Read Quechua Bolivia DC Bible 1 SAMUEL 2 Bible Online

1 SAMUEL 2 - Quechua Bolivia DC Bible bible

1 SAMUEL 2

¹Anaqa kay jinata Señormanta mañakorqa: Señor, tukuy sonqoywan qampi kusikuni, imaraykuchus qanllamin watejmanta kallpachawanki. Chejninakuwajkunaman kutichikuyta atini. Qan yanapawasqaykirayku, kusisqa kashani!

²Mana qan jina pipis santoqa kanchu Señor! Mana waj kanchu qanmanta nisqaqa, nitaj waj pakakuna chhankapis Diosniyku jinaqa.

³Ama ni pi runaykachaspa parlachunchu, amataj pipis chhikata alabakuchunchu, imaraykuchus Señorllamin tukuy imata yachaj Diosqa. Paymin juicioman churan tukuy runaspa ruwasqasninkutaqa.

⁴Pay p'akiran kallpasapaspa armasninkuta, mana kallpasniyojkunatapis kallpachan.

⁵Ñaupajpi tukuy ima mikhunawan atipachikojkunaqa, kunan uj chhika t'antarayku chhalakushanku. Yarqhasqas kasharqanku chaykunataj, kunanqa manaña yarqhasqaschu kashanku. Mana wawasniyoj kayta aterqachu chay warmipis, qanchis kutitaña wawasta nacechikun. Ashkha wawasniyoj karqa chay warmejtari kallpanqa tukusqaña kashan.

⁶Señormin kausaytaqa qhechun, payllataj qon; Pay wañusqastawan khuska churawanchej, payllataj chaymanta orqhomuwanchej.

⁷Señormin wajchayachin, chayri qhapajyachimpis, urmachintaj, sayarichintaj.

⁸Dioslla wajchastaqa pampamanta oqharin, mañakoj runatapis q'opamantaña orqhomun, wiraqochi runastawan tiyaykuchinampaj, uj sumajpaj qhawasqa tiyanasta qonampaj, imaraykuchus Señorllamin dueñoqa, kay jallp'aj ura chukusninmanta, chaykunamantaj kay pachata churaykorqa.

⁹Paylla pay sonqo kaj wawasnimpa thaskinasninta waqaychan, sajra runastajri laqhayaypi wañupunku, imaraykuchus mana pipis kallpanraykullaqa atipanqachu.

¹⁰Señor phirenqa enemigosninta, cielomantapacha qhon qhonkunata apachimonqa. Señorlla tukuy kay pachata juicionman churanqa, reyninmantaj atiyta qonqa. Ajllasqantataj, aswan atiyniyojta ruwanqa.

¹¹Chay qhepamantari Elcanaqa Ramapi wasinman kutiporqa, chay wawari qhepakorqa Señorpa nisqanta ruwaspa, sacerdote Elejpa kamachisqanman jina.

¹²Eléj wawasnenqa sinch'i millay puriyniyoj karqanku, manataj Señormanta dakojchu kanku, nillataj allintachu ruwaj kanku tukuy aylloj ñaupaqempeqa sacerdote jina ruwanasninkutapis. Pillapis rikuchikuta jaywashajtenqa, sacerdotej ujnin kamachin jamoj makimpi uj trinche jap'irisqa manaraj aycha chayashajtin.

¹⁴Payqa trincheta mankaman sat'iyojpacha, jinallataj paylamampis. Chanta calderaman, chayri cazuelamampis. Mashkhatachari trinchewan orqhosqantaqa sacerdotepaj t'aqapoj kanku. Ajinata ruwaj kanku tukuy Israel ayllumanta Siloman jamojkunawan.

¹⁵Chay jawaqa manaraj chay wirasninta altarpi ruphachishajtinku, sacerdotej kamachin jamoj, pichá rikuchikuta jaywashaj chayman, nejtaj: Aychata qoway sacerdotepaj kankarqamunaypaj; payqa mana jap'isonqachu chayasqa aychataqa, manachayqa chawatapuni, nispa.

¹⁶Sichus chay ruphachej runa kutichej kay jinata: Mana, wirasnintaraj ruphachisaj, chantaqa munasqaykita apallanki, nispa chayqa, chay kamacheqa kutichej: Mana, kunampachapuni qonawayki tiyan! Mana qowanki chayqa, kallpaywan qhechusqayki, nispa.

¹⁷Ajina chay waynaspa juchallikusqasninkoqa, Señorpa ñaupaqempi sinch'i juchapuni karqa, imaraykuchus Señorman qosqa rikuchikusta mana allintachu qhawaj kanku.

¹⁸Chaykamataj Samuelqa linomanta ruwasqa efod nisqa p'achawan, Señorta sirvispallapuni kasharqa.

¹⁹Sapa watataj mamanqa tatanwan khuska rillajpuni waka rikuchikuta jaywamunankupaj apaspa, apapullajtaj ruwapusqan juch'uy qhatakunata.

²⁰Chaypacha sacerdote Eleqa bendicerqa Elcanata, jinataj warmintapis: Señor kutichipusuchun kay warminejta wawasta qosuspa, pay chay wawanta Señorman qopusqanmanta, nispa. Chaymantataj wasinkuman kutiporqanku.

²¹Señortaj Anata bendicerqa, paytaj wijsallikorqa. Jinamanta Anaqa kinsa qhari wawasta, iskay warmi wawastawan nacechikorqa. Samueltaj Señorpa ñaupaqempi wiñashallarqapuni.

²²Elirí allin ashkha watasniyojña karqa, chaywampis yacharqa tukuy imastachus israelitaswan wawasnin ruwasqasninkuta, Dioswan parlana toldo punkupi qhawajkuna warmiswan puñuykakapusqankutapis.

²³Chayrayku nerqa: Tukuy runas parlanqanku qankuna chay millay juchata ruwasqasniykichejmanta. Imaraykutaj chay jinata ruwankichejri?

²⁴Wawasníy, manapuni walejchu Señorpa ayllun ukhupi chay jinata qankunamanta parlasqankoqa.

²⁵Uj runa wajpaj contrampi juchallin chayqa, Señorpa payman kutikuyta atin. Señorpa contrampi juchallejtintaj, pitaj paymanta jark'akonqari? Chaywampis paykunaqa mana kasorqankuchu tatankoj nisqasnintaqa, imaraykuchus Señorqa nisqaña wañunankuta.

²⁶Chaykamataj Samuelqa wiñashallarqapuni, ruwasqasnintaj Señorpaj, runaspajpis allin karqa.

²⁷Chay tiempopi uj profeta chayamorqa Elita watukoj, nerqataj: Señorqa kay jinata nin: Ñaupa tatayki aylluntin ima maypachachus Egiptopi faraompa kamachin kashajtin sut'imanta payman rikhurerqani.

²⁸Israelpa tukuynin ayllusnin ukhumanta paykunata ajllarqani sacerdotesniy kanankupaj, rikuchikusta ruphachinankupaj altarniy patapi, jinataj inciensota ruphachinankupaj, chantá efod p'achata ñaupaqeypi churakunankupaj ima. Chay jawa ñaupa tatasniykichejman qorqani israelitas Señorpaj rikuchikusta mikhunankupaj.

²⁹Imaraykutaj qhesachankichej chay rikuchikusta noqa kamacherqaykichej jaywanaykichejta chaykunatari? Jinataj ofrentastapisri? Imaraykutaj wawasniykimanraj noqamanta aswan ñaupajta qonki, tukuy Israel aylluypa aswan sumaj ofrendasniywan paykunata wirayachispari?

³⁰Chayrayku Señorqa Israelpa Diosnin nerqa: Qanwan aylluykiwan ima paypa nisqanta ruwanaykichejtapuni. Kunanqa nisunkichej: Mana ni jayk'aj chayta saqesajchu, manachayqa jatunchawajkunata jatunchallasajtaj; qhesachawajkuna tapis p'enqaypi rikhurichisaj. Noqa Señor chayta nini.

³¹Qayllamushanña atiyniykita phirinay tiempoqa, jinallataj tatasniyki patapis. Ayllusniykimantaqa mana mayqempis machuyanankama kausanqachu.

³²Qhawanki may llakiywan envidiawantaj israelitaspaj tukuy allin kajta ruwapojtiy. Aylluykimantataj mana mayqempis machuyanankama kausanqachu.

³³Chaywampis wakin runasta qhawallasaj ayllusniykimanta altarniy qayllanejpi ñawisninkoj rikusqanwan tukukunankuta, jinallataj sonqo nanaywampis. Chanta tukuy mirayniykimanta kajkunapis wañurachisqas kanqanku.

³⁴Iskaynin wawasniyki Ofniwan, Fineeswan ima, paykunaman imachus qhatirenqa chayqa, qampaj uj señal jina kanqa: Iskayninku uj diallapi wañonqanku.

³⁵Chaymantataj noqaqa ajllakusaj uj cheqa sacerdoteta, munasqayman jina ruwanampaj. Paymanqa qollasajpuni astawan mirayta, jinataj ajllasqay reypa kamachillampipuni kanampaj.

³⁶Chaypachaqa pikunachus aylluykipi kausashanqanku chaykunaqa, chay sacerdotej ñaupaqenman k'umuykukoj jamonqanku uj qolqerayku, chayri uj chhikan t'antarayku, mañarikuspa sacerdotes ukhupi llank'arichinanta mikhuyta atinampaj.