Read Quechua Bolivia DC Bible 1 SAMUEL 3 Bible Online

1 SAMUEL 3 - Quechua Bolivia DC Bible bible

1 SAMUEL 3

¹Wayna Samuelqa Señorpa wasimpi imaschus ruwana kajta ruwashallarqapuni sacerdote Elejpa kamachiynimpi. Kay tiempospi Señorpa willaykunasnenqa pisiyarqa. Mosqoypi jina rikunastaqa manaña pipis chhikata rikojñachu.

²Qhepa p'unchaykunaman Elejpa ñawisnenqa chharpuyaykusqankuña, manañataj imatapis allinta rikojñachu. Uj tutarí payqa wasimpi puñusharqa.

³Chaypacha Samuelqa Señorta yupaychana wasipi puñusharqa, Diospa cajonnin kasharqa chaynejpi; Diospa k'anchanampis k'anchashallarqapuni.

⁴Chaypacha Señorqa payta wajyarqa, Samuel!, nispa. Paytaj kuticherqa: Kaypi kashani, Señor!, nispa.

⁵Chantataj usqhayta correspa Eliman, nerqa: Kaypi kashani, imapajtaj wajyawankiri? Elitaj nerqa: Mana noqaqa wajyaykichu, rispa puñukampullay, nispa. Chaypacha Samuelqa puñuykakampullarqataj.

⁶Señorqa ujtawan wajyallarqataj: Samuel!, nispa. Samueltaj jatarikuspa Elí kasharqa chayman rerqa, nerqataj: Kaypi kashani, imapajtaj wajyawankiri?, nispa. Elitaj kuticherqa: Mana noqaqa wajyaykichu wawáy, kutispa puñuykakampullay, nispa.

⁷Samuelqa manaraj Señorta rejsisqachu, imaraykuchus paymanqa manaraj ni ujta rikhurisqachu.

⁸Watejmanta Señorqa kinsa kutipi Samuelta wajyallarqataj, uyariytawantaj payqa Eliman nej rillarqataj: Kaypi kashani, imapajtaj wajyawankiri?, nispa. Elitaj, chaypacha repararqa Samueltaqa Señor wajyasqanta.

⁹Chayrayku nerqa: Riy, puñukampullaytaj; ujtawan Señor wajyamusojtenqa, kutichiy: Parlamuy Señor, kay kamachiykeqa uyarishasunki!, nispa. Chaypacha Samuelqa ripullarqataj puñunan chayman puñukampoj.

¹⁰Chaypacha Señorqa paynejman qayllaspa wajyallarqataj ñaupaj kutispi jina: Samuel!, Samuel!, nispa. Samueltaj kuticherqa: Parlallay, kamachiykeqa uyarishasunki, nispa.

¹¹Señortaj payman nerqa: Israelpi uj imata ruwasaj, tukuy chayta uyarejkunaj ningrinku sejsenqa.

¹²Chaypacha noqaqa junt'asajpuni Eliman, ayllumpa contranta tukuy nisqayta.

¹³Willaniña tukuy ayllunmanta kajkunata jasut'inayta wiñaypaj, pay yachanña imaschus kasqanta chay juchasninmanta. Wawasnenqa maldiciwanku, paytaj mana k'aminchu.

¹⁴Chayrayku juraniña Eléj ayllumpa contrampi, juchasnenqa mana jayk'ajpis pichasqachu kanqanku, ni rikuchikuswan, nitaj ofrendaswampis.

¹⁵Chaymantataj Samuelqa puñukaporqa sut'iyanankama; chaymantataj Señorpa yupaychana wasimpa punkusninta kicharerqa. Samuelqa manchachikorqa Eliman willayta chay mosqoypi jina tukuy rikusqanta.

¹⁶Elitaj Samuelta wajyaspa nerqa: Samuel, wawáy! Samueltaj kuticherqa: Kaypi kashani, nispa.

¹⁷Elitaj taporqa: Imatataj Señorqa nisorqari? Mañayki mana uj chhikanta pakarispa willanawaykita. Sichus Señor nisusqanmanta imata pakawanki chayqa, Dios sinch'ita jasut'isuchun!

¹⁸Samueltaj kuticherqa tukuyninta mana uj chhikanta pakarispa. Elitaj nerqa: Payqa Señorpuni! Ruwachun payman imachus allin rijch'ajta.

¹⁹Samuelqa wiñarqa, Señortaj paytaqa yanaparqa, tukuy nisqasnintataj ruwarqa.

²⁰Tukuynin israelitastaj Dan llajtamantapacha Beersebakama Samueltaqa rejserqanku, Señorpa cheqa profetampaj.

²¹Señortaj Silopi ujtawan rikhurillarqataj, chaypi Señorqa willaykunasta Samuelman sut'inchaj.