Read Quechua Cuzco Bible 1988 GÉNESIS 16 Bible Online

GÉNESIS 16 - Quechua Cuzco Bible 1988 bible

GÉNESIS 16

¹Abrampa warmin Saraitaq mana paypaq wachakurqanchu, Saraipataq karqan Egipto warmi kamachin, Agar sutiyoq.

²Chaymi Saraiqa Abramta nirqan: —Yachankin riki Señor Diosqa mana wachakuqman tukuchiwasqanta, valekuyki kamachiywan tiyanaykipaq, icha paypi wawaykuna kanman, nispa. Hinan Abramqa Saraita kasurqan.

³Chaymi Saraiqa Egipto warmi kamachin Agarta Abram qosanman warmin kananpaq qorqan, chunka wataña Abramqa Canaán suyupi kashaqtin.

⁴Hinan payqa Agarwan puñurqan, paymi wiksallikurqan. Wiksallikuspataq patronanta pisichayta qallarirqan.

⁵Hinaqtinmi Saraiqa Abramta nirqan: —¡Qanmi kaypaqqa huchayoq kanki! Ñoqan kamachiytaqa warmiyki kananpaq qorqayki, wiksallikuspañataq pisichashawan. ¡Señor Diosña mayqenninchistapas huchachawasun! nispa.

⁶Abramtaq Saraita nirqan: —Kayqa kamachiykiqa makiykipin kashan, ima munasqaykita payta ruway, nispa. Sarai sinchita muchuchiqtintaq Agarqa ayqekapurqan.

⁷Señor Diospa angelninmi ichaqa Agarta tarirqan ch'inneqpi Shur ñanpi kaq unu pukyu patapi.

⁸Hinaspan payta nirqan: —Agar, Saraipa kamachin, ¿maymantan hamushanki, maytataq rishanki? nispa. Paytaq kutichirqan: —Patronay Saraimantan ayqekushani, nispa.

⁹Hinaqtinmi Señor Diospa angelninqa payta nirqan: —Patronaykiman kutipuy, hinaspa payman k'umuykuy.

¹⁰Mirayniykitan sinchita askhayachisaq, mana yupay atiymi kanqa askha kasqanrayku.

¹¹Ñan wiksallikurqankiña qhari wawatataq wachakunki, hinaspan Ismael [9] sutita churanki, waqasqaykita Señor Diospa uyarisqanrayku.

¹²Paymi mana llamp'uyaq runa kanqa, llapawanmi maqanakunqa, llapataq paywan maqanakunqaku, llapa wawqenkuna hark'akushaqtintaq tiyanqa, nispa.

¹³Hinan Agarqa rimaykuqnin Señor Diosta suticharqan: Qanmi “Rikuq Dios” kanki, nispa, nirqanmi: —Diosmi rikuwan kawsashaniraqtaq, nispa.

¹⁴Chaymi chay pukyuqa “Rikuwaqniy-kawsaq-pukyu” nisqa. Kadespa Beredpa chawpinpin kashan.

¹⁵Hinaspan Agarqa Abrampaq huk qhari wawata wachakurqan, Abramtaq chay churinta suticharqan Ismaelta.

¹⁶Agarmi Ismaelta wachakurqan Abram pusaq chunka soqtayoq watayoq kashaqtin.