayta qhollpikorqanku paykunata rikuspa. Warmis nerqanku: Manachu kayqa Noemí?, nispa.

²⁰Paytaj kuticherqa: Ama sutichawaychejchu Noemí nispa, manachayqa Mara niwaychej, imaraykuchus tukuy Atiyniyoj Dios imaymana llakiykunaswan junt'achiwan.

²¹Kaymantaqa makisniy junt'ayoj llojserqani, kunantaj Señor munarqa ch'usaj makisniyoj kutimpunayta. Imaraykutaj Noemí nispa wajyawankichejmanri, Tukuy Atiyniyoj Dios wijch'uwajtin llakichiwajtintaj?

²²Ajinamin karqa imaynatachus Noemí jinataj Moabmanta Rut qhachuninwan kutipusqankoqa. Belenmantaj chayarqanku cebada oqhariyña qallarikushajtin.