Read Quechua Cuzco Bible 1988 GÉNESIS 14 Bible Online

GÉNESIS 14 - Quechua Cuzco Bible 1988 bible

GÉNESIS 14

¹Chay tiempopin Amrafelqa Sinar rey karqan, Ariokqa Elasar rey karqan, Kidorlaomerqa Elam rey karqan, Tidalqa Goim rey karqan.

²Chaykunan maqanakurqan Sodoma rey Bera contra, Gomorra rey Birsa contra, Adma rey Sinab contra, Zeboim rey Zemeber contra, Bela rey contrapiwan. (Bela llaqtan Zoar nisqallataq).

³Chay phisqantinmi Sidim wayq'opi maqanakunapaq huñukurqanku. (Chaypin Kachi Qocha kashan).

⁴Chaykunan chunka iskayniyoq watata Kidorlaomerta servisqaku, chunka kinsayoq watapitaq ichaqa pay contra hatarisqaku.

⁵Chaymi chunka tawayoq watapi Kidorlaomerqa hamurqan, hinallataq paywan kashaq reykunapas. Hinaspan Astarot Karnaimpi atiparqanku Refaim runakunata, Ham llaqtapitaq Zuz runakunata, Save-kiriataimpitaq Em runakunata,

⁶Seir orqopitaq Hor runakunatapas, paykunatan ch'inneq qaylla El-Parán llaqtakama qatirqanku.

⁷Muyumpuspataq hamurqanku En-mispat llaqtaman (chaymi Kades nisqallataq), hinaspan Amalek runakunaq lliw suyunta atiparqanku, hinallataq Hazezon-tamarpi tiyaq Amor runakunatapas.

⁸Chaymi lloqsimurqanku Sodoma rey, Gomorra rey, Adma rey, Zeboim rey, Bela reypiwan, hinaspan Sidim wayq'opi maqanakurqanku,

⁹Elam rey Kidorlaomer contra, Goim rey Tidal contra, Sinar rey Amrafel contra, Elasar rey Ariok contrapiwan, phisqa rey tawa rey contra.

¹⁰Sidim wayq'otaq kasharqan brea p'uytu-p'uytullaña, chaymi Sodoma Gomorra reykunaqa ayqespanku chaykunaman urmaykurqanku, kinsataq orqokunaman ayqerqanku.

¹¹Hinan atipaqkunaqa Sodomapi Gomorrapi tukuy kaqta tukuy mikhunatapas aparikuspa ripurqanku.

¹²Abrampa sobrinon Sodomapi tiyaq Lot-tapas apallarqankutaq tukuy kaqnintinta.

¹³Huk runataq ichaqa ayqemuspa Hebreo Abramman willarqan. Abramqa tiyarqan Amor runa Mamreq terebinto sach'ankuna qayllapin, chay Mamren wawqen Eskolwan Anerpiwan Abramwan hukllachakusqaku.

¹⁴Abramtaq wawqen preso kapusqanta uyarispa, paypapi naceq yuyayniyoqkaq kamachikunata alistarqan, kinsa pachak chunka pusaqniyoqta, hinaspan chay tawa reykunata Dankama qatirqan.

¹⁵Abrammi kamachinkunantin tuta rakinakurqanku, hinaspan tawantin reykunata atiparqanku, Damasco llaqtaq wichayninpi kaq Hobakamataq chaykunata qatirqanku.

¹⁶Hinaspanmi imaymana kaqkunata qechumurqan, hinallataq wawqen Lot-tapas kaqnintinta, warmikunatapas runakunatapas.

¹⁷Sodoma reytaq Abramta chaskiq lloqsirqan “Rey Wayq'o” nisqa Save wayq'oman, Kidorlaomerta paywan kaq reykunatawan atipamusqanmanta kutimpushaqtin.

¹⁸Qollana Diospa sacerdoten Salem rey Melkisedektaq t'antata vinotawan Abramman haywarqan.

¹⁹Hinaspan payta samincharqan: —Hanaq pachata kay pachatawan kamaq Qollana Diospa saminchasqan Abramqa kachun, awqaykikunata hap'iykachiqniyki Qollana Diosqa yupaychasqa kachun, nispa. Abramtaq tukuymanta diezmota payman qorqan.

²¹Sodoma reytaq Abramta nirqan: —Runakunata qoway, qhapaq-kaytataq qan hap'ikunki, nispa.

²²Abramtaq ichaqa Sodoma reyta nirqan: —Hanaq pachata kay pachatawan kamaq Qollana Dios Señormanmi rimarirqani,

²³huk q'aytutapas usut'a watutapas mana imaykitapas chaskikunaypaq, paqtan niwaq: Ñoqan Abramtaqa qhapaqyachini, nispa.

²⁴Manan imatapas munanichu, aswanpas waynakunaq mikhusqallantan, ñoqawan riq Aner, Eskol, Mamre qharikunapas tupaqninkuta chaskikuchunku, nispa.