Read Quechua Bolivia DC Bible 1 SAMUEL 14 Bible Online

1 SAMUEL 14 - Quechua Bolivia DC Bible bible

1 SAMUEL 14

¹Saulpa wawan Jonatanqa uj p'unchaypi chay yanapajninta nerqa: Jamuy, chimpanachej filisteokunawan maqanakamusunchej jaqay mayu chimpapi kashanku chay soldadoswan, nispa. Jonatanqa mana imatapis tatanman nerqachu chay ruwananmantaqa.

²Tatanqa jarasqa kasharqa uj orqo k'uchupi, uj granada sach'a urapitaj, maynejpichus trigota trillaj kanku chaypi. Payqa sojta pachaj soldadosninwan khuska kasharqa.

³Efod p'achata apaykachajqa Ahías karqa. Payqa Ahitobpa wawan karqa, Icabodpa wauqentaj. Ahitobqa Fineespa wawan karqa, chanta Eléj allchhintaj. Elirí Silopi Señorpa sacerdoten karqa. Chaypi runasqa mana yacharqankuchu Jonatán ripusqanta.

⁴Chaykamataj Jonatanqa chay chimpapi kasharqanku chay filisteospaman chayasharqaña. Chay pasana q'asaqa iskay jatuchaj qaqas chaupipi kasharqa, chay qaqaspa sutisnintaj karqanku ujnimpataqa Boses, chay ujnimpatataj Sene.

⁵Ujnenqa patanejpi Micmas chimpaman qhawarisqa kasharqa, ujnintaj uranejpi Gabaa chimpanejman qhawarisqa.

⁶Jonatanqa chay yanapajninman nerqa: Thaskiypacha, risunchej Diosta mana manchachikoj runaspaman. Ichapis Señorqa noqanchejnejta imatapis ruwanman, paypajqa atikullan atipachinawanchej ashkha runaswampis, chayri pisiswampis.

⁷Yanapajnintaj nerqa: Ruwallay imachus yuyayniykipi kasqanman jina, noqaqa yuyasqaykiman jina yanapasqaykipacha.

⁸Jonatantaj kuticherqa: Jaku rina jaqay chimpaman, chay runas kashanku chayman, paykunawantaj rikuchikamusunchej.

⁹Sichus niwasunchej suyananchejta noqanchej kashanchej chayman uraykamunankukama chayqa, jaqaypi qhepakusunchej, manataj wicharisunchejchu paykuna kashanku chaymanqa.

¹⁰Sichus wicharirinanchejta niwasunchej chayqa, risunchej, chay niyta munanqa Señor paykunata atipachinawanchejta.

¹¹Ajinaqa iskayninku chay filisteo soldadoswan rikuchikorqanku. Chay runastaj rikuytawankama nerqanku: Qhawariychej chay hebreo runas llojsiykamusqankuña, pakasqas kasharqanku chay jusk'usmanta, nispa.

¹²Filisteosqa chay rato Jonatantaqa yanapajnintawan qhaparimorqanku: Kayman wicharimuychej, uj imata willarisqayku, nispa. Chaypacha Jonatanqa chay yanapajninman nerqa: Qhatimuway, Señorqa filisteosta jaywanqa kasqa israelitaspa makinman, nispa.

¹³Jonatantaj wicharerqa tawa chakimanta ch'ipakuspa, qhepantataj yanapajnin kikillantataj wicharerqa. Jonatanqa chay runasta urmarachejtinkama chay yanapajnenqa wañuracherqa.

¹⁴Chay ñaupaj kutipeqa Jonatanwan yanapajninwanqa iskay chunka runasta jina wañuracherqanku uj cheqannejllapi.

¹⁵Tukuyninkutaj chay jarapi kashajkunamanta, jinataj jawapi kashajkunamantapis mayta mancharikorqanku, ajinallatataj jatun tropamanta kaj soldadospis, chay juch'uy tropaspis mancharikullarqankutaj. Chay jawaqa chay ratopuni kallarqataj jallp'a jikhakuy, chaytaj maytapuni runasta mancharikuywan t'ukucherqa.

¹⁶Benjamín jallp'api Gabaa llajtapi Saulpa qhawaj soldadosnin kasharqanku chaykunaqa rikorqanku filisteos uj ladomanta uj ladoman juyñaykachashajta.

¹⁷Chaypacha Saulqa chay tukuy paywan kajkuna soldadosninman nerqa: Watukuychej, pichus noqanchej ukhumanta mana kaypichu kasqanta yachanapaj, nispa. Chay watukusqankupitaj yacharqanku Jonatán, yanapajninwan ima mana chaypichu kasqankuta.

¹⁸Chay diapeqa Diospa trato cajonin israelitas ukhupi kasharqa. Chayrayku Saulqa Haiasta nerqa: Apamuy kayman Diospa trato cajonninta, nispa.

¹⁹Saul, sacerdotewan parlanankamaqa filisteospa jarankupeqa astawan qhollpikusharqanku. Chaypacha Saulqa sacerdoteman nerqa: Amaña apamuychu, nispa.

²⁰Chay ratopacha Saulqa chay soldadosninwan ima tantakorqanku, maqanakojtaj rerqanku. Chay filisteos ukhupeqa sinch'i pantaypuni karqa, paykunapuralla wañuchinakuspa tukuchinakusharqanku.

²¹Chay hebreo runasqa unaymantaña filisteospa kamachinkupi karqanku. Paykunawan khuskataj maqanakoj jamusqanku chaykunaqa, Saulwan jinataj Jonatanwan kasharqanku chay israelitasman kutiykukorqanku.

²²Maypachachus Efraimpa orqosnimpi pakasqas kasharqanku chay israelitasqa filisteos ayqeshasqankuta yachaspa, llojsiramuytawan qhepankuta rispa maqanakamorqanku.

²³Chay maqanakoqa Bet-aven llajtakama chayarqa. Kay kutipeqa ajinata Señorqa israelitasta librarqa.

²⁴Chaywampis maqanaku p'unchaypeqa israelitasqa sinch'i sayk'usqas kasharqanku, mana pipis mikhunata llamillerqapischu, Saul paykunata jurachisqanrayku, kay jinata: Maldicisqa kanqa pillapis imallatapis mikhojqa manaraj ch'isiyashajtin, manaraj enemigosniyman aynita kutichishajtiy.

²⁵Maqanakoj soldadostaj uj monteman chayarqanku, maypichus pampapi misk'i kasharqa chayman.

²⁶Chay monteman soldados yaykorqanku chaypi misk'eqa yaku jinapuni puririsharqa. Chaywampis manapuni pipis llamirerqachu juramentasqankuta manchachikuspa.

²⁷Jonatantaj mana uyarisqachu tatan soldadosta jurachisqantaqa. Makimpi jap'isharqa chay tojnu puntanwan chhapurispa misk'ita mikhorqa, chaywantaj kallpacharikorqapacha.

²⁸Chaypacha ujnin kaj soldado nerqa: Tatayki tukuynin soldadosta jurachin, nerqataj pichus imallatapis kunan p'unchay mikhojqa maldecisqa kananta. Chayrayku runasqa may sayk'usqas llauchhupacha kashanku.

²⁹Jonatantaj kuticherqa: Tatayqa tukuynin llajtata llakiyman churan. Qhaway, imayna kallpachasqataj kashani chay uj chhikan misk'ita llamirispalla.

³⁰Astawanraj runasqa kallpachakunkuman karqa kunan p'unchay, enemigosninkumanta qhechusqankuta mikhuspa. May jina sinch'i llakiytachus atipasunman karqa filisteostaqa.

³¹Chay diapi israelitasqa atiparqanku filisteosta Micmas llajtamanta Ajalón llajtakama. Jinapis Israel soldados sinch'i sayk'usqaña kasharqa.

³²Atipaspaña soldadosqa rerqanku enemigosninkumanta qhechusqanku uywasta jap'ej, ovejasta, wakasta, waka uñasta ima. Chaykunata pampapi ñak'araspa mikhorqanku yawarnintinta.

³³Chay wakinkunataj Saulman willamorqanku kay jinata: Runasqa juchallishanku Señorpa contrampi, aychata yawarnintillanta mikhushanku, nispa. Chaypacha Saulqa nerqa: Qankunaqa juchallikunkichej, tanqaspa kayman apamuwaychej uj jatun rumita.

³⁴Chay jawaqa rispa nimuychej tukuy runasman, kayman apamunawankuta toronkuta, chayri ovejankutapis, kaypi ñak'aspa mikhunaykichejpaj, jinamanta ama juchallinaykichejpaj Señorpa contrampi yawarniyoj aychata mikhuspa. Chay kikin ch'isipacha sapa ujninku torosninkuta aparqanku, chaypitaj ñak'arqanku.

³⁵Saultaj Señorpaj uj altarta sayaricherqa. Chaytaj Señorpaj ñaupaj kaj ruwasqan altar karqa.

³⁶Chaymantataj Saulqa nerqa: Kunan ch'isi qhatiykunachej filisteosta qhatiykoj, sut'iyanankamataj rispa tukuy imasninkuta qhechuramunachej, mana ujniyojta wañurachispa. Chaypitaj tukuy kuticherqanku: Ruwallay, imachus allin rijch'asusqanta. Sacerdotetaj nerqa: Manaraj imata ruwashaspa Diosta tapurinachej, nispa.

³⁷Chaypacha Saulqa Diosta tapurerqa: Filisteostaqa qhatiykuymanchu? Israelitaspa makinman paykunata jaywawajchu?, nispa. Chay diapeqa mana Señorqa kuticherqachu.

³⁸Chayraykutaj Saulqa nerqa: Kayman qayllamuychej tukuy soldadosmanta kurajkunas, waturiychejtaj pischus kunan kaypi juchallisqanta.

³⁹Jurani Israelpa salvajnin Señorrayku. Waway Jonatampis kachun juchallejqa wañonqapuni! Mana pipis soldados ukhumantaqa kuticherqachu.

⁴⁰Chayrayku Saulqa tukuy israelitasman nerqa: Kay ladoman qankuna sayaykuychej, jaqay uj ladomantaj waway Jonatanwan, noqawan ima sayaykusqayku. Chaypitaj tukuy soldados kuticherqanku: Ruwallay imachus allin rijch'asusqanta, nispa.

⁴¹Chaypacha Saulqa qhaparerqa: Israelpa Señor Diosnin: Imaraykutaj kay kamachiykej kunan mañakusqanta mana uyarinkichu, nispa. Noqajta juchay chayqa, chayri waway Jonatampata chayqa, suerteta choqajtinku ujnin llojsichun, Israelpata juchan chayri, suerte choqasqaqa tukuynin llojsichun, nispa. Suertetaj llojserqa Saulman Jonatanmanwan. Israel ayllutaj mana juchacharqachu.

⁴²Saultaj nerqa: Suerteta choqaychej waway Jonatanpajwan, noqapajwan. Chantá suerteqa Jonatampaj llojserqa.

⁴³Chayrayku Saulqa Jonatanman nerqa: Imatachus ruwasqaykita willaway, nispa. Chaypitaj Jonatanqa kuticherqa: Arí cheqamanta kay makiypi kasharqa chay tojnu puntawan uj chhikan misk'ita llamirerqani. Kunanqa wañusajchu?

⁴⁴Saultaj kuticherqa: Manachus qan wañunki chayqa Señor sinch'ita jasut'iwachun!, nispa.

⁴⁵Israel ayllutaj Saulman kuticherqa: Imaraykutaj Jonatán wañunmanri, payqa israelitasman qorqa uj jatun atipachiyta! Mana chayqa jinachu kanqa. Señornejta jurayku mana uj chujchallampis pampaman uraykonqachu! Kunan ruwasqasqa Diospa yanapayninwan karqa. Chay jinamanta Israel aylloqa Jonatanta qhechorqa wañunan kashajtin.

⁴⁶Saultaj chay jawaqa filisteosta qhatiykuyta saqeporqa. Filisteostaj jallp'ankuman kutiraporqanku.

⁴⁷Ajinata Saulqa Israel llajta ukhupi kamachejninku jina tronompi sumajta tiyaykuytawan qayllasnimpi kajkuna enemigosninwan maqanakorqa: Moabwan, Amonwan, Edomwan, Sobaj reyninwan, filisteoswan ima. Mayllapipis maqanakuspaqa atipallajpuni.

⁴⁸Ashkha soldadosta tantaykuspa Amalecta atiparqa. Ajinamanta Israelta kacharicherqa suwa runaspa makinmanta.

⁴⁹Saulpa qhari wawasnenqa karqanku: Jonatán, Isúi, Malquisúa ima. Warmi wawasnintaj iskay karqanku: Kuraj kajpata Merab, sullk'a kajpatataj Mical.

⁵⁰Saulpa warmenqa Ahinompa wawan Ahimaas karqa. Soldadosta kuraj kamachejtaj Nerpa wawan Abner karqa. Nertaj Saulpa tatampa wauqen karqa.

⁵¹Saulpa tatan Cis, chanta Abnerpa tatan Nebpis iskayninku Abielpa qhari wakasnin karqanku.

⁵²Saulpa tukuy kausaynimpeqa, filisteoswan maqanakorqa aswan sinch'i karqa. Saulqa pichus sumachaj kallpasapa maqanakojkunata rikuspa soldadon kanampaj ajllarqa.