Read Quechua Cuzco Bible 1988 GÉNESIS 15 Bible Online

GÉNESIS 15 - Quechua Cuzco Bible 1988 bible

GÉNESIS 15

¹Chaykuna qhepatataq Señor Diosqa rikhuriypi Abramta nirqan: —Abram, ama manchakuychu, ñoqan waqaychasqayki, anchatapuni premiasqayki, nispa.

²Hinaqtinmi Abramqa kutichirqan: —Qollana Señor Diosnilláy, ¿ima allinniypaqtaq kanqa mana wawayoq kashaqtiy? Herenciay chaskiqqa chay Damasco llaqta runa Eliezerllan kanqa. Manan wawata qowarqankichu, kayqa wasiypi naceq kamachiymi herenciay chaskiq, nispa.

⁴Huktawantaq Señor Diosqa payta nirqan: —Manan paychu herenciataqa chaskisunki, aswanpas wawaykipunin herenciataqa chaskisunki, nispa.

⁵Payta hawaman pusaspataq nirqan: —Qhawariy hanaq pachata, hinaspa ch'askakunata yupay, atiwaqchus chaykunata yupayta. Ahinan kanqa mirayniyki, nispa.

⁶Hinan Señor Diospi iñirqan, chaymi Señor Diosqa payta chaninchaykurqan.

⁷Hinaspanmi payta nirqan: —Ñoqan Señor Diosqa kani, Kaldea suyu Ur llaqtamantan pusamurqayki kay hallp'a herenciata qonaypaq, nispa.

⁸Paytaq tapuykurqan: —Qollana Señor Diosnilláy, ¿imaynapitaq yachasaq chay herenciata chaskinayta? nispa.

⁹Chaymi Abramta nirqan: —Apamuway kinsa watayoq borregota, hinallataq huk kullkutapas, huk urpitawan, nispa.

¹⁰Hinan payqa lliw chaykunata aparqan, hinaspan chaykunata nak'aspa kuskamanta phasmispa, sapanka phasmita chimpa purantinta churarqan, kullkuta urpita ichaqa mana phasmirqanchu.

¹¹Nak'asqa aychaman suweq'arakuna uraykamuqtintaq, Abramqa chaykunata manchachirqan.

¹²Inti haykunanpaq kashaqtintaq Abramta sinchita puñuy aysarqan, hinaspan manchay laqhayaq payta mancharichirqan.

¹³Señor Diosmi Abramta nirqan: —Yachay, mirayniykiqa hukpa hatun suyunpin karu llaqtayoq kanqa, chaypi kamachi ruwaqmi kanqaku, chaypin ñak'arichisqapas kanqaku tawa pachak watantin.

¹⁴Servisqanku hatun suyutataq ichaqa ñoqa muchuchisaq, chay qhepatataq llasaq qhapaq-kaynintin lloqsimpunqaku.

¹⁵Qantaq sumaq kawsaypi sinchi yuyaqllaña wañukapunki, hinaspan p'ampasqa kapunki.

¹⁶Tawakaq miraypitaq mirayniykikunaqa kayman kutimpunqaku, manaraqmi Amor runakunata kaymanta wikch'usaqchu, mana chanin-kayninqa manan sinchiyaykunpuniraqchu, nispa.

¹⁷Inti haykuqtintaq, tutayaqtinña rikhurirqan huk q'osñishaq sansa churana rawrashaq ninapiwan phasmisqa animalkunaq chawpinta pasashaq.

¹⁸Chay p'unchaypin Señor Diosqa Abramwan rimanakurqan: —Mirayniykimanmi kay hallp'ata qosaq Egipto mayumantapacha hatun Eufrates mayukama.

¹⁹Kayin runakunaq, Kenaz runakunaq, Kadinon runakunaq,

²⁰Het runakunaq, Fares runakunaq, Refaim runakunaq,

²¹Amor runakunaq, Canaán runakunaq, Girgas runakunaq, Jebus runakunaq hallp'anta, nispa.