Read Quechua Bolivia DC Bible 1 SAMUEL 12 Bible Online

1 SAMUEL 12 - Quechua Bolivia DC Bible bible

1 SAMUEL 12

¹Chaymanta Samuelqa tukuy israelitasman nerqa: Qankuna mañawasqaykichejta noqaqa uyarerqaykichej, Kunantaj uj reyta churapuykichej.

²Chayqa chay rey, qankunata pusasonqachej chayqa. Noqari ashkha watasniyojña kani, chujchasniypis yurajllaña, wawasniytaj qankunawan kashanku. Noqaqa wayna kasqaymantapacha kunankama qankunataqa pusaykacharqaykichej.

³Kunanqa kaypi qankunawan kashani: Sichus pejpa bueyesninta, chayri burrontapis jap'ikaporqani, chayri pitapis tumparqani, chayri llakicherqani, chayri piwampis lluk'iykuchikuspa t'inkata jap'erqani chayqa, kunampacha Señorpa ñaupaqempi juchachawachun, ajllasqan chay reypa ñaupaqempipis niwaychej, noqataj mashkhachus qonay kasqanta qopusqaykichej.

⁴Mana jayk'ajpis ñak'arichiwarqaykuchu, nitaj ima llakiytapis qowarqaykuchu, nitaj lluk'ichikorqankichu, nispa kuticherqanku israelitasqa.

⁵Chanta Samuelqa nillarqataj: Señorqa, chanta reypis yachashanku, qankuna mana imantapis juchachawasqaykichejta, nispa.

⁶Chay jawa Samuelqa nillarqataj Israel aylluman: Señorqa jataricherqa Moisestawan Aarontawan, paykunanejtataj Egiptomanta ñaupa tatasniykichejta orqhomorqa.

⁷Chayrayku wakichikuychej, Señorpa ñaupaqempi sut'incharisqaykichej, Señorqa k'acha allinkunasta ruwasqanmanta qankunapaj jinataj ñaupa tatasniykichejpajpis.

⁸Maypachachus Jacob aylluntin ima Egiptoman uraykorqanku chaypachaqa, Egipto runastaj paykunata ñak'aricherqanku, ñaupa tatasniykichejtaj Señorman llakiyninkuta willakorqanku, Señortaj kacharqa Moisesta Aarontawan. Paykunataj ñaupa tatasniykichejta chay Egipto jallp'amanta orqhomorqanku, kay jallp'amantaj churarqanku.

⁹Chay ñaupa tatasniykichejtaj Señor Diosninkumanta qonqaporqanku, Señortaj Sisaraj makisninman jaywaykorqa, chay karqa Hazorpa reynin Jabimpa soldadosnimpa kamachejnin. Chanta jaywallarqataj filisteosman, jinataj Moabpa reyninmampis. Paykunaqa ñaupa tatasniykichejwan maqanakorqanku.

¹⁰Chaypacha paykunaqa Señorman willakorqanku juchallikusqankumanta, Señorta saqerparispa Baalman, jinataj Astarteman rijch'akojkuna lantista yupaychasqankurayku. Paykunataj Señormanta mañakorqanku chay enemigosninkumanta kacharichisqas kanankuta, nerqankutaj Señor sapallantaña yupaychanankuta.

¹¹Chayraykumá Señorqa kachamorqa Jerobaalta, Baracta, Jepteta, Samueltapis chay enemigosniykichejpa atiyninmanta kacharichinasuykichejpaj, jinamanta qankunaqa mana ima ch'ajwawan sumajta kausakunaykichejpaj.

¹²Jinapis qankunaqa, maypachachus amonitaspa reyninku Nahas qankunawan maqanakoj jamushajtin, chaypacha mañawarqankichej uj reyta, qankunata kamachinasuykichejpaj, cheqa reyniykichejqa Señor Dios kashajtin.

¹³Chaywampis kaypi kashan chay ajllasqaykichej reyqa. Señorqa qosunkichej mañakusqaykichej reyta.

¹⁴Sichus Señorta jatunchankichej, yupaychankichejtaj chayqa, pay nisusqaykichejtataj uyarinkichej, kamachisqasnintataj mana k'ullukuspa kasunkichej, chanta kausaychejtj qankuna, chanta kamachishasunkichej chay rey ima, Señor Diosniykichejpa munayninman; jinaqa allin kanqa.

¹⁵Sichus qankuna mana Señorta kasunkichejchu, kamachisqasnintataj qhesachankichej chayqa, Pay qankunata jasut'isonqachej, jinataj reyniykichejtapis.

¹⁶Ajinaqa ama kuyurikuychejchu chay kashasqaykichejmanta, rikunkichejtaj Señorpa jatuchaj t'ukuna imasta qankunaj ñaupaqeykichejpi ruwasqanta.

¹⁷Kunanqa trigota oqharina tiempo kashan, manataj paray tiempochu, icharí? Chaywampis noqaqa kunan Señormanta mañasaj, paytaj apachimonqa qhon qhonkunata, parastapis, qankuna yachanaykichejpaj, reparanaykichejpajtaj Señorqa imajtinchu mana munarqachu reyniyoj kanaykichejta, Señorpa rikuynimpeqa qankuna mana allintachu ruwankichej uj reyta mañakuspa.

¹⁸Chay kikin ratopacha Samuelqa Señormanta mañarqa, chay ratotaj Señorqa qhon qhonkunatawan paratawan apachimorqa. Chaypachataj Israel aylloqa sinch'ita mancharikorqa, Señormanta jinataj Samuelmantapis.

¹⁹Chayrayku Samuelta tukuy nerqanku: Señor Diosniykimanta mañaripuwayku ari, kay qampa kamachisniyki ama wañunaykupaj, tukuy juchasniykuman kaytawan yapaykukuyku uj reyta mañakuspa.

²⁰Samueltaj kuticherqa: Ama manchachikuychejchu. Cheqamanta qankunaqa sajrata ruwarqankichej, kunantaj Señormantaqa amaña t'aqakuychejchu, manachayqa tukuy sonqowan Señorta yupaychaychej.

²¹Ama chay qhasi dioskunasta qhatiychejchu, paykunaqa mana atinkuchu yanapayta, nitaj salvaytapis qhasi llullas kasqankurayku.

²²Señorqa sutinta jatunchanarayku mana saqesonqachejchu imaraykuchus payqa munan qankunaqa ayllumpuni kanaykichejta.

²³Noqataqa Señor waqaychawachun, paypa contrampi juchallikunaymanta qankunapaj mañayta saqerparispa. Manachayqa qankunata yachachisqaykichej sumajta cheqantataj kausanaykichejpaj.

²⁴Qankunaqa Señorta manchachikuychej. Pay sapallanta yupaychaychej, cheqanta tukuy sonqowantaj, yuyarikuspa chay chhinka k'acha imasta qankunapaj Señor ruwasqanta.

²⁵Qankunachus astawan juchata ruwayman rinkichej chayqa, qankuna, chanta reyniykichejpis wañuchisqas kankichej.