Read Quechua Bolivia DC Bible RUT 4 Bible Online

RUT 4 - Quechua Bolivia DC Bible bible

RUT 4

¹Chay qhepatataj, Boozqa rerqa chukoj llajta yaykuna punkuman, maypichus runa tantakoj kanku, chayman. Chaypachapuni, mayqenmantachus Booz parlasharqa chay ayllun pasasharqa. Booz nerqa, Yú! Jamuy kayman, kaypi tiyarikuy, nispa. Chay aylloqa chimpaspa tiyarikorqa.

²Chaypachallataj Boozqa wajyarqa chay llajtamanta chunka kuraj runasta, paykunatawan khuskatataj tiyaykucherqa. Ña tiyaykojtinkukama, Booz nerqa chay ayllunta: Noemí, Moab jallp'amanta kutimporqa chay jallp'ata vendesaj nishan. Chay jallp'aqa wañoj ayllunchej Elimelecpata karqa.

⁴Yachanaykita munani rantiyta munanki chayqa kunan rantiy kay rikojkunajpa ñaupaqempi, chantá llajtamanta kuraj runaspa ñaupaqempi ima. Qan, Elimelecpa aswan qaylla ayllun kanki, chayrayku qan chay jallp'ata rantinayki atikun. Sichus mana rantinayanki chayqa, willapuway, qhepaykitaqa noqajta rantinay atikun. Chay aylloqa kuticherqa: Rantisaj nispa.

⁵Chaypacha Boozqa sut'incharqa, nispa: Kayta yachanayki tiyan, sichus Noeméj jallp'anta rantinki chayqa, Rutwan casarakunaykipuni kanqa chay moabita warmi sapawan, jinamanta chay jallp'aqa wañojpa sutillampipuni kanampaj.

⁶Kayta uyarispa chay ayllonqa kuticherqa nispa: Jina kajtenqa mana atiymanchu rantiyta, jinamanta ama alqachinaypaj chayaqeyta. Chaywampis, qan mana munajtiykeqa noqa rantinaytaqa, qanllaña rantikapuy.

⁷Jaqay wataspeqa Israel ukhupi uj costumbre kaj: Maypachachus uj ayllu jina imatapis jap'inman chayri ruwananta wajman qopoj kanku chaypacha. Jinataj maypachachus ruwaj kanku uj parlanakuta vendenanmanta chayri rantinanmanta chaypacha; pichus qopoj chayri vendepojqa, juk'utanta orqhokuspa chay ujman qopoj. Kay costumbre ruwayman jina, Boozpa ayllonqa juk'utanta orqhokuspa Boozman jaywarqa, nerqataj: Qan rantikapuy, nispa.

⁹Chantá Boozqa nerqa chaypi kajkunata: Tukuy qankuna rikojkuna kankichej, Elimelecpa, Queliompa, jinataj Mahalompa jallp'asninkuta rantisqayta Noemimanta.

¹⁰Jinallataj rikojkuna kankichej Rutta warmiypaj jap'isqaymanta. Payqa Moabmanta jamoj warmi sapa, chaywanqa wañoj qosan Mahalompa sutillampipuni kanqa chay jallp'aqa. Ajinaqa Mahalón mana qonqasqachu kanqa kausaqesninmanta nitaj llajtanmanta. Kunan qankuna chayta rikojkuna kankichej.

¹¹Tukuy chaypi kajkuna kurajkuna ima kuticherqanku: Arí, rikojkuna kayku, nispa. Señor munachun, wasiykiman yaykonqa chay warmeqa, Raquel chayri Lea jina kananta, pismantachus tukuy Israel ayllumanta kajkuna uraykamorqanchej! Qantaj uj sumaj rejsisqa runa jina kay Efrata llajtapi, jinataj allimpaj qhawasqa runa jina Belén llajtapipis.

¹²Señor qosuchun ashkha wawasta kay warminejta. Chantá may chhika ayllusniyojtaj kay, Tamarpa wawan Fares jina, Judajta jinataj.

¹³Ajina karqa Booz Rutwan casarakusqankoqa. Maypachachus khuskaña kajtinku, Señor munarqa Rut wijsallikunanta wawitayojtaj kananta.

¹⁴Chaypacha warmis nerqanku Noemiman: Señor yupaychasqa kachun, Pay qosunkiña uj allchhita qanta waqaychanasumpaj! Kachuntaj chay allchhiykeqa uj sumaj uyarisqa runa jina chay Israel llajtapi.

¹⁵Pay kallpachasonqa achachiña kajtiykipis yanapasonqa, imaraykuchus payqa qhachuniykej wawan, pichus mayta munakusunki; chayrayku qanchis wawasmanta astawan valen.

¹⁶Noemí jap'erqa arphimpi chay wawitata chantá uywakaporqataj.

¹⁷Kausaqesnintaj rikuspa nerqanku: Noemipaj uj wawita nacekusqa! Obed sutitataj churarqanku. Paytaj Isaejpa tatan karqa, Davidpa jatun tatantaj.

¹⁸Kaykuna karqanku Farespa mirayninkuna: Faresqa Hezrompa tatan karqa, Hezrontaj Rampa tatan karqa, Ramtaj Aminadabpa tatan karqa, Aminadabtaj Naasompa tatan karqa, Naasontaj Salmompa tatan karqa, Salmontaj Boozpa tatan karqa, Booztaj Obedpa tatan karqa, Obedtaj Isaejpa tatan karqa, Isaitaj Davidpa tatan karqa.