Read Quechua Cuzco Bible 1988 GÉNESIS 13 Bible Online

GÉNESIS 13 - Quechua Cuzco Bible 1988 bible

GÉNESIS 13

¹Abrammi Egiptomanta lloqsirqan Neguev kinrayman, warmintin, lliw kaqninkunantin, hinallataq Lotpas paywan kuska.

²Abramtaq karqan uywayoq, qolqeyoq, qoriyoq, qhapaqllaña.

³Hinaspan asta-astarikuspa Neguev ch'inneq kinrayninta Betelkama kutimpurqan, Betelwan Haiwan tupaypi ñawpaq karpan karqan chayneqkama,

⁴ñawpaqta altarta perqasqanman, hinaspan chaypi Abramqa Señor Diosmanta mañakurqan.

⁵Hinallataq Abramwan puriq Lotpas karqan ovejayoq, cabrayoq, wakayoq, karpakunayoq ima.

⁶Hallp'ataq paykunapaq mana ayparqanchu kuska tiyanankupaq askha uywayoq kasqanrayku, chaymi huk cheqasllapi kuska tiyayta mana atirqankuchu.

⁷Ch'aqwallarqankutaqmi Abrampa michiqninkuna Lotpa michiqninkunawan. (Chay tiempopin chayneqpi tiyarqan Canaán runakuna Fares runakunapas).

⁸Chaymi Abramqa Lot-ta nirqan: —Ama ch'aqwasunchu ñoqawan qanwan, amallataq michiqninchiskunapas ch'aqwachunchu, wawqentinmi kanchis riki.

⁹Kay llapan hallp'aqa munayniykipin kashan akllarikunaykipaq. Valekuykin t'aqarikuwanaykipaq. Lloq'eman qan rinki chayqa, ñoqa pañaman risaq, qantaqchus pañaman rinki chayqa, ñoqa lloq'eman risaq, nispa.

¹⁰Hinaqtinmi Lotqa qhawarirqan, hinaspan rikurqan Jordán pampantinta, llapallan qarpayniyoq Zoarkama kasqanta, Señor Diospa huertanta hina, Egipto hallp'ata hina. (Chay hinan karqan manaraq Señor Diosqa Sodomata Gomorrata thunishaqtin).

¹¹Chaymi Lotqa paypaq akllakurqan Jordán pampata llapanta, hinaspataq inti lloqsimuy kinrayman astakurqan, chaymi t'aqarinakapurqanku.

¹²Abrammi tiyarqan Canaán hallp'api, Lot-taq tiyarqan pampa llaqtakuna qayllapi, karpankunata asta-astarispa Sodomaman chayanankama.

¹³Sodoma runakunan ichaqa millay karqanku, Señor Dios contra sinchi huchasapakuna.

¹⁴Lotpa t'aqarikapusqan qhepatataq, Señor Diosqa Abramta nirqan: —Maypichus kashasqaykimanta allintapuni qhawariy wichayta, urayta, inti lloqsimuyta, inti haykuytawan.

¹⁵Lliw hallp'a rikusqaykitan wiñaypaq qosqayki, hinallataq mirayniykimanpas.

¹⁶Ñut'u hallp'ata hinan mirayniykita askhayachisaq, pipas ñut'u hallp'ata yupayta atinqa chayqa, mirayniykipas yupasqallataq kanqa.

¹⁷Hatariy, puriy hallp'aq sayayninta kinraynintapas, qanmanmi chayta qosqayki, nispa.

¹⁸Abramtaq karpanta astaspa rirqan, hinaspan Hebrón qaylla Mamrepi terebinto sach'akuna qayllapi tiyakurqan. Chaypin Señor Diospaq altarta perqarqan.