Read Quechua Bolivia DC Bible 1 SAMUEL 25 Bible Online

1 SAMUEL 25 - Quechua Bolivia DC Bible bible

1 SAMUEL 25

¹Samuelqa wañuporqa. Tukuy israelitastaj tantakorqanku wañusqanmanta waqanankupaj. Ramá llajtapi kikin wasillampitaj p'amparqanku. Chaymantataj Davidqa Parán nisqa ch'in pampaman riporqa.

²Maón llajtapi uj manchay qhapaj runa tiyakorqa, kinsa waranqa ovejasniyoj, waranqa cabrasniyoj. Carmel llajtapitaj uywasnin tiyaporqa. Chaypachataj Carmelpi ovejasninta ruthusharqa.

³Kay runaqa Calebpa ayllunmanta Nabal sutiyoj karqa. Payqa phiña runa, millay ruwaykunasniyojtaj karqa. Warmin Abigailtajri, allin yuyayniyoj, chanta k'achitataj karqa.

⁴Davidtaj ch'in pampapi kashaspaqa yacharqa Nabalqa Carmel llajtapi ovejasninta ruthuspa kashasqanta.

⁵Davidqa chay kamachisninmanta chunkata kacharqa, paypa sutimpi Nabalta napaykamunankupaj.

⁶Kay jinatataj nicherqa: Hermanóy, munani sumaj kusiyllapi qan kanaykita, chanta aylluyki, tukuy wasiykipi kajkuna ima.

⁷Yachani ovejasta ruthuspa kashasqaykita. Kunanqa yachankiñachá michejkunasniyki Carmelpi noqaykuwan kashasqankuta. Noqaykuwan kashajtinkoqa mana ima llakiytapis qorqaykuchu, nitaj imatapis qhechorqaykuchu.

⁸Munaspaqa tapuriy chay kamachisniykita, paykuna astawan sut'inta willasonqanku. Chayrayku kunanqa mañarikuyki khuyarinaykita kay waynasta. Allin horapitaj qanman chayamushasunki. Qoriwayku ari imachus mikhunasmanta tiyaripususqanta, paykunaman, jinataj noqamampis, wawayki jina noqaqa kanipis.

⁹Davidpa kamachisnenqa Nabalman chayaspa willarqanku Davidpa nisqasninta, suyarqankutaj imastachus kutichinanta.

¹⁰Nabaltaj kuticherqa: Pitaj chay Davidrí? Pitaj chay Isaejpa wawanri?, nispa. Kunan diaspeqa ashkha kamachis patronesninkumanta ayqerashanku.

¹¹Ovejasta ruthojkunasniypaj wakichisqa kashan chaykunamantachu, ujyanasmantachu, aychasmantawan imachu qoyman kasqa mana rejsisqa maymantachus runasman?, nispa.

¹²Davidpa kamachisnintaj kikin ñanllatataj kutiporqanku. Davidman chayaspataj willarqanku Nabal imastachus nisqasninta.

¹³Chaypacha Davidqa chay runasninta kamacherqa: Tukuyniykichej armasta oqharikuychej! Chay runastaj David jina chumpisninkuman churakorqanku. Ajinamanta pachajnintin runas paywan rerqanku. Paykunamanta iskay pachajtaj qhepakorqanku chay kapuykunasninkuta qhawanankupaj.

¹⁴Nabalpa ujnin kaj kamachintaj rispa willamorqa Nabalpa warmin Abigailman. Ch'in pampamantapacha Davidqa willajkunata kachamorqa patronniyta napaykunankupaj, paytaj manchay phiña simiwan paykunata kutikorqa.

¹⁵Chaywampis chay runasqa manchay k'achas noqaykuwan karqanku. Ch'in pampaspi purisqaykupeqa mana jayk'ajpis ima llakiyta qowarqaykuchu, nitaj imaykutapis qhechuwarqaykuchu.

¹⁶Paykunaqa tutapis p'unchaypis noqaykuta, ovejasniykutapis jark'awaj kayku.

¹⁷Qosaykiri ancha rumi sonqo mana imatapis parlarikuna jinachu. Chayta qan umacharikuy, qhawaytaj imatachus ruwanaykita, manachayqa cheqamanta mana allin kaj payta, jinataj aylluntapis qhatirenqa.

¹⁸Chaypacha usqhayllata Abigailqa iskay pachaj t'antasta oqharerqa, iskay qara botas vinota, phishqa ovejasmanta kankasqa aychasta, tawa chunka libras grano jank'asta, pachaj chhullchu uvas k'isasta, ch'aki higosmanta iskay pachaj tortillasta ima. Chay tukuytataj burrosman chajnaykorqa.

¹⁹Chay kamachisninmantaj nerqa; Qankunaqa ñaupaykushaychej, noqataj aswan qhepata jamullasaj. Chay tukuyta ruwasharqa qosanman mana willaspalla.

²⁰Abigailqa ujnin burroman lloq'aykuspa chay orqoj wasallanta pakaymanta uraykorqa. Jinallamanta Davidta chay runasninta ima rikorqa payta taripaj jamushasqankuta. Abigailtaj paykunata taripamorqa.

²¹Davidqa jamusharqa sonqompi nispa: Qhasimanta Nabalpa tukuy kapuyninta chay ch'in pampapi waqaychaysisqayku, chay kapuyninmanta mana imata qhechuspa. Payqa allin ruwasqayta sajra kaywan kutichiwayku.

²²Ajinaqa jurani: Sinch'itapis Diosneyqa jasut'iwachun, sichus kunanmanta q'ayakama Nabalpa ayllunmanta tukuy qharista mana tukuchejteyqa!, nispa.

²³Abigailqa Davidta rikuytawankama, burronmanta uraykuytawan umanta pampakama k'umuykorqa.

²⁴Chaymantaqa Davidpa chakisninman wijch'uykukuspa nerqa: Juchaqa noqaman urmamuchun wiraqochíy! Chaywampis mañarikuyki parlarejta saqenawaykita nisqasniytataj uyarinawaykita.

²⁵Qan ama kasuychu Nabaltaqa. Payqa ancha sajra runa sutinman jina. Payqa ancha wampu runapuni. Imatapis payqa wampu jinapuni ruwan. Kay kamachiyki warmeqa mana rikorqachu kachamusqayki kamachisniykitaqa.

²⁶Chaywampis cheqamanta Señorqa mana munarqachu qan wañurachej jamunaykita, makiykiwan aynita kutichinaykita! Señor munachun tukuy qampa enemigosniykita, sajrawan rikusuyta munajkunatapis, Nabalta, jinataj ima sajrapis qhatirichun.

²⁷Kunantaj mañayki, kay qanman t'inkata apamususqayta, qanwan khuska jamorqanku chay tukuy kamachisniyki ukhupi rak'isqa kachun.

²⁸Kay kamachiyki warmej juchasninta perdonanaykita mañakuyki. Cheqamanta qantaqa Señor, jinataj mirayniykitapis jatun tiyanaykipi sayachichun, Señorpa sutimpi maqanakushasqaykirayku. Tukuy kausayniykipeqa ama ima sajrapis qhatirisuchunchu.

²⁹Pillapis qanta mask'asojtin, chayri wañuchiyta munasojtenqa, kausayniyki Señor Diosniykej makimpi jallch'asqa kanqa. Enemigosniykitari Señor wijch'onqa, imaynatachus warak'awan rumita warak'anku ajinata.

³⁰Ajinaqa, Señor maypachachus tukuy allin kanaykimanta nerqa chayta, Israelpa kamachejnin churasojtin, qanqa mana llakikunkichu, nitaj sonqoykitapis nanachikunkichu, mana juchasniyojkunata wañurachisqaykimanta, nitaj sajramanta sajrata aynita ruwasqaykimanta. Maypachachus Señor qanta allinwan rikusojtin, yuyarikunki kay kamachiyki warmimanta.

³²Davidtaj Abigailman kuticherqa: Bendicisqa kachun Israelpa Señor Diosnin, pay qanta noqata taripawaj kachamususqanmanta.

³³Qampis bendicisqallataj kay, sumajta umachakusqaykimanta, jinamanta qan sayachiwarqanki wañuchimunay kashajtin, noqa kikiy chay sajramanta aynita kutichinay kashajtin.

³⁴Israelpa Señor Diosninrayku jurayki, pay mana munarqachu ni ima sajratapis ruwasunayta, manachus qan usqhayta jamuwaj karqa noqawan tinkoj chayqa, q'ayakama mana uj qharillapis Nabalpa runasninmanta kausashaj puchunmanchu karqa.

³⁵Chaymantaqa David Abigailmanta jap'erqa imastachus payman apasqasninta, nerqataj: Kunanqa kusisqalla ripuy wasiykiman. Yachanki jina uyarerqayki niwasqasniykita, mañawasqasniykitapis.

³⁶Abigailqa kuterqa maypichus Nabal kasharqa chayman. Rikorqataj uj jatun qarakuta reypaj jinapuni wasimpi ruwashasqanta. Payqa may kusisqa phiri machasqataj kasharqa. Chayrayku Abigailqa q'ayantinkama mana imatapis nerqachu.

³⁷Q'ayantin paqarintaj Nabal machasqa kasqanmanta yuyayninman kutirejtinña, Abigailqa Nabalman tukuy imaschus kasqanta sut'inta willarqa. Nabaltaj ujllata t'uku onqoywan jap'ichikorqa, mana kuyurejtaj rikhurerqa.

³⁸Chunka diasninmanri Señor watejmanta onqochillarqataj, jinamanta Nabalqa wañuporqa.

³⁹Davidtaj Nabal wañupusqanta yachaspa nerqa: Señor bendicisqa kachun, Pay Nabaltaqa jasut'in chay phiñachiwasqanmanta, Pay jark'awarqa sajrata ruwaymanta, Nabalpa juchantaqa paypa patallanmantaj urmaykucherqa! Chaymanta Davidqa Abigailman kacharqa paywan casarakuyta munasqanta willachispa.

⁴⁰Davidpa kachasnin Carmelman Abigailwan parlanankupaj chayaspa nerqanku: David qanta pusajta kachamuwayku paypa warmin kanaykipaj.

⁴¹Abigailtaj pampaman k'umuykukorqa, nerqataj: Noqaqa paypa kamachillan kani, noqaqa kamachisnimpa chakisninta mayllasaj, jinata pay kamachiwajtenqa.

⁴²Chaymantataj Abigailqa usqhayta wakichikorqa, phishqa warmi kamachisninta pusariykukuspa uj burropi Davidpa kamachisnimpa qhepanta rerqa. Davidwantaj casarakorqa.

⁴³Davidqa casarakullarqataj Jezreel llajtamanta Abinoam warmiwan; iskayninkutaj Davidpa warmisnin karqanku.

⁴⁴Saultaj warmi wawan Micalta, Davidpa warmin karqa chayta qoporqa Galim llajtapi Laispa wawan Paltiman, paypa warmin kanampaj.