Read Quechua Bolivia DC Bible 1 SAMUEL 18 Bible Online

1 SAMUEL 18 - Quechua Bolivia DC Bible bible

1 SAMUEL 18

¹David Saulwan parlayta tukusqantawan Jonatanqa Davidwan may sumaj kausaqen ruwakorqa. Chayrayku Davidta pay kikinta jinapuni munakorqa.

²Saultaj chay kikin día Davidta paywan qhepacherqa. Manañataj tatampa wasinman kutipojta saqerqañachu.

³Jonatanwan Davidwanqa uj tratota ruwarqanku, Jonatán Davidta pay kikinta jina munakusqanrayku.

⁴Chay jawa Jonatanqa p'achan patapi qhatakunanta Davidman qoporqa, p'achantawan qollarqataj, espadanta, wach'ina arconta, qara chumpintawan.

⁵Davidqa Saul maymanchá kachaj chayman rej, tukuy imatataj allintapuni ruwaj. Chayrayku Saulqa Davidta soldadosta kamachinampaj churarqa. Davidqa allimpaj qhawasqa karqa tukuy runaspa ñaupaqempi, jinallataj Saulpa soldadosnimpa kamachejkunasnimpajpis.

⁶David filisteota wañuchisqanmantaña, soldados kutimushajtinku tukuy llajtasmanta warmis rej kanku Saulta taripaj, kusiywan takispa, tususpataj chhullu chhullojninkuwan, chanta platillosninkuwan ima.

⁷Chay warmisqa tusoj jina takej kanku kay jinata: Saulqa waranqa runasta wañucherqa. Davidtaj chunka waranqa runasta wañucherqa.

⁸Chaywan Saulqa sinch'ita phiñakorqa, mayta phiñakuywantaj nerqa: Davidtaqa ninku chunka waranqa runasta wañuchisqanta; noqatarí niwanku waranqa runasllata wañuchisqayta. Reyninkupaj churaykunallankupajña qhawashanku, nispa.

⁹Chaymantapacha Saulqa Davidta leqhospa qhawarqa.

¹⁰Q'ayantintaj Diospa kachamusqan sajra espíritu Saulman yaykorqapacha. Paytaj palacio ukhupi locoyarqa. Davidtaj arpa tocana yachasqa kasqanman jina arpata tocasharqa. Saultaj uj lanzata makimpi jap'isharqa.

¹¹Jinallamanta Saulqa lanzata choqarqa Davidta perqaman clavayta yuyaspa. Davidtaj iskay kutikama ithirikorqa Saulpa chay choqasqan lanzamanta.

¹²Saulqa Davidmanta manchachikorqa, Davidwan Señor kashasqanrayku, Saulta saqerparispa.

¹³Chayrayku paywan khuska kananmanta Davidtaqa karuncharqa, churarqataj waranqa soldadosllata kamachinampaj, paykunawantaj Davidqa maqanakusman rejtaj kutimojtaj.

¹⁴Davidta Señor yanapasqanrayku tukuy ruwasqasnimpi allillampuni rerqa.

¹⁵Chayrayku Saulqa Davidmanta manchachikorqa, tukuy imapi allin risqanrayku.

¹⁶Chaywampis tukuyninku israelitasmanta, jinataj Judamanta kajkunapis Davidtaqa munakorqanku pay kamachejninku kasqanrayku, maqanakuman rejtinku ñaupaj puntata yaykojtin llojsejtin.

¹⁷Uj día Saulqa Davidman nerqa: Kuraj warmi waway Merabta warmiyki kanampaj qosqayki. Chaypajqa qan guerrapi wapu maqanakoj kanayki tiyan, Señorpa maqanakusnimpitaj maqanakunayki tiyan. Saulqa yuyasharqa chay maqanakupi Davidta filisteos wañuchinankuta, ajinamanta manaña paychu wañuchinampaj.

¹⁸Davidtaj Saulman kuticherqa: Noqaqa mana imachu kani, nitaj aylluypis imachu Israelpeqa reypa tolqan kanaypajqa.

¹⁹Chaywampis mayk'ajchus Merabta Davidpa warmin kanampaj qopunan p'unchay chayamojtin, Saulqa chay wawanta Meholamanta Adrielman qoporqa.

²⁰Saulpa ujnin kaj warmi wawan Micaltaj Davidta munakorqa. Chaytaj Saulman willasqa karqa, paymantaj allin rijch'arqa.

²¹Saulqa yuyasharqa wawanta qojtenqa payrayku Davidqa filisteospa makimpi wañunanta. Chaypacha Saulqa ujtawan Davidman nerqa: Kunanqa tolqay kanayki tiyan.

²²Chay qhepanta Saulqa chay kamachisninta kamacherqa: Qankuna pakayllamanta Davidman niychej: Reyqa sinch'ita munakusunki jinallataj tukuy kamachisnimpis munakusunku. Kunanqa reypa tolqa kayta atinki.

²³Saulpa kamachisnintaj Davidman kay tukuyta willamorqanku, Davidtaj kuticherqa: Qankunaqa yuyankichejchu reypa tolqan kayqa allimpuni kasqanta, kay noqa jina wajcha mana kasuy runapajqa?

²⁴Saulpa kamachisnintaj rispa Saulman willamorqanku imatachus David nisqasninta.

²⁵Chaypacha Saulqa filisteospa makinmampuni Davidta urmachiyta munaspa nerqa: Willaychej warmi wawaymanta t'ikata jaywanawantaqa, apamuwachun pachaj filisteospa phichilusninkoj puntampa qarasninta khuchuspa, chaywan enemigosniyman aynita kutichinaypaj.

²⁶Saulpa kamachisnenqa kay imasta Davidman willamorqanku. Davidtaj umachakorqa walej kasqanta, ajinamanta reypa tolqan kanaqa, manaraj chay reypa nisqan p'unchay chayamushajtintaj.

²⁷Davidqa runasninta pusariykukuspa iskay pachaj filisteosta wañurachimorqa, Chanta chay runaspa phichilusninkoj puntampa qarasninta reyman aparqa, jaywarqataj tolqan kanampaj. Chaypacha Saulqa wawan Micalta Davidman qorqa warmin kanampaj.

²⁸Saulqa rikuspa, yachaspataj Davidwan Señor kasqanta, wawan Micaltaj sinch'ita munakusqanta, astawan manchachikorqa ñaupajmanta nisqaqa. Saulqa wiñaypaj enemigota jap'ikorqa tukuy kausaynimpi.

³⁰Chay jawari filisteos ukhumanta kurajkunasninku sapa kuti maqanakoj llojsejtinku, Davidpuni Saulpa tukuy waj kamachisninmanta nisqaqa astawan atipaj, chayraykutaj payqa tukuypaj allin qhawasqa karqa.