Read Quechua Cuzco Bible 1988 GÉNESIS 12 Bible Online

GÉNESIS 12 - Quechua Cuzco Bible 1988 bible

GÉNESIS 12

¹Señor Diosmi Abramta nirqan: —Ripuy hallp'aykimanta, aylluykimanta, taytaykiq wasinmanta, rikuchisqayki chay hallp'aman.

²Mirayniykikunatan ancha hatun suyuman tukuchisaq, saminchasqaykin, anchatapunin hatunyachisqayki, hukkunapaqtaq samincha kanki.

³Saminchaqniykikunatan saminchasaq, ñakaqniykikunatan ñakasaq, kay pacha lliw ayllukunan ninqaku: Abramta hina saminchaway, nispa.

⁴Hinaqtinmi Abramqa Señor Diospa nisqanman hina ripurqan, Lotpas paywan ripullarqantaq. Haranmanta lloqsipushaspataq Abramqa qanchis chunka phisqayoq watayoq karqan.

⁵Paymi Sarai warminta pusarikurqan, wawqenpa churin Lot-tapas, hinallataq Haranpi lliw tarisqankunatapas, tarisqanku runakunatapas, hinaspanmi lloqsirqanku Canaán hallp'aman ripunankupaq. Canaán hallp'aman chayaspankutaq

⁶Abramqa chayninta rirqan Shehempi yupaychana cheqaskama, chaypin Moré kashan terebinto sach'ayoq. (Canaán runakunataq chaypacha chayneqpi kasharqan).

⁷Señor Diostaq Abramman rikhurispa nirqan: —Mirayniykimanmi kay hallp'ata qosaq, nispa. Hinaqtinmi rikhuriqnin Señor Diospaq chaypi altarta perqarqan.

⁸Chaymantataq rirqan Betel chimpa inti lloqsimuy kinray orqo-orqoman, hinaspan inti haykuy kinray Betel llaqta inti lloqsimuy kinray Hai llaqta chawpipi karpanta sayarichirqan. Chaypipas Señor Diospaq altarta perqallarqantaqmi, hinaspan Señor Diosmanta mañakurqan.

⁹Chaymantataq Abramqa hatarispa Neguev kinrayman asta-astarikuspa rirqan.

¹⁰Chay suyupitaq yarqay karqan, hinan Abramqa Egiptoman rirqan chaypi pisi tiempolla tiyamunanpaq, chay suyupi sinchi yarqay kaqtin.

¹¹Egiptoman haykushaspataq warmin Saraita nirqan: —Qanqa sumaq rikch'ayniyoqmi kanki,

¹²Egipto runakuna rikuspasuykiqa ninqakun: “Warminmi”, nispa, hinaspanmi ñoqata wañuchiwanqaku, qantataq mana wañuchisunkikuchu.

¹³Kunanqa, niykapuway panay kasqaykita, qanrayku ñoqa allin rikusqa kanaypaq, hinaspa mana wañuchiwanankupaq, nispa.

¹⁴Egiptoman Abram haykuqtintaq, Egipto runakunaqa warminta rikurqankupuni ancha sumaq rikch'ayniyoq kasqanta.

¹⁵Egipto rey Faraonpa kamachikuqninkunapas Saraita rikurqanku, hinaspan paymanta willaykurqanku ancha sumaq rikch'ayniyoq kasqanta, chaymi warmiqa Faraonpa wasinman pusasqa karqan.

¹⁶Hinan Faraonqa Abramta warminrayku allinta rikurqan, qorqantaq ovejakunata, wakakunata, asnokunata, qhari kamachikunata, warmi kamachikunata, camellokunatapas.

¹⁷Señor Diostaq ichaqa Faraonta wasinpi kaqkunatawan manchayta muchuchirqan Abrampa warmin Sarairayku.

¹⁸Chaymi Faraonqa Abramta waqyaspa nirqan: —¿Imatataq kaytari ruwaykuwanki? ¿Imanaqtintaq mana willawarqankichu warmiyki kasqanta?

¹⁹¿Imanaqtintaq niwarqanki: —Panaymi, nispa? Paytan warmiy kananpaq yuyaykachiwarqanki. ¡Kayqa warmiyki, pusakapuy, hinaspa ripuy! nispa.

²⁰Hinaspanmi Faraonqa runankunata kamachirqan Abramta, warmintawan, lliw kaqnintinta pusarqonankupaq.