Read Quechua Bolivia DC Bible 1 SAMUEL 8 Bible Online

1 SAMUEL 8 - Quechua Bolivia DC Bible bible

1 SAMUEL 8

¹Samuelqa ñapis machuña kasqanrayku, israelitasta kamachinankupaj wawasninta churarqa.

²Kuraj kajpata sutin karqa Joel, sullk'ajtataj Abias. Paykunataj kamacherqanku Beersebapi.

³Chaywampis chay wawasnenqa mana tatanku jinachu imatapis allinta ruwarqanku, manachayqa qolqeta munapayayman qokaporqanku, chanta lluk'ichikorqanku, nitaj imatapis cheqantachu ruwarqanku.

⁴Chaypacha Israelpa kurajkunasnin tantaykukuspa rerqanku Ramá llajtaman Samuelwan tinkoj.

⁵Chaypitaj nerqanku: Qanqa ña allin machuña kanki, wawasniykitaj mana qan jina allintachu purinku, chayrayku uj reyta ajllapuwayku kamachinawaykupaj, tukuy nacionespi kasqanman jina.

⁶Samuelmantaj uj reyta paykunata kamachinampaj mañasqankoqa mana allinchu rijch'arqa, chaytataj Señorman willarqa.

⁷Señortaj kay jinata kuticherqa: Uyarillay imastachus israelitas mañakusqankuta, manamin qantachu qhesachasunku, manachayqa noqata, ama paykunata kamachinaypaj.

⁸Egiptomanta orqhomusqaymantapacha kunankamaqa imaynatachus qanwan ruwashanku, ajinallatataj noqawampis ruwanku. Paykunaqa noqata saqerpariwanku waj dioskunata yupaychanankurayku.

⁹Ajinaqa uyarillay imatachus mañakusqankuta. Chaywampis ñaupajtaqa reparachiyraj, imaynatachus chay ajllakusqanku rey paykunata kamachinanta.

¹⁰Chaypacha Samuelqa reyta mañakoj israelitasman willarqa Señor imatachus kutichisqanta.

¹¹Nerqataj: Kay jinata ruwasonqachej pichus kamachisonqachej chay reyqa: Qhari wawasniykichejta wajyachenqa; wakintaqa maqanakupaj carretasman churanqa, wakintataj caballospi purinankupaj, wakintataj payta qhawanampaj churanqa.

¹²Wakintaqa churanqa waranqa soldadosta kamachinampaj, wakintataj phishqa chunka soldadosta kamachinampaj. Wakintaqa jallp'asta llank'anaykichejpaj churasonqachej, chanta cosechasninta oqharinaykichejpaj, jinallataj armasta ruwanaykichejpaj, maqanakupaj carretasnimpipis armasta ruwachisonqachej.

¹³Warmi wawasniykichejtapis wajyallanqataj, wakintaqa q'apaj jawinasta wakichinankupaj, wakintataj wayk'unankupaj, t'antasta ruwanankupaj ima.

¹⁴Chay reyqa aswan allin kaj jallp'asniykichejta jap'ikaponqa, uvas huertasniykichejta, chanta olivo sach'asniykichejtapis; chaykunatataj payta yanapajkunaman qoponqa.

¹⁵Payqa grano poqoykunamanta, jinataj uvas sach'a poqoykunamantapis chunka t'aqasmanta ujta qhechusonqachej, chay paywan llank'ajkunasninman, kamachisninman ima jaywanampaj.

¹⁶Ajinallatataj qhechusonqachej qhari kamachisniykichejta, jinataj warmi kamachisniykichejtapis, chanta ajinallatataj qhechusonqachej chay aswan sumaj kaj wakasniykichejta, burrosniykichejtapis paypaj llank'achikunampaj.

¹⁷Ajinallatataj uywasniykichejmantapis sapa chunkamanta ujninta jap'ikaponqanku, qankunantin paytaqa mit'asnin kankichej.

¹⁸Mayk'ajchus ajllakusqaykichej rey ñak'arichisojtiykichej Señorman willakunkichej chayqa, mana payqa uyarisonqachejchu.

¹⁹Chaywampis israelitasqa manapuni Samuelpa nisqanta kasorqankuchu, kay jinatataj kuticherqanku: Imapis kachun reyta munaykupuni.

²⁰Ajinamanta noqaykupis waj naciones jina kasqayku, paytaj noqaykuta kamachiwasqayku, jinataj maqanakuspi pusaykachawasqayku.

²¹Israel aylloj nisqanta uyarispataj Samuelqa, Señorman willarqa.

²²Señortaj kuticherqa: Uyarillay chay mañasqankutaqa, ajllapuytaj uj reyta, nispa. Chaypacha Samuelqa israelitasta kamacherqa sapa ujninku llajtasninkuman kutipunankuta.