Read Quechua Cuzco Bible 1988 GÉNESIS 11 Bible Online

GÉNESIS 11 - Quechua Cuzco Bible 1988 bible

GÉNESIS 11

¹Kay pachapin karqan ch'ulla rimaylla, kikin ch'ulla simikunallataq.

²Inti lloqsimuy kinraymanta runakuna puririspataq, Sinar hallp'api pampata tarirqanku, chaypin tiyarqanku.

³Hinaspan ninakurqanku: —Haku, ladrillota ruwasunchis, hinaspa ninapi kanasunchis, nispa. Ladrillon ruminku karqan, breataq t'urunku karqan.

⁴Ninakullarqankutaq: —Haku, huk llaqtata perqasunchis, hanaq pachakama aypaq torretawan. Mentasqa runataq kasunchis, kay pachantinman ama ch'eqesunchu, nispanku.

⁵Hinan Señor Diosqa uraykamurqan runakunaq perqasqan llaqtata torretawan rikunanpaq.

⁶Hinaspanmi Señor Diosqa nirqan: —Kayqa runakunaqa ch'ullallan, llapankutaq huk rimaynillayoq kanku. Ruwaytan qallarinkuña, kunantaq paykunata mana imapas hark'ayta atinqachu ruway yuyaykunankuta.

⁷Kunanqa uraykusunchis, hinaspa chaypi rimayninkuta t'ikrarqarisunchis, ama rimasqankuta entiendenakunankupaq, nispa.

⁸Ahinatan Señor Diosqa chaymantapacha kay pachantinman paykunata ch'eqechirqan, chay hinapitaq llaqta perqayta qollupurqanku.

⁹Chayraykun chaypa sutinqa Babel [8] nisqa, chaypi Señor Diosqa pachantin rimayta t'ikrarqarisqanrayku, chaymantapacha kay pachantinman paykunata ch'eqechisqanrayku ima.

¹⁰Kaykunan Sempa mirayninkuna. Millp'uq unu iskay wataña pasaqtinmi, Semqa pachak watayoq kashaspa Arfaxadta churiyarqan.

¹¹Arfaxadta churiyasqan qhepatataq Semqa kawsarqan phisqa pachak watatawanraq, churiyallarqantaq qhari wawakunatapas warmi wawakunatapas.

¹²Arfaxadmi kinsa chunka phisqayoq watayoq kashaspa churiyarqan Salata.

¹³Salata churiyasqan qhepatataq Arfaxadqa kawsarqan tawa pachak kinsayoq watatawanraq, churiyallarqantaq qhari wawakunatapas warmi wawakunatapas.

¹⁴Salan kinsa chunka watayoq kashaspa churiyarqan Heberta.

¹⁵Heberta churiyasqan qhepatataq Salaqa kawsarqan tawa pachak kinsayoq watatawanraq, churiyallarqantaq qhari wawakunatapas warmi wawakunatapas.

¹⁶Hebermi kinsa chunka tawayoq watayoq kashaspa churiyarqan Pelegta.

¹⁷Pelegta churiyasqan qhepatataq Heberqa kawsarqan tawa pachak kinsa chunkayoq watatawanraq, churiyallarqantaq qhari wawakunatapas warmi wawakunatapas.

¹⁸Pelegmi kinsa chunka watayoq kashaspa churiyarqan Reuta.

¹⁹Reuta churiyasqan qhepatataq Pelegqa kawsarqan iskay pachak isqonniyoq watatawanraq, churiyallarqantaq qhari wawakunatapas warmi wawakunatapas.

²⁰Reumi kinsa chunka iskayniyoq watayoq kashaspa churiyarqan Serugta.

²¹Serugta churiyasqan qhepatataq Reuqa kawsarqan iskay pachak qanchisniyoq watatawanraq, churiyallarqantaq qhari wawakunatapas warmi wawakunatapas.

²²Serugmi kinsa chunka watayoq kashaspa churiyarqan Nakorta.

²³Nakorta churiyasqan qhepatataq Serugqa kawsarqan iskay pachak watatawanraq, churiyallarqantaq qhari wawakunatapas warmi wawakunatapas.

²⁴Nakormi iskay chunka isqonniyoq watayoq kashaspa churiyarqan Tareta.

²⁵Tareta churiyasqan qhepatataq Nakorqa kawsarqan pachak isqonniyoq watatawanraq, churiyallarqantaq qhari wawakunatapas warmi wawakunatapas.

²⁶Taremi qanchis chunka watayoq kashaspa churiyarqan Abramta, Nakorta, Harantawan.

²⁷Kaymi Tarepa mirayninkuna. Taremi churiyarqan Abramta, Nakorta, Harantawan. Haranqa churiyarqan Lot-ta.

²⁸Harantaq nacesqan Kaldea suyu Ur llaqtapi wañukapurqan taytan Tarepa ñawpaqentaraq.

²⁹Abrammi casarakurqan Saraiwan, Nakortaq casarakurqan Haranpa ususin Iskaq ñañan Milkawan.

³⁰Saraitaq mana wachakuq karqan, manataq wawan karqanchu.

³¹Taremi Abram churinta pusarikurqan, nieton Lot-tawan, Abrampa warmin Saraitawan, hinaspan paykunawan lloqsipurqan Kaldea suyu Ur llaqtamanta, Canaán suyuman ripunanpaq, ichaqa Harankama hamuspataq chaypi tiyakapurqanku.

³²Taremi iskay pachak phisqayoq watayoq kashaspa Haranpi wañukapurqan.